Saturday, February 06, 2016

Untitled Document

Untitled Document
జడ్పీ నుంచి 70 మందికి అ.నౌ.స. ప్రత్యేక విధులు
జిల్లాపరిత్తు, న్యూస్‌టుడే: జిల్లాపరిషత్తులో పనిచేస్తున్న మొత్తం 70 మంది సిబ్బందిని అ.నౌ.స. (అంతర్జాతీయ నౌకా సమీక్ష) కార్యక్రమానికి ప్రత్యేక విధులకు కేటాయించారు. ఇందులో ఎంపీడీఓలు, గ్రామ కార్యదర్శులు, జిల్లాపరిషత్తులో పనిచేస్తున్న ఇతర మినిస్టీరియల్‌ సిబ్బందిని అ.నౌ.స.కు కేటాయించారు. దీనికి ప్రత్యేక విధుల నిమిత్తం పాసుల జారీలో జిల్లా యంత్రాంగం నిమగ్నమైంది.


రాళ్లగెడ్డలో ఉద్రిక్తం
* ఏఓపీ ఏర్పాటుకు నిరసనగా గిరిజనుల ఆందోళన
* అడుగడుగునా అడ్డుకున్న పోలీసులు
చింతపల్లి, న్యూస్‌టుడే: మన్యంలో బలపం పంచాయతీ రాళ్లగెడ్డలో శుక్రవారం మరోసారి ఉద్రిక్త పరిస్థితి నెలకొంది. బలపం పంచాయతీని దత్తత తీసుకున్న జిల్లా ఎస్పీ కోయ ప్రవీణ్‌ గురువారం రాళ్లగెడ్డ కొత్తూరు సమీపంలో ఆర్మ్‌డ్‌ ఔట్‌ పోస్టు (ఏఓపీ) ఏర్పాటుకు భూమిపూజ చేశారు. మావోయిస్టు ప్రాబల్య ప్రాంతం కావడంతో భద్రత పరమైన కారణాల రీత్యా పోలీసు యంత్రాంగం ఈ విషయాన్ని గోప్యంగా ఉంచింది. బాక్సైట్‌ తవ్వకాల నేపథ్యంలో జరుగుతున్న గిరిజనుల ఆందోళనలను ఎక్కడికక్కడ పోలీసులతో అడ్డుకునేందుకే ప్రభుత్వం మన్యంలో పోలీస్‌ ఔట్‌ పోస్టులను ఏర్పాటు చేయిస్తోందని మావోయిస్టులు ఆరోపిస్తున్నారు. తాజాగా రాళ్లగెడ్డ వద్ద పోలీస్‌ ఔట్‌ పోస్టు ఏర్పాటుకు భూమిపూజ చేయడం చర్చనీయాంశమైంది. ఈ నేపథ్యంలో బలపం పంచాయతీలోని వివిధ గ్రామాల గిరిజనులతో శుక్రవారం రాళ్లగెడ్డలో భారీ ఆందోళన చేపట్టాలని గిరిజనులు నిర్ణయించారు. ముందుగానే పసిగట్టిన పోలీసు యంత్రాంగం అప్రమత్తమైంది. బలపం అడవుల్లోకి గ్రేహౌండ్స్‌, ప్రత్యేక పోలీసు దళాలను గాలింపు చర్యలకు పంపింది. వీరు ఒక వైపు కోరుకొండ అడవుల్లో జల్లెడ పడుతుండగానే మరోవైపు లోతుగెడ్డ వంతెన మొదలుకొని రాళ్లగెడ్డ వరకూ దారి పొడవునా పోలీసులు బృందాలుగా ఉండి గిరిజనుల ఆందోళనను అడ్డుకునేందుకు మోహరించారు. ముందుగా నిర్ణయించిన ప్రకారం బలపం పంచాయతీలోని వివిధ గ్రామాలకు చెందిన గిరిజనులు శుక్రవారం గుంపులుగా రాళ్లగెడ్డలో ఆందోళన చేసేందుకు రావడానికి ప్రయత్నించగా పోలీసులు అడ్డుకున్నారు. వారిని రాళ్లగెడ్డలో ఆందోళన చేసేందుకు అనుమతించలేదు. దీంతో పోలీసులు గిరిజనుల మధ్య కాసేపు వాగ్వాదం చోటు చేసుకుంది. ఎట్టకేలకు సాయుధులైన పోలీసులు ఎక్కువ మంది ఉండటంతో వారిని ఎదిరించే ధైర్యం చేయలేని గిరిజనులు వెనక్కి తగ్గి తమ ఆందోళనను కోరుకొండలో చేపట్టాలని నిర్ణయించారు. లోతుగెడ్డ వంతెన వద్ద కోరుకొండ వెళ్లే మార్గంలో పోలీసులు వాహనాలు తనిఖీ చేపట్టారు. మావోయిస్టుల హెచ్చరికలు, గిరిజనుల ఆందోళనలు, పోలీసుల ప్రతిఘటనతో బలపం పంచాయతీ రాళ్లగెడ్డలో మళ్లీ వాతావరణం ఒక్కసారిగా వేడెక్కింది.


కోరుకొండలో గిరిజనుల ర్యాలీ
చింతపల్లి గ్రామీణం, న్యూస్‌టుడే: రాళ్లగెడ్డలో ఆర్మ్‌డ్‌ పోలీస్‌ ఔటు పోస్టు ఏర్పాటు నిర్ణయాన్ని వ్యతిరేకిస్తూ శుక్రవారం కోరుకొండలో ఆ పంచాయతీ పరిధిలోని గ్రామాల గిరిజనులు ఆందోళన చేపట్టారు. గతంలో మన్యంలో పోలీస్‌ ఔటు పోస్టుల వల్లే ఎన్నో అరాచకాలు జరిగాయని గిరిజనులు ఆరోపించారు. ఇప్పుడున్న ప్రశాంత లోపిస్తుందన్నారు. రాళ్లగెడ్డలో గిరిజనులు సాగు చేసుకుంటున్న పదెకరాల భూమిని పోలీస్‌ ఔటు పోస్టు ఏర్పాటు కోసం బలవంతంగా లాక్కుంటున్నారని వారు మండిపడ్డారు. పోలీసుల చర్యలను ప్రశ్నిస్తే మావోయిస్టులకు సహకరిస్తున్నామంటూ తమపై అన్యాయంగా కేసులు నమోదు చేస్తున్నారన్నారు. రాళ్లగెడ్డలో పోలీస్‌ ఔట్‌ పోస్టు ఏర్పాటు నిర్ణయాన్ని వెనక్కి తీసుకోవాలని వారు కోరారు.


