తెలుగు తెరకు డాలర్ల వర్షం!
close

తాజావార్తలు


తెలుగు తెరకు డాలర్ల వర్షం!
న దేశంలో హిందీ చిత్రాలదే ఆధిపత్యం. అత్యధిక వసూళ్లు ఆ సినిమాలకే దక్కుతుంటాయి. ఓవర్సీస్‌లోనూ ఆ సినిమాలదే హవా. మిగిలిన భారతీయ భాషలతో పోలిస్తే అక్కడ కూడా హిందీ మాట్లాడేవారు ఎక్కువ కావటంతో ఆ భాషా చిత్రాలదే పైచేయిగా ఉంటుంది. అందుకే.. అమెరికాలో ప్రతీ శుక్రవారం బాలీవుడ్‌ సినిమాల హవా స్పష్టంగా కనిపిస్తుంటుంది. ఆంగ్ల చిత్రాలకి దీటుగా అవక్కడ హడావుడి చేస్తుంటాయి.

అయితే.. ఈ సంక్రాంతికి మాత్రం అమెరికాలో బాలీవుడ్‌ చిత్రాలపై తెలుగు సినిమాలే పైచేయి సాధించడం విశేషం. ఇద్దరు అగ్ర కథానాయకులు చిరంజీవి.. బాలకృష్ణ నటించిన చిత్రాలు విడుదల కావటంతో అభిమానులు థియేటర్లకి క్యూ కట్టారు. ఆ ఉద్ధృతికి సినిమాలు విడుదలైన తొలి వారంలోపే రెండు చిత్రాలూ మిలియన్‌ డాలర్ల మార్క్‌ని అందుకొని రికార్డు సృష్టించాయి.

చిరు ‘ఖైదీ నంబర్‌ 150’ అయితే అమెరికాలో ప్రీమియర్‌ షోలతోనే మిలియన్‌ మార్క్‌ని చేరుకోవడం.. ఆదివారానికే రెండు మిలియన్‌ డాలర్ల మార్కుని అధిగమించింది. బాలకృష్ణ ‘గౌతమిపుత్ర శాతకర్ణి’ చిత్రం కూడా వారంలోపే మిలియన్‌ డాలర్లని అధిగమించింది. ఆ చిత్రాలు సాధించిన వసూళ్లు చూసి బాలీవుడ్‌ వర్గాలు ఆశ్చర్యానికి గురి అవుతున్నాయి.

ప్రముఖ సినీ విశ్లేషకుడు తరణ్‌ ఆదర్శ్‌ ట్విట్టర్‌లో సంక్రాంతికి విడుదలైన తెలుగు చిత్రాల గురించి ప్రత్యేకంగా స్పందించారు. తెలుగు చిత్రాలు హిందీ చిత్రాల్ని డామినేట్‌ చేశాయని ఆయన పేర్కొనటం గమనార్హం. తెలుగు సినిమాలు ఓవర్సీస్‌లో మిలియన్ల డాలర్లు వసూలు చేయడమనేది కొత్తేమీ కాదు. కాకపోతే అక్కడ మొదట్నుంచి పవన్‌ కల్యాణ్‌.. మహేష్‌బాబు.. ప్రభాస్‌.. ఎన్టీఆర్‌.. అల్లుఅర్జున్‌ లాంటి యువ కథానాయకుల చిత్రాలదే ఆధిపత్యం కనిపించేది. సీనియర్‌ హీరోల చిత్రాలు నామమాత్రంగానే ఆడేవి. కానీ ఇప్పుడు చిరంజీవి.. బాలకృష్ణ లాంటి సీనియర్ల సినిమాలు అక్కడ మిలియన్ల కొద్దీ డాలర్లని వసూలు చేయడమే విశేషంగా మారింది.

