మనసు గుంజేస్తారు

స్పోర్ట్స్‌ స్టార్‌

మనసు గుంజేస్తారు

శరీరాన్ని విల్లులా వంచుతూ.. సంభ్రమాశ్చర్యాలకు గురి చేస్తూ కళ్లుచెదిరేలా విన్యాసాలు చేస్తారు జిమ్నాస్టిక్స్‌లో! అయితే ఈ ఫీట్లు సాధారణంగా ఏ ఫ్లోర్‌ మీదో లేక బార్‌ మీదే చేస్తారు.. కానీ ఒక చెక్క స్తంభం మీద చేస్తే! అదీ ఒక రెజ్లర్‌ చేస్తే..! వినడానికే విచిత్రంగా ఉన్నా ఇది నిజం.. ఆ ఆట పేరే మల్‌ఖంబ్‌! ఒక్క మాటలో చెప్పాలంటే ఒక రెజ్లర్‌.. స్తంభాన్ని ఆధారంగా చేసుకుని చేసే జిమ్నాస్టిక్స్‌ మాదిరిగా ఉంటుంది ఈ ఆట. ఇలాంటి ఆటలో భారత్‌లో ఒక ప్రపంచ ఛాంపియన్‌షిప్‌ జరిగిందన్న సంగతి తెలుసా! ముంబయి వేదికగా ఇటీవల జరిగిన ఈ ప్రపంచ ఛాంపియన్‌షిప్‌లో భారత్‌ విజేతగా నిలిచింది. తెలంగాణ అమ్మాయి జానాబాయి స్వర్ణం గెలిచి సత్తా చాటింది.

మల్‌ఖంబ్‌ అనే క్రీడ చాలా పురాతనమైన భారత క్రీడ. మల్ల (రెజ్లింగ్‌), ఖంబ్‌ (స్తంభం) ఈ రెండింటి మేళవింపుతో వచ్చిందే మల్‌ఖంబ్‌. 12వ శతాబ్దంలోనే ఈ క్రీడ వెలుగులోకి వచ్చినట్లు చరిత్ర చెబుతోంది. చాళుక్యుల కాలంలో ఈ క్రీడను బాగా ప్రోత్సహించినట్లు శాసనాలు వెల్లడిస్తున్నాయి. రాణి ఝాన్సీలక్ష్మీ బాయ్‌ ఈ క్రీడను నేర్చుకున్నట్లుగా కూడా చరిత్రకారులు చెబుతున్నారు. ఇంతటి చరిత్ర ఉన్న ఈ క్రీడను ఆడడం పెద్ద సాహసమనే చెప్పాలి. ఎందుకంటే ఈ ఆటలో రాణించాలంటే శరీరం స్ప్రింగ్‌లా కదలాలి. ఎంతో ఏకాగ్రత కావాలి. శారీరక దృఢత్వం ఉండాలి.

మల్‌ఖంబ్‌లో దాదాపు 30 రకాల విన్యాసాలు ఉన్నాయి. వీటిని మూడు ఈవెంట్లలో ప్రదర్శిస్తారు. ఒక మైదానం మధ్యలో బలమైన చెక్క స్తంభాన్ని పాతుతారు. దీనిపై రెజ్లర్లు ఒక్కొక్కరుగా ఫీట్లు చేస్తారు. ఎక్కువసేపు గుంజపై నిలబడడం.. ఒంటి కాలితో నిలవడం, పొట్టను ఆధారం చేసుకుని స్తంభంపై పడుకోవడంతో పాటు ఎక్కువమంది గ్రూపుగా ఒకే స్తంభంపై విన్యాసం చేయడం లాంటి ఆసక్తికర దృశ్యాలు మల్‌ఖంబ్‌లో దర్శనమిస్తాయి. జిమ్నాస్ట్‌లు చేసే చాలా విన్యాసాలు ప్రదర్శిస్తారు. క్లిష్టమైన విన్యాసాలను బట్టి.. ఒక క్రీడాకారుడు స్తంభంపై ఎంతసేపు ఆ ఫీట్లు ప్రదర్శించాడు.. అతని పట్టు ఎలా ఉంది అనే వివిధ అంశాలను పరిగణనలోకి తీసుకుని పాయింట్లు కేటాయిస్తారు. టీమ్‌ విభాగంలోనూ పోటీలుంటాయి.

పోల్‌: మైదానంలో నిలువగా ఒక చెక్క స్తంభం నాటి ఉంటుంది. ఈ పోల్‌ను ఆధారంగా చేసుకుని దానిపై వేలాడుతూ భిన్నమైన విన్యాసాలు చేయాలి. రెజర్లు తమ సామర్థ్యాన్ని, పట్టును పెంచుకోవడానికి, చేతులను కాళ్లను, శరీరాన్ని బలంగా చేసుకోవడానికి ఈ పోల్‌ విన్యాసాలను చేస్తారు. ఈ స్తంభంపైకి ఎక్కి దాన్ని కాళ్లతో పట్టు చిక్కించుకుని.. మెలికలు తిరిగిపోతూ చేసే ఈ ఫీట్లకు కళ్లు చెదిరిపోవాల్సిందే. పడిపోతారేమో అనిపించే సమయంలో ఠక్కున పట్టు దొరకబుచ్చుకుని నిలబడుతుంటే మనలో ఉత్కంఠ పెరిగిపోవడం ఖాయం.

హ్యాంగింగ్‌: ఇది సాధారణ స్థాయి కన్నా తక్కువ ఎత్తులో ఉండే పోల్‌ మీద చేసే విన్యాసం. ఈ స్తంభాన్ని భూమిలో పాతకుండా రెండు పోల్స్‌ మధ్య వేలాడదీస్తారు. పోటీ పడేవాళ్లు ఈ వేలాడుతున్న స్తంభాన్ని ఎక్కి పట్టు చిక్కించుకుని విన్యాసాలు చేయాల్సి ఉంటుంది. కాళ్లను పోల్‌కు పెన వేసుకుంటూ చేసే ఫీట్లు కళ్లు చెదిరిపోయేలా చేస్తాయి. ఐతే ఏమాత్రం చేజారినా గాయాలు తప్పవు. మల్‌ఖంబ్‌లో ఇదో క్లిష్టమైన ప్రక్రియ.

రోప్‌: ఈ ఈవెంట్లో రెండు స్తంభాల మధ్య ఒక బలమైన తాడు కడతారు. ఆ తాడును రెండు చేతులతో పట్టుకుని కాళ్లతో పట్టు చిక్కించుకుని జిమ్నాస్టిక్స్‌, యోగా ఫీట్లు చేస్తారు. ముఖ్యంగా ఆ రోప్‌పై పట్టు చిక్కించుకుంటూ ముందుకెళ్లే విధానం చూసి తీరాల్సిందే. ఇది ప్రమాదకరమైన విన్యాసం.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి