Chandrayaan 3: అప్పట్లో.. 4 సెకన్లు ఆలస్యంగా చంద్రయాన్‌ 3.. ఎందుకంటే!

ఇంటర్నెట్‌ డెస్క్‌: చంద్రుడి రహస్యాలను తెలుసుకునేందుకు గాను భారత అంతరిక్ష పరిశోధనా సంస్థ (ISRO) చేపట్టిన చంద్రయాన్‌-3 (Chandrayaan-3) విజయవంతమై చరిత్ర సృష్టించింది. అయితే, ప్రయోగం సమయంలో చోటుచేసుకున్న ఓ కీలక పరిణామాన్ని ఇస్రో తాజా నివేదికలో వెల్లడించింది. అనుకున్న సమయం కంటే నాలుగు సెకన్లు ఆలస్యంగా చంద్రయాన్‌ ప్రయోగించినట్లు పేర్కొంది. అంతరిక్ష శకలాలు, ఉపగ్రహాలతో ఢీకొనడాన్ని నివారించేందుకు ఈ నిర్ణయం తీసుకున్నట్లు తెలిపింది.

‘కక్ష్య మార్గంలో శిథిలాలు, ఉపగ్రహాల నుంచి ఢీకొట్టే ప్రమాదాన్ని నివారించేందుకు చంద్రయాన్‌-3 ప్రయోగాన్ని నాలుగు సెకన్లు ఆలస్యంగా చేపట్టాల్సి వచ్చింది’ అని ఇండియన్‌ స్పేస్‌ సిచ్యుయేషనల్‌ అసెస్‌మెంట్‌ రిపోర్టు (ISSAR) 2023లో పేర్కొంది. అంతరిక్ష పర్యావరణానికి సంబంధించి.. భవిష్యత్తు పరిణామాలు, బాహ్య అంతరిక్షంలో సురక్షిత, సుస్థిర కార్యకలాపాలకు ఎదురయ్యే సమస్యలను ఇందులో విశ్లేషించింది. అయితే, చంద్రయాన్‌- 3 ప్రయోగం కొనసాగినంత కాలం ఎటువంటి ఇతర శకలాలు, ఉపగ్రహాలు దీనికి అత్యంత సమీపంలో వచ్చినట్లు గుర్తించలేదని పేర్కొంది.