గిరిజనుల రక్షణ కోసమే పోలీస్‌ స్టేషన్ల ఏర్పాటు
* చింతపల్లి డీఎస్పీ రాఘవేంధ్ర
చింతపల్లి, న్యూస్‌టుడే: మన్యంలో మావోయిస్టుల చర్యల కారణంగా గిరిజనులకు ప్రభుత్వం అమలు చేస్తున్న అభివృద్ధి సంక్షేమ పథకాలు అందడం లేదని వీటిని గిరిజనులకు సక్రమంగా అందేలా చేయడంతో పాటు గిరిజనులకు రక్షణగా ఉండటం కోసమే మన్యంలో ఏఓపీలు (ఆర్మ్‌డ్‌ ఔట్‌ పోస్టులు) ఏర్పాటు చేస్తున్నట్టు చింతపల్లి డీఎస్పీ ఆర్‌.రాఘవేంధ్ర తెలిపారు. శుక్రవారం ఆయన చింతపల్లిలో విలేకరులతో మాట్లాడారు. బలపం పంచాయతీ అభివృద్ధికి

నోచుకోలేదని, మావోయిస్టులు వారి కార్యక్రలాపాలను కొనసాగించేందుకు అమాయక గిరిజనులను అడ్డు పెట్టుకుంటున్నారన్నారు. రహదారులు లేకపోవడంతో బలపం పంచాయతీలోని చాలా గ్రామాలు దయనీయ స్థితిలో ఉండిపోయాయన్నారు. విద్య, వైద్యం తాగుసాగు నీరు వంటి కనీస మౌలిక వసతులకు వారు నోచుకోవడంలేదన్నారు. ఇక్కడ గిరిజనులంతా అభివృద్థిని కోరుకుంటున్నా అభివృద్థి నిరోధకులుగా మావోయిస్టులు మారి గిరిజనుల జీవితాలతో ఆటలాడుకుంటున్నారన్నారు. ముఖ్యంగా బలపం పంచాయతీ ముఖద్వారమైన రాళ్లగెడ్డ ప్రాంతంలో పోలీస్‌ ఔట్‌ పోస్టు ఏర్పాటు వల్ల గిరిజనులకు రక్షణగా ఉంటుందన్నారు. ముఖ్యంగా మావోయిస్టుల కారణంగా అభద్రతా భావంతో జీవించాల్సిన అవసరం ఉండదన్నారు. పోలీసులు విధులు నిర్వహించడం వల్ల అక్కడ గ్రామాలకు వివిధ ప్రభుత్వ శాఖల అధికారులూ స్వేచ్ఛగా వెళ్లి విధులు నిర్వహించే అవకాశం ఉంటుందన్నారు. బలపం పంచాయతీని దత్తత తీసుకున్న తమ జిల్లా ఎస్పీ మూలకొత్తూరు వరకూ రూ. నాలుగు కోట్ల వ్యయంతో తారు రోడ్డు వేయించగలిగారన్నారు. ఇదే క్రమంలో రానున్న రోజుల్లో బలపం పంచాయతీలోని అన్ని గ్రామాలకూ తారు రోడ్డు సదుపాయం కల్పించే అవకాశం ఉంటుందన్నారు. రహదారుల నిర్మాణం పూర్తయితే చాలా వరకూ గిరిజనులకు అన్ని వసతులు మెరుగుపడతాయన్నారు. రాళ్లగెడ్డలో పోలీస్‌ ఔట్‌పోస్టు నిర్మాణానికి తాము గిరిజనుల భూములను బలవంతంగా సేకరించామన్న ఆరోపణల్లో నిజంలేదన్నారు. తాము గిరిజనులు వదిలేసిన పోడు భూమిలోనే వీటి నిర్మాణం చేపడుతున్నట్లు డీఎస్పీ తెలిపారు. తమ మనుగడ ప్రశ్నార్థకంగా మారుతుందని భావించిన మావోయిస్టులు వారి సానుభూతిపరులతో ఒత్తిడి తీసుకొస్తున్నారని, తమపై ఆరోపణలు చేస్తున్నారని డీఎస్పీ వెల్లడించారు.



ఎలమంచిలిలో నెమళ్ల దహనం
ఎలమంచిలి, న్యూస్‌టుడే: రాంబిల్లి మండలంలోని అప్పన్నపాలెంలో కలుషిత నీరు తాగి మృత్యువాతపడిన ఐదు నెమళ్లను శుక్రవారం తెల్లవారుజామున ఎలమంచిలిలో అటవీశాఖ అధికారులు దహనపర్చారు. అప్పన్నపాలెంలో వరుసగా నెమళ్లు చనిపోవడంతో అటవీ శాఖ అధికారులు గురువారం వీటికి రాంబిల్లి మండలం దిమిలిలో శవపరీక్ష నిర్వహించారు. మృతదేహాలను ఎలమంచిలి తీసుకొచ్చిన అధికారులు పాతి పెట్టాల్సింది పోయి బైపాస్‌ రోడ్డులోని టేకు తోటలో కిరోసిన్‌ పోసి నిప్పుపెట్టారు. జాతీయ పక్షిని ఇలా దహనం చేయడం అవమానించడమేనని, వీటిని ఖననం చేయాలని స్థానికులు అభిప్రాయపడుతున్నారు. ఇదే విషయం స్థానిక అటవీ శాఖ అధికారి ఎస్‌.సుదర్శనరావు వద్ద ప్రస్తావించగా ఉన్నతాధికారుల సూచన మేరకే చనిపోయిన వీటిని తగులబెట్టామన్నారు. బాగా కుళ్లిపోయిన వీటిని పాతి పెడితే వ్యాధులు వ్యాప్తించే అవకాశం ఉన్నందున దహనపర్చామన్నారు. దీనిపై లోతుగా దర్యాప్తు జరపాలని స్థానికులు కోరుతున్నారు.