చిరంజీవి చిత్ర పరిశ్రమకి దూరమయ్యేనాటికి ఓవర్సీస్‌లో ఈ స్థాయి కలెక్షన్లు ఉండేవి కావు. కానీ.. తొమ్మిదేళ్ల తర్వాత ఆయన రీఎంట్రీ ఇచ్చి చేసిన సినిమాకు ఏకంగా 2 మిలియన్‌ డాలర్లు వసూలు చేయడం ట్రేడ్‌ వర్గాల్ని ఆశ్చర్యానికి గురి చేసింది. అదే రీతిలో బాలకృష్ణ ‘గౌతమీ పుత్ర శాతకర్ణి’తోనే ఓవర్సీస్‌లో మిలియన్‌ డాలర్ల హీరోగా అవతరించారు. ఈ వసూళ్లతో ఈ కథానాయకుల చిత్రాలకి ఓ కొత్త మార్కెట్‌ ఓపెన్‌ అయినట్టేనని సినీ విశ్లేషకులు అభిప్రాయం వ్యక్తం చేస్తున్నారు. సంక్రాంతి కానుక‌గా వ‌చ్చిన శ‌త‌మానం భ‌వ‌తి చిత్రం కూడా కుటుంబ క‌థా చిత్రంగా ఓవ‌ర్సీస్‌లో మంచి వ‌సూళ్లూ రాబ‌డుతోంది.

ఓవర్సీస్‌ పంపిణీదారులు అభిప్రాయం ప్రకారం.. మన తెలుగు సినిమాలకి అమెరికాలో పెద్ద మార్కెట్‌ ఉందంటున్నారు. ‘బాహుబలి’ చిత్రాన్ని ఇందుకు ఉదాహరణగా చూపిస్తున్నారు. ‘బాహుబలి’ అయితే అదో ప్రత్యేకమైన సినిమాగా పరిగణించొచ్చు. అందుకే అది 7 మిలియన్ల డాలర్లు కొల్లగొట్టింది.

అయితే మాస్‌ చిత్రాలు కూడా రాబోయే రోజుల్లో మూడు.. నాలుగు మిలియన్ల కలెక్షన్లను అవలీలగా సాధించగలవని.. కాకుంటే కాస్త ముందస్తు ప్రణాళిక ఉండాలంటున్నారు. ‘ఖైదీ నంబర్‌ 150’ చిత్రాన్ని ఓవర్సీస్‌లో విడుదల చేసిన పంపిణీదారుడు సుధీర్‌.టి మాట్లాడుతూ ‘‘అమెరికాలో తెలుగు సినిమా మార్కెట్‌ పరిధి రోజు రోజుకీ విస్తృతమవుతోంది. పైరసీ తగ్గిపోవడంతో ప్రతి ఒక్కరూ థియేటర్‌కి వచ్చి సినిమాల్ని ఆస్వాదిస్తున్నారు. హాలీవుడ్‌.. బాలీవుడ్‌ సినిమా తరహాలో విడుదల తేదీలు ముందస్తుగానే నిర్ణయమైతే మరిన్ని ప్రయోజనాలు ఉంటాయి. కావాల్సినన్ని థియేటర్లు.. అది కూడా మంచి థియేటర్లను బుక్‌ చేసుకోవచ్చు. ‘ఖైదీ నంబర్‌ 150’ చిత్రం విడుదల తేదీ ముందస్తుగా ఖరారు కావడం.. ఆ సినిమాకి సంబంధించిన ప్రింట్‌ సరైన సమయానికి చేరుకోవడం మాకు బాగా కలిసొచ్చింది. ఈ యేడాది ఓవర్సీస్‌లో తెలుగు సినిమా మరిన్ని అద్భుతాలు సృష్టించబోతోంది’’ అన్నారు. అమెరికాలో మన చిత్రాలకి లభిస్తున్న ఆదరణ.. వసూళ్లు మన కథానాయకుల్లో కొత్త ఉత్సాహాన్ని నింపుతున్నాయి. దాంతో అమెరికాకు వెళ్లి మరీ సినిమాకి ప్రచారం చేస్తున్నారు. ‘ధృవ’ సినిమా కోసం రామ్‌చరణ్‌ అమెరికాకు వెళ్లి అక్కడ ప్రీమియర్‌ షోలకి హాజరయ్యారు. అందుకు తగ్గట్లే ఆయన నటించిన ‘ధృవ’ అమెరికాలో మిలియన్‌ డాలర్ల మార్క్‌ని చేరుకోవటం గమనార్హం. తమ సినిమాలు డాలర్ల వర్షం కురుస్తున్న నేపథ్యంలో.. రానున్న రోజుల్లో టాలీవుడ్‌ నటులు యూఎస్‌కు సినిమా ప్రమోషన్‌ కోసం వెళ్లటం ఖాయమన్న అభిప్రాయం వ్యక్తమవుతోంది.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు

దేవ‌తార్చ‌న

రుచులు

© 1999- 2017 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.