సామాజిక మాధ్యమంలో బయటపడిన వరుడి గుట్టు.. ఒకరోజు ముందు ఆగిన పెళ్లి

శివ్వంపేట, న్యూస్‌టుడే: పెళ్లి నిశ్చయమైన యువకుడికి మరో మహిళతో సంబంధం ఉందని తెలుసుకున్న వధువు బంధువులు పెళ్లికి ఒకరోజు ముందు వరుడిని నిలదీసిన ఘటన శివ్వంపేట మండలంలోని ఓ గ్రామంలో చోటుచేసుకుంది. భర్తతో దూరంగా ఉంటున్న మహిళతో వరుడు దిగిన ఫొటోలను గతంలో సామాజిక మాధ్యమాల్లో పోస్ట్‌ చేయగా వధువు బంధువులు చూశారు. దీంతో గురువారం వరుడి ఇంటికి వెళ్లి గొడవ చేశారు. గ్రామ పెద్దలతో పంచాయితీ నిర్వహించి అతనితో పెళ్లి నిరాకరిస్తూ నిర్ణయం తీసుకున్నారు. అంతేకాకుండా సుమారు రూ.7లక్షల వరకు జరిమానా విధించినట్లు తెలిసింది. ఈ విషయమై ఎలాంటి ఫిర్యాదు రాలేదని శివ్వంపేట పోలీసులు తెలిపారు.