గంజాయి నిరోధానికి కార్యదళం
* కమిషనర్‌కు త్వరలో ప్రతిపాదన
* ఎక్సైజ్‌ ఎఈఎస్‌ నాగేశ్వరరావు
నర్సీపట్నం అర్బన్‌, న్యూస్‌టుడే: గంజాయి సాగు, రవాణాలను అరికట్టేందుకు నర్సీపట్నం కేంద్రంగా ప్రత్యేక కార్యదళం ఏర్పాటు చేయాలని ఎక్సైజ్‌ కమిషనర్‌కు ప్రతిపాదించాలని నిర్ణయించామని అబ్కారీశాఖ సహాయ పర్యవేక్షకులు వి.నాగేశ్వరరావు తెలిపారు. శుక్రవారం ఆయన నర్సీపట్నంలో తనను కలిసిన విలేకరులతో మాట్లాడుతూ ఇటీవల కాలంలో గంజాయి రవాణా అధికం కావడం గుర్తించామన్నారు. నర్సీపట్నం ఎక్సైజ్‌ స్టేషన్‌లో గంజాయి మాయమైందని వచ్చిన ఆరోపణలపై జిల్లా అధికారులు విచారణ నిర్వహిస్తున్నారని ఒక ప్రశ్నకు సమాధానంగా తెలిపారు. నర్సీపట్నం ఎక్సైజ్‌ సర్కిల్‌ పరిధిలో 100 మంది సారా తయారీ, విక్రయదారులను గుర్తించామన్నారు. వీరిని మూడు కేటగిరీలుగా విభజించామని తెలిపారు. అన్నిశాఖల అధికారులతో కలిసి మొదట వీరందరికీ కౌన్సెలింగ్‌ నిర్వహిస్తున్నామని, సత్ప్రవర్తన కలిగి ఉంటామని ఒక్కొక్కరి నుంచి రూ. 50 వేలకు పూచీకత్తు తీసుకుంటున్నామని వెల్లడించారు. ఏడాదిపాటు వీరి ప్రవర్తన గమనిస్తామని చెప్పారు. ఈ లోగా ఎవరైనా తప్పుచేస్తే రూ. 50 వేలు రాబట్టి ప్రభుత్వపరం చేస్తామని తెలిపారు. సారా తయారీకి సహకరిస్తున్నారని అనుమానమున్న నల్లబెల్లం వ్యాపారులు, అమోనియా వ్యాపారులపైనా పూచీ తీసుకుంటామని వివరించారు. నర్సీపట్నం పురపాలక సంఘంలో ఉపాధిహామీ పథకం అమల్లో లేనందున సారా తయారీదారులకు ప్రత్యామ్నాయం చూపాల్సిన అవసరం కలెక్టర్‌ దృష్టికి తీసుకువెళతామని తెలిపారు. కల్లుగీత కార్మికులందరికీ గుర్తింపు కార్డులు ఇస్తామని, యాభైఏళ్లు దాటిన కార్మికులకు ప్రభుత్వం పింఛన్లు ఇస్తుందని ఆయన వివరించారు.


రూ. 50కే తట్ట టమోటా
* దిగజారిన ధరలు
* ఒడిశా నుంచి వారపు సంతలకు తరలింపు
పాడేరు, న్యూస్‌టుడే: మన్యంలో ఈ ఏడాది టమోటా అధికంగా దిగుబడి ఉండటంతో ధరలు అమాంత దిగజారాయి. దీంతో ఆరుగాలం కష్టపడి పంట పండించిన రైతుకు శ్రమకు తగ్గ ఫలితం దక్కని దయనీయ స్థితి నెలకొంది. ఒకప్పుడు టమోటాతో మంచి లాభాలు గడించిన రైతులు ఇప్పుడు కనీస పెట్టుబడులు రాక దిగాలు చెందుతున్నారు. దీనికి తోడు ఒడిశా సరిహద్దు ప్రాంతాల నుంచి ఇబ్బడిముబ్బడిగా వారపుసంతలకు టమోటా తరలిరావడంతో వారి నుంచి స్థానిక రైతులకు తీవ్ర పోటీ ఎదురవుతోంది. ఈ కారణంగా ఆశించిన స్థాయిలో టమోటా విక్రయాలు జరగకపోవడంతో రైతు నిరాశతో తెచ్చిన సరకును వెనక్కి తీసుకెళ్లాల్సిన పరిస్థితి ఏర్పడింది.

గత ఏడాది టమోటా అరకొరగా పండిన నేపథ్యంలో మార్కెట్‌లో మంచి ధరలు పలికాయి. అప్పట్లో కిలో టమోటా రూ. 60 నుంచి రూ. 70 ధర పలకడంతో రైతులు మంచి లాభాలను మూటకట్టుకున్నారు. గత అనుభవాలను వూహించిన రైతులు ఈ సారి విస్తారంగా టమోటా పండించారు. వాతావరణ పరిస్థితులన్నీ అనుకూలించడంతో ఈసారి వూహకు అందని రీతిలో దిగుబడి పెరిగింది. అందుకు తగ్గట్టు మార్కెట్‌ లేక ధరలు తగ్గుముఖం పట్టాయి. దీంతో గత ఏడాది తట్ట రూ. 250 నుంచి రూ. 300 వరకూ పలకగా ఈసారి రూ. 50లకే పరిమితం అయ్యింది. ఒడిశాలో ధరలు మరీ దారుణంగా పడిపోవడంతో అక్కడి రైతులంతా సరిహద్దులు దాటి ఆంధ్ర వారపు సంతలకు తరలివస్తున్నారు. ఈ కారణంగా ధరలు మరింత పతనమవుతున్నాయి.

ఒడిశాలో ధరలు మరింత పతనం
ఒడిశా ప్రాంతంలో పాడువ, సిమిలిగూడ ప్రాంతాల్లో టమాటా ధరలు మరీ దారుణంగా పడిపోయాయి. అక్కడ అమ్మితే సుఖం లేదని ఆంధ్ర సరిహద్దు ప్రాంతాలకు సరకు తీసుకొస్తున్నాం. ఇక్కడ కూడా ఆశించిన స్థాయిలో ధరలు లేకపోవడం నిరాశకు గురిచేసింది.

