ఇస్మార్ట్‌ బాల్‌

అవీ ఇవీ...

ఇస్మార్ట్‌ బాల్‌

క్రికెట్లో ఎన్నో ఆవిష్కరణలు చూశాం.. స్టంప్స్‌లో కెమెరాలు, హ్యాక్‌ ఐలు, ఆల్ట్రా ఎడ్జ్‌లు, హాట్‌ స్పాట్‌లు ఇలా సాంతికేతిక పుంతలు తొక్కుతోంది ఈ ఆటలో! ఎంత సాంకేతిక పరిజ్ఞానం పెరిగినా ఇంకా ఏదో లోటు.. తప్పని పొరపాట్లు! ఈ నేపథ్యంలో క్రికెట్లో మరింత కచ్చితత్వం కోసం వచ్చింది స్మార్ట్‌ బంతి.. రాబోయే బిగ్‌బాష్‌ లీగ్‌లో ఈ కొత్త బంతిని ప్రయోగాత్మకంగా వాడనున్నారు. ఈ బంతి ప్రత్యేకతేంటి? దీని వల్ల కలిగే ప్రయోజనాలేంటి?

ఎలా తయారు చేశారు?
ఆస్ట్రేలియా మాజీ పేసర్‌ మైకేల్‌ కాస్ప్రోవిజ్‌కు చెందిన సంస్థ ఈ కొత్త బంతిని తయారు చేసింది. ఇది చూడటానికి మామూలు కూకాబుర్రా బంతి మాదిరిగానే ఉంటుంది. అయితే దీని పొరల లోపల ఒక మైక్రో చిప్‌ పెట్టి తయారు చేస్తారు. గుండ్రంగా ఉండే సాకెట్‌లో ఈ చిప్‌ను ఉంచి ఆ సాకెట్‌ను బంతి పొరల మధ్య ఉంచుతారు. ఈ సాకెట్‌ చిన్న కోడుగుడ్డు ఆకారంలో ఉండి సులభంగా బంతిలో ఇమిడిపోతుంది. దానిపై తోలు లేదా రబ్బరు వలయాలను చుడతారు. ఇది చూడటానికి సాధారణ బంతిలాగే అనిపిస్తుంది. మామూలు బంతిలానే స్వింగ్‌ అవుతుంది.

ఎలా పని చేస్తుంది?
ఈ బంతిలో అమర్చిన చిప్‌.. యాప్‌ ద్వారా ఫోన్‌, ట్యాబ్లెట్‌, స్మార్ట్‌వాచ్‌కు సమాచారం అందిస్తుంది. బౌలర్‌ చేతి నుంచి బంతి వెలువడిన తక్షణం ఈ చిప్‌ పని చేసి సమాచారాన్ని చేరవేస్తుంది. బౌలర్‌ ఎంత వేగంతో బంతి విసిరాడు, ఏ కోణంలో విసిరాడు, స్పిన్నర్‌ అయితే ఎంత టర్న్‌ చేశాడు.. విసిరినప్పుడు వేగం ఎంత? బంతి పిచ్‌ అయినప్పుడు వేగం ఎంత? బంతి బ్యాట్స్‌మెన్‌కు ఎంత వేగంతో చేరింది? బ్యాట్‌ను ఏ ప్రాంతంలో తాకింది ఇలాంటి వివరాలన్నీ సెకన్లలో తెలిసిపోతాయి. ఇప్పటిదాకా స్పీడ్‌ గన్లు మాత్రమే బంతి వేగాన్ని లెక్కిస్తున్నాయి. ఈ స్మార్ట్‌ బంతి ద్వారా బంతి ఏ కోణంలో తిరిగింది, బౌన్స్‌ అయింది లాంటి వివరాలు కచ్చితంగా తెలియనున్నాయి. దీని వల్ల కోచ్‌ల కూడా పని సులభం కానుంది.

ఎవరికి లాభం?
ఎంత సాంకేతిక పరిజ్ఞానం వచ్చినా అంపైరింగ్‌ తప్పిదాలు దొర్లుతూనే ఉన్నాయి. కొన్నిసార్లు బంతి బ్యాట్‌ అంచుకు తాకిందో లేదో స్నికో మీటర్‌, హాట్‌ స్పాట్‌లు కూడా తేల్చలేకపోతున్నాయి. ఈ నేపథ్యంలో స్మార్ట్‌ బంతి చాలా కచ్చితమైన ఫలితాలను ఇస్తుందని అంచనా. బంతి బ్యాట్‌ అంచుకు తాకినట్లు కనిపించినా.. ఒక్కసారి అది వెళ్లే కోణాన్ని బట్టి ఎలాంటి ఎడ్జ్‌ నమోదు కాకపోవడం, బాగా తక్కువ ఎత్తులో వచ్చిన క్యాచ్‌లను ఫీల్డర్‌ నేలపాలు చేయకుండా సరిగా పట్టాడో లేదో చెప్పలేకపోవడం లాంటి సమస్యలను స్మార్ట్‌ బంతి పరిష్కరించే అవకాశముంది. బంతి నేరుగా ఫీల్డర్‌ చేతిలో పడిందో నేలకు తాకిందో తెలుస్తుంది.. వెంట్రుకవాసిలో బంతి బ్యాట్‌కు తాకినా స్పష్టత ఉంటుంది. స్మార్ట్‌ బంతి ఇంకా ప్రయోగ దశలోనే ఉంది. పూర్తి స్థాయిలో అమలు చేయాలంటే ఏడాది పడుతుంది. ఇది ఎంత కాలం మన్నుతుందనేది ప్రధాన సమస్య. ఈ చిప్‌ను ఉంచే కూకాబుర్రా బాల్‌ అన్ని ఫార్మాట్లలో ఎంతసేపు నిలుస్తుందో చూడాలి.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

అవీ ఇవీ...

మరిన్ని

రుచులు

App