- ప్రపూల్‌, తుంబకోట, ఒడిశా రాష్ట్రం

ధరలు దిగజారాయి
మా గ్రామంలో రైతులమంతా ఈ ఏడాది టమోటాకు ఉన్న డిమాండును బట్టి విస్తారంగా పండించాం. వూహకు అందని రీతిలో ధరలు పడిపోవడంతో నష్టాలను చవిచూస్తున్నాం. గతంలో ఒక్క తట్ట రూ. 300 వరకూ విక్రయించాం ఇప్పుడు ఇదే తట్ట రూ. 50కు కూడా వెళ్లడం లేదు.

- దామోదర్‌, కండ్రుం, డుంబ్రిగుడ మండలం


నాడు చుట్టూ పొలాలు.. నేడు అపురూప చిత్రాలు
* డీఆర్‌డీఓ రాకతో మారిన లూలూరు చిత్రం
బుచ్చెయ్యపేట, న్యూస్‌టుడే: రక్షణ రంగ పరిశోధన అభివృద్ధి సంస్థ (డీఆర్‌డీఓ) ఏర్పాటుతో లూలూరు చిత్రమే మారిపోయింది. లోపూడి శివారు లూలూరు దగ్గర డీఆర్‌డీఓ కేంద్రాన్ని ఏర్పాటు చేశారు. ఇక్కడ 2010 నుంచి జరుగుతున్న పనులు దాదాపుగా పూర్తయ్యాయి. ఇది రాకముందు ఆ ప్రాంతమంతా చుట్టూ పొలాలు, చెట్లు, చేమలతో నిండి ఉండేది. రైతులు పొలాల్లోకి వెళ్లడానికి కనీసం దారీ తెన్నూ ఉండేది కాదు. ఒకరకంగా చెప్పాలంటే చిట్టడవిని తలపించేది. అలాంటిది నేడు ఎవరూ పోల్చుకోలేని విధంగా పూర్తిగా రూపురేఖలు మారిపోయాయి. విశాలమైన రోడ్లు, అందమైన భవంతులతో అపురూపంగా కనిపిస్తుంది. ఆకర్షణీయ నగరాన్ని తలిపిస్తుంది.


మహిళల ఆత్మగౌరవాన్ని దెబ్బతీసే విధంగా తెదేపా పాలన
ఎమ్మెల్యే రోజా ఆరోపణ
రోలుగుంట (న్యూస్‌టుడే): తనపై తెలుగుదేశం ప్రభుత్వం చేస్తున్న తాటాకు చప్పుళ్లకు భయపడనని, రాష్ట్రంలోని మహిళల ఆత్మగౌరవం కోసం తాను చేస్తున్న ఉద్యమాన్ని ఆపేదిలేదని వైకాపా ఎమ్మెల్యే రోజా స్పష్టం చేశారు. రోలుగుంటలో శుక్రవారం గౌరీపరమేశ్వరుల ఉత్సవాలకు ఆమె హాజరయ్యారు. ఈ సందర్భంగా విలేఖరుల సమావేశంలో రోజా మాట్లాడుతూ చంద్రబాబు పాలనపై తీవ్రస్థాయిలో ధ్వజమెత్తారు. ముఖ్యమంత్రి ఎన్నికల హామీలను అమలు చేయకపోవడంతో పాటు మహిళల ఆత్మగౌరవాన్ని దెబ్బతీసే విధంగా పాలన చేస్తున్నారని మండిపడ్డారు. ప్రధానంగా మహిళలు, రైతుల రుణమాఫీ విషయంలో నమ్మించి మోసం చేశారని విమర్శించారు. రాష్ట్రంలో కుల రాజకీయాలకు పాల్పతున్నారని ఆరోపించారు. ఎన్నికలకు ముందు బీసీల అబివృద్ధికి ఏటా వెయ్యి కోట్ల రుపాయలను కేటాయిస్తామని ఎన్నికలకు ముందు హామీఇచ్చి విస్మరించారన్నారు. తెలంగాణాలో జంట నగరాలు తనవల్లే అభివృద్ధి చెందాయంటూ అసత్య ప్రచారాలను ప్రజలు నమ్మలేదన్నారు. ఇందుకు గ్రేటరు హైదరాబాద్‌ ఎన్నికల ఫలితాలే నిదర్శమని ఎద్దేవా చేశారు. విశాఖ జిల్లా పాయకరావుపేట ఎమ్మెల్యేపై తనకు ఎలాంటి వ్యక్తిగత కక్షలేమీలేవని ఆమె స్పష్టం చేశారు. ఈ విషయంలో చంద్రబాబు కావాలనే కుల రాజకీయాలు చేస్తున్నారని ఎమ్మెల్యే రోజా పేర్కొన్నారు. తనపై కేసులు పెట్టే ఆమె ఇప్పటికైనా చంద్రబాబు నిజ స్వరూపాన్ని గమనించాలని కోరారు. తాను తెలుగుదేశం పార్టీలో సుమారు పదేళ్లపాటు కొనసాగానని ఆపార్టీ నాయకుల గురించి తనకు పూర్తిగా తెలుసునని రోజా స్పష్టం చేశారు. ఇలాంటి వాటిపై ఆత్మ పరిశీలన చేసుకోకుండా తమ పార్టీ నాయకుడు జగన్‌పై ఆరోపణుల చేయడం తగదన్నారు. చోడవరం మాజీ ఎమ్మెల్యే కరణం ధర్మశ్రీ, రోలుగుంట సర్పంచి పోతల రమణమ్మ, నాయకులు పి.రామారావు, పోతల శ్రీనువాసరావు, యర్రంశెట్టి రాజారావు తదితరులు పాల్గొన్నారు.


జికాపై అప్రమత్తం
* విమానాశ్రయం, పోర్టుల్లో ప్రత్యేక కేంద్రాలు
జిల్లాపరిషత్తు, న్యూస్‌టుడే: జికా వైరస్‌.. ప్రపంచాన్ని భయపెడుతున్న కొత్త వ్యాధి. దీన్నిపై ఇప్పటికే ప్రపంచ ఆరోగ్య సంస్థ (డబ్ల్యూహెచ్‌ఓ) ఫిబ్రవరి 1 నుంచి పబ్లిక్‌ హెల్త్‌ ఎమర్జన్సీని ప్రకటించింది. దీంతో నగరంలో చేపట్టే అ.నౌ.స. విన్యాసాలకు ప్రపంచ దేశాల నుంచి హాజరయ్యే సభ్యులను దృష్టిలో పెట్టుకుని జిల్లా యంత్రాంగం అప్రమత్తమైంది. విమానాశ్రయం, పోర్టులలో ప్రత్యేక వైద్య సేవా కేంద్రాలు ఏర్పాటు చేసినట్లు జిల్లా వైద్యారోగ్య శాఖాధికారిణి జొన్నలగడ్డ సరోజని తెలిపారు. డబ్ల్యూహెచ్‌ఓ లెక్కల ప్రకారం 22 దేశాల్లో ఈ వ్యాధి ప్రభావం ఉన్నట్లు ఆమె పేర్కొన్నారు. ఈ వ్యాధికారక దోమలు కుడితే తొలుత జ్వరము, దద్దుర్లు, కీళ్ల నొప్పులు, కళ్లకలకలు, తలనొప్పి వంటి లక్షణాలు ఉంటాయని తెలిపారు. ఇటువంటి లక్షణాలు గుర్తించినట్లైతే వెంటనే సమీపంలోని పీహెచ్‌సీ, ఆరోగ్య సహాయ కేంద్రాల్లో తనిఖీలు చేయించుకోవాలని కోరారు. ప్రస్తుతానికి ఈ వ్యాధికి ఎటువంటి నివారణ టీకాలు లేవని, తగిన విశ్రాంతి తీసుకుని, ఎసిటమినోసెఫ్‌ సి, టైలోనాల్‌ (ఆర్‌) వంటి మందులు వాడాలని సూచించారు. ఆస్ప్రిన్‌, నాన్‌స్టెరాయిడ్‌, యాంటీ ఇన్‌ఫ్లమేటరీ వంటి మందులు వాడకూడదని స్పష్టం చేశారు. ఈ వ్యాధి దోమలు, కలుషిత రక్తం, వ్యాధిగ్రస్తులతో లైంగిక సంబంధాల ద్వారా వ్యాప్తి చెందుతుందని ఆమె హెచ్చరించారు. ప్రజలు అప్రమత్తంగా ఉండాలని కోరారు.


అప్పన్నను దర్శించిన ప్రముఖులు
సింహాచలం, న్యూస్‌టుడే: సింహాద్రినాథుడిని శుక్రవారం పలువురు ప్రముఖులు దర్శించుకున్నారు. రాష్ట్ర హోం మంత్రి చినరాజప్ప సతీమణి అనురాధ, ఇంటెలిజెన్స్‌ ఐజీ చంద్రశేఖర్‌, నెల్కో సంస్థ సంయుక్త సంచాలకుడు ఆర్‌.ఎన్‌.లంకా, శిక్షణ ఐఏఎస్‌ అధికారులు అంకిత ఆనంద్‌, చారుశ్రీ, అరవింద్‌ సింగ్‌, స్మృతిరాజన్‌ మహాపాత్రో, మధుసూదన్‌, తదితరులు స్వామిని దర్శించుకున్నారు. అతిథులందరికీ అధికారులు స్వాగతం పలికారు. వారంతా కప్పస్తంభం ఆలింగనం చేసుకుని బేడామండపం ప్రదక్షిణం చేశారు. అంతరాలయంలో స్వామికి ప్రత్యేక పూజలు నిర్వహించారు. పండితులు వేదమంత్రాలతో ఆశీర్వదించారు.


దూరవిద్యలో డిగ్రీ ప్రవేశాలకు దరఖాస్తుల ఆహ్వానం
మద్దిలపాలెం, న్యూస్‌టుడే: డాక్టర్‌ వి.ఎస్‌.కృష్ణ ప్రభుత్వ డిగ్రీ కళాశాలలోని అంబేడ్కర్‌ దూరవిద్య అధ్యయన కేంద్రంలో 2015-16 విద్యా సంవత్సరానికి సంబంధించి ఎటువంటి విద్యార్హతలు లేకుండా డిగ్రీ ప్రవేశాలకు దరఖాస్తులు కోరుతున్నట్లు అధ్యయన కేంద్రం సమన్వయాధికారి టి.రాధాకృష్ణ తెలిపారు. ఆసక్తిగల 18 సంవత్సరాల వయసు దాటిన వారు అర్హులన్నారు. ప్రవేశాలకు ఆన్‌లైన్‌లో దరఖాస్తులు అందజేయాలని కోరారు. రూ. 210 పరీక్ష ఫీజు చెల్లించాల్సి ఉంటుందన్నారు. మార్చి 15వ తేదీ వరకు దరఖాస్తులు అందజేయవచ్చన్నారు. రూ. 100 అపరాధ రుసుముతో మార్చి 31 వరకు గడువు ఉందన్నారు. అర్హత పరీక్ష ఏప్రిల్‌ 17న ఉదయం 10 గంటలకు కృష్ణ డిగ్రీ కళాశాల ఆవరణలో నిర్వహిస్తున్నట్లు పేర్కొన్నారు. వివరాలకు 0891-2536673 ఫోన్‌ నంబరులో సంప్రదించాలని కోరారు.


జూ పార్కులో సైకిల్‌ సవారీ ప్రారంభం
ఆరిలోవ, న్యూస్‌టుడే: నగరంలోని ఇందిరాగాంధీ జంతు ప్రదర్శన శాలలో సైకిల్‌ సవారీ శుక్రవారం నుంచి ప్రారంభమైంది. నగరంలోని జె.సి.ఐ. అనే సంస్థ మూడు సైకిళ్లను ఇక్కడ కేటాయించింది. ఆసక్తిగల సందర్శకులు గంటకు రూ. 30 చెల్లించి జూ పార్కులో సైకిల్‌పై తిరుగుతూ జంతువులను చూడవచ్చు. జూ పార్కులో కాలుష్యం తగ్గించడానికి వీలుగా వీటిని ప్రవేశపెట్టినట్లు క్యూరేటర్‌ విజయ్‌కుమార్‌ తెలిపారు. ప్లాస్టిక్‌ నిరోధానికి కూడా చర్యలు తీసుకుంటున్నామని, ప్లాస్టిక్‌ సీసాలు తీసుకువెళ్లేటప్పుడు ప్రవేశ ద్వారం వద్ద రూ. 10 డిపాజిట్‌ చేసి, తిరిగి వచ్చేటప్పుడు సీసాలను కూడా తీసుకువస్తే రూ. 10 తిరిగి ఇస్తున్నామన్నారు. కాగితం సంచులు ప్రవేశపెట్టే ఆలోచన ఉందన్నారు. వృద్ధులు, వికలాంగుల కోసం రెండు మూడు చక్రాల సైకిళ్లు కొనుగోలు చేయనున్నట్లు చెప్పారు.


వేతనాల్లో హెచ్చతగ్గులు ఎందుకో..?
ఆరిలోవ, న్యూస్‌టుడే: అటవీశాఖ ఆధ్వర్యంలోని కంబాలకొండ నేచర్‌ పార్కులో పనిచేస్తున్న ఉద్యోగుల పట్ల అధికారులు వివక్ష చూపిస్తున్నారంటూ ఆరోపణలు వినిపిస్తున్నాయి. వికలాంగులు, మహిళలనే భేదం చూపిస్తూ రోజువారి వేతనంలో కోత విధించారని చెబుతున్నారు. రూ. 180 ఉన్న రోజువారి వేతనాన్ని ఇటీవలే రూ. 220కు పెంచారు. మహిళలు, వికలాంగులకు మాత్రం రూ. 190 చేశారు. వికలాంగులు, మహిళలు మిగిలిన వారికన్నా తక్కువ పనిచేస్తారన్న ఉద్దేశంతో అధికారులు ఈ తేడా చూపిస్తున్నారన్న ఆరోపణలు ఉన్నాయి. ఇలాంటి తేడా చూపించాలనే నిబంధన ఎక్కడా లేదని అటవీశాఖలోనే కొందరు అధికారులు పేర్కొంటున్నారు. దిద్దుబాటు చర్యలు తీసుకోకపోతే కొత్త సమస్యలు ఉత్పన్నమయ్యే అవకాశాలు కనిపిస్తున్నాయి.


రెండు గంటల్లో క్షయ వ్యాధి నిర్ధరణ
న్యూస్‌టుడే-పెదవాల్తేరు
క్షయ వ్యాధి సోకినా తెలుసుకోలేక ఇతర శారీరక రుగ్మతలుగా భావించి బాధపడుతున్న వారికి శుభవార్త. క్షయ వ్యాధిని త్వరగా గుర్తించేందుకు అధునాతన సాంకేతిక పరిజ్ఞానం అందుబాటులోకి వచ్చింది. గతంలో కనీసం రెండు నెలలపాటు కళ్లె పరీక్షలు చేస్తేనేగానీ నిర్ధరించడం సాధ్యమయ్యేదికాదు. ప్రస్తుతం అధునాతన సాంకేతిక పరిజ్ఞానం ద్వారా రెండు గంటల్లో క్షయ, మొండి క్షయను గుర్తించే విధంగా అధునాతన పరికరం అందుబాటులో వచ్చిందని జిల్లా క్షయ వ్యాధి నిర్మూలన అధికారి డాక్టర్‌ ఎన్‌.వసుంధర తెలిపారు. ‘జీన్‌ ఎక్స్‌పర్ట్‌’ పరికరం ద్వారా రెండు గంటల్లో క్షయ వ్యాధిని గుర్తించగలమన్నారు. ఈ పరికరాన్ని కేంద్ర ప్రభుత్వం మంజూరు చేసిందన్నారు. ఆసుపత్రిలోని అంటు వ్యాధుల విభాగంలో ఈ పరికరాన్ని ఏర్పాటు చేశామన్నారు.

పరికరంతో ఉపయోగాలు...
ప్రధానంగా క్షయ వ్యాధి చిన్నపిల్లల్లో వస్తే గుర్తించడం కష్టమయ్యేది. ఈ పరికరం ద్వారా చిన్నపిల్లల్లో వ్యాధిని సునాయాసంగా గుర్తించవచ్చు. పెద్దవారిలో వూపిరితిత్తులతోపాటు ఇతర అవయవాల్లో వ్యాధి నిర్ధరణ, హెచ్‌.ఐ.వి పాజిటివ్‌ ఉన్న వారికి కూడా క్షయ వ్యాధి ఉందా లేదా అనే విషయాన్ని సులువుగా గుర్తించవచ్చు.

రోగులకు రవాణా ఖర్చులు
గిరిజన ప్రాంతాల్లో వారికి క్షయ వ్యాధి సోకితే నెలకు రూ. 200 విలువ గల ఆహారం అందజేస్తామని డాక్టర్‌ వసుంధర తెలిపారు. జిల్లా కలెక్టర్‌ ఆధ్వర్యంలో ఈ కార్యక్రమం చేపట్టామన్నారు. జిల్లాలో ఎక్కడినుంచైనా క్షయ వ్యాధితో ఆసుపత్రిలో చేరిన వారికి బస్సు, ఆటో ఖర్చులు అందజేస్తున్నట్లు తెలిపారు. రోగితోపాటు రోగి బంధువులకు కూడా రవాణా ఖర్చులు అందజేస్తామన్నారు. కొంత మంది క్షయ వ్యాధి ఉందని తెలిసినా డబ్బుల్లేక ఆసుపత్రికి రావడానికి ఆలస్యం చేస్తారని, అలాంటి వారి కోసం రానుపోను ఛార్జీలు అందజేస్తున్నట్లు తెలిపారు. స్థానికులకు ఆటో ఛార్జీలు ఇస్తామన్నారు.

ఫోన్‌ ద్వారా సమాచారం
క్షయ వ్యాధి సోకిన వ్యక్తి ఆసుపత్రికి ఎప్పుడు రావాలి? వారికి చేసిన పరీక్షల ఫలితం పాజిటివా? నెగిటివా? అనే విషయాన్ని సెల్‌ఫోన్‌లో ఎస్‌.ఎం.ఎస్‌, వాయిస్‌ ద్వారా తెలియపరిచే పద్ధతి ప్రవేశ పెట్టినట్లు డాక్టరు వసుంధర తెలిపారు. రోగులకు ఫోన్‌ ద్వారా గుర్తు చేసి మందులు సక్రమంగా వాడేలా ఈ విధానం ఉపయోగపడుతుందన్నారు.



దేశంలో తొలి 20 స్థానాల్లో విశాఖ సహకార బ్యాంక్‌
* ఛైర్మన్‌ చలసాని రాఘవేంద్రరావు
ఎం.వి.పి. కాలనీ, న్యూస్‌టుడే: దేశంలోని సహకార బ్యాంకుల్లో మొదటి 20 స్థానాల్లో నిలుస్తూ విశాఖ సహకార బ్యాంకు ప్రగతిపథంలో దూసుకుపోతోందని బ్యాంకు ఛైౖర్మన్‌ చలసాని రాఘవేంద్రరావు అన్నారు. శుక్రవారం ఉదయం ఎంవీపీ కాలనీలో విశాఖ కో ఆపరేటివ్‌ బ్యాంకు ఎంవీపీ కాలనీ శాఖను ఆర్‌.బి.ఐ. ప్రాంతీయ సంచాలకుడు ఆర్‌.ఎన్‌.దాసు ప్రారంభించారు. ఈ సందర్భంగా ఛైర్మన్‌ రాఘవేంద్రరావు విలేకరులతో మాట్లాడుతూ దేశంలో 1579 అర్బన్‌ సహకార బ్యాంకులు ఉన్నాయన్నారు. తమ బ్యాంకులో డిపాజిట్లు రూ. 2208 కోట్లు ఉండగా, రూ. 1442 కోట్ల మేర రుణాలు ఇచ్చామని, రూ. 135 కోట్ల షేర్‌ ధనం ఉందన్నారు. గత ఆర్థిక సంవత్సరంలో రూ. 23 కోట్ల లాభం వచ్చిందన్నారు. బ్యాంకు సభ్యులకు 15 శాతం డివిడెండ్లు చెల్లించామన్నారు. హైదరాబాద్‌తోసహా 11 జిల్లాల్లో శాఖలు ఉన్నాయని, త్వరలో గుంటూరు, కర్నూలు, కడప, అనంతపురం జిల్లాల్లో శాఖలు తెరవనున్నామన్నారు. త్వరలోనే ఎ.టి.ఎం. సేవలను అందుబాటులోకి తీసుకువస్తామన్నారు. సహకార బ్యాంకులకు ఆదాయ పన్ను మినహాయింపు ఇవ్వాలని డిమాండ్‌ చేశారు. వినియోగదారులకు నాణ్యమైన సేవలందించేందుకు కృషి చేస్తున్నామన్నారు. సి.ఈ.ఒ. మూర్తి, కార్యదర్శి పి.వి.నర్సింహమూర్తి, డైరెక్టర్లు పార్వతిదేవి, పద్మావతి, స్టాలిన్‌, జగ్గారావు, ఉపాధ్యక్షులు రాఘవరావు, బాబూరావు, ఆదినారాయణమూర్తి తదితరులు పాల్గొన్నారు.


ఆర్బిట్రేషన్‌ సెంటర్‌ ఏర్పాటు చేయండి
* నేషనల్‌ మారిటైమ్‌ ఫౌండేషన్‌ డైరెక్టర్‌ డాక్టర్‌ విజయ్‌షకూజా
సాగర్‌నగర్‌, న్యూస్‌టుడే: గీతం విశ్వవిద్యాలయం కేంద్రంగా ‘మారీటైమ్‌ ఆర్బిట్రేషన్‌’ సెంటర్‌ ఏర్పాటు చేయాలని నేషనల్‌ మారిటైమ్‌ ఫౌండేషన్‌ డైరెక్టర్‌ డాక్టర్‌ విజయ్‌షకూజా సూచించారు. సముద్ర సంబంధ వాణిజ్య, సరిహద్దు వివాదాలు, నౌకాయానంలో న్యాయపరమైన అంశాల పరిష్కారానికి సింగపూర్‌, మలేసియా తదితర దేశాల్లోని మారిటైౖమ్‌ ఆర్బిట్రేషన్‌ సెంటర్ల తరహాలో తూర్పు తీరం విశాఖలో గల గీతం కేంద్రంగా ఏర్పాటు చేయాలన్నారు. గీతం న్యాయ విద్యా విభాగాన్ని శుక్రవారం ఆయన సందర్శించారు. సముద్ర నేరాలు, చట్టాలు తదితర ముఖ్యాంశాలను విద్యార్థులకు వివరించారు. సముద్రయాన రంగం (ఆసియా ఉపఖండం)లో సరిహద్దు వివాదాల పరిష్కారానికి మారిటైమ్‌ ఆర్బిట్రేషన్‌ కేంద్ర బిందువుగా ఉందన్నారు. గీతం న్యాయ కళాశాల విద్యార్థులకు మారిటైమ్‌ ఆర్బిట్రేషన్‌ చట్టాలపై ఇంటర్న్‌షిప్‌ ప్రాజెక్టులను కేటాయించడానికి సంసిద్ధత వ్యక్తం చేశారు. గీతం సంబంధిత విభాగం సంచాలకుడు ఆచార్య వై.సత్యనారాయణ, ఫౌండేషన్‌ ప్రాంతీయ సంచాలకులు జి.పద్మజ తదితరులు పాల్గొన్నారు.


ఐ.టి.ఐ. అభ్యర్థులకు పాలిటెక్నిక్‌లో ప్రవేశాలు
కంచరపాలెం, న్యూస్‌టుడే: రెండేళ్ల ఐ.టి.ఐ. ఉత్తీర్ణులైన అభ్యర్థులు పాలిటెక్నిక్‌ కళాశాలల్లో రెండో ఏడాదిలో నేరుగా ప్రవేశం పొందవచ్చని ఐటీఐల డిప్యూటీ డైరెక్టరు ఎం.గురునాధేశ్వరరావు తెలిపారు. అన్ని ప్రభుత్వ, కొన్ని ప్రయివేటు ఐ.టి.ఐ.ల అభ్యర్థులు ఈ అవకాశాన్ని సద్వినియోగం చేసుకోవాలన్నారు. ఇందుకోసం ఈనెల 25 నుంచి మార్చి 24 వరకు బ్రిడ్జి కోర్సు నిర్వహించనున్నామన్నారు. ఇందులో అభ్యర్థులకు శిక్షణ ఇస్తామన్నారు. అనంతరం వారికి ప్రాక్టికల్స్‌ ఉంటాయన్నారు. మార్చి 25 నుంచి 27 వరకు ప్రాక్టికల్‌ పరీక్ష ఉంటుందన్నారు. అందులో ఉత్తీర్ణులైన అభ్యర్థులకు ఏప్రిల్‌ 20న రాత పరీక్ష ఉంటుందన్నారు. అందులో ఉత్తీర్ణత పొందితే పాలిటెక్నిక్‌లో సీటు లభిస్తుందన్నారు. గతంలో బ్రిడ్జ్‌ కోర్సు పూర్తి చేయని వారు, 2015లో ఐ.టి.ఐ. ఉత్తీర్ణులైన అభ్యర్థులు కూడా ఈ అవకాశాన్ని వినియోగించుకోవచ్చన్నారు.


‘గాంధీ శిల్పబజార్‌’ మైమరపిస్తోంది
అపురూప కళాఖండాలు, వస్తువులతో ఆకర్షణ
కొమ్మాది, న్యూస్‌టుడే: ఒకటా రెండా.. లోపలకు అడుగుపెడితే కళ్లు జిగేల్‌మంటున్నాయి. ప్రతి వస్తువు అపూరూపంగానే దర్శనమిస్తోంది. చూసిన ప్రతిదీ కొనేయాలనిపిస్తుంది. దేశంలోని 15 రాష్ట్రాలకు చెందిన ఎన్నో అపురూప కళాఖండాలు, చేనేత వస్త్రాలు, హస్తకళలు, వైవిధ్యమైన వస్తు సముదాయాలకు ‘గాంధీ శిల్పబజార్‌’ వేదికైంది. శుక్రవారం మధురవాడ శిల్పారామం (జాతర)లో కేంద్రజౌళి మంత్రిత్వ శాఖ, హస్తకళల అభివృద్ధి కమీషనర్‌ కార్యాలయ సహకారంతో ఏర్పాటుచేసిన ఈ బజార్‌ వ్యాపారులకు, సందర్శకులకు వేదికగా నిలుస్తోంది.

ఈ నెల 14 వరకు జాతర ప్రాంగణంలో జరిగే ఈ బజార్‌లో దేశంలోనే వివిధ రాష్ట్రాలకు చెందిన 100కు పైగా స్టాళ్లను ఏర్పాటుచేసి ఉత్పత్తులను ప్రదర్శిస్తున్నారు. ఈ శిల్పారామంలో తొలిసారి జరుగుతున్న ఇంత పెద్ద మేళాలో హస్తకళలు, చేనేత, పట్టచిత్ర, సిల్వర్‌ఫిలిగ్రి, ముత్యాలనగలు, గ్లాస్‌జ్యూయలరీ, మెటల్‌ ఆర్ట్‌ వర్క్స్‌, లక్కబొమ్మలు, కొండపల్లి బొమ్మలు, గాజులు, డోక్రాకాస్టింగ్స్‌, కలంకారి, టైయ్‌ అండ్‌డై, తంజావూరు చిత్రాలు, ఉలెన్‌కార్పెట్స్‌, స్టోన్‌కార్వింగ్‌, పోటరీ, టెర్రకోట బొమ్మలు, మంగళగిరి చేనేతలు మరెన్నో కళాఖండాలు, వివిధ లోహలతో పౌరాణిక, ఆధ్యాత్మిక, సాంఘిక అంశాలను సంఘటనలను వ్యక్తంచేసే పలుశిల్పాలు కళాకారుల ప్రతిభను చాటుతున్నాయి.

మన సంస్కృతి సంప్రదాయాల ప్రతిరూపాలు కళలు
దేశంలోని కళాకారులను ప్రోత్సాహించుకోవడం ద్వారా మన సంస్కృతిని ప్రోత్సాహించుకోవడమే అవుతుందని ఆ దిశగా గాంధీశిల్పబజార్‌ను విజయవంతం చేయాలని మంత్రి గంటా అధికార ప్రతినిధి పరుచూరి భాస్కర్‌రావు పేర్కొన్నారు. శిల్పారామం(జాతర)లో 14వ తేదీ వరకు జరగనున్న శిల్పబజార్‌ను ఆయన ముఖ్యఅతిథిగా పాల్గొని ప్రారంభించారు. హస్తకళాకారుల ఉత్పత్తులను తిలకించిన ఆయన ఆ కళాకారుల ప్రతిభను ప్రశంసించారు. ఈ కార్యక్రమంలో హాండీక్రాఫ్ట్‌ అసిస్టెంట్‌ డైరెక్టర్‌ టి.మురళీకృష్ణ, హస్తకళల అభివృద్ధి సలహా సదుపాయాల కల్పనాధికారి ఎ.శివరామకృష్ణ, పిఎంయు వి.మధుసూధన్‌రావు, పరిపాలనాధికారి బి.గణేష్‌, 5వ వార్డు తెదేపా అధ్యక్షులు పిళ్ళా నరసింగరావు తదితరులు పాల్గొన్నారు.



ఈఎన్‌సీకి గవర్నర్‌ రాక
సింధియా, న్యూస్‌టుడే: అంతర్జాతీయ యుద్ధనౌకల విన్యాసాల నేపథ్యంలో శుక్రవారం మధ్యాహ్నం రాష్ట్ర గవర్నర్‌ నరసింహన్‌ ఈస్ట్రన్‌ నేవల్‌ కమాండుకు చేరుకున్నారు. సాయంత్రం నేవీ కుటుంబాలకు నిర్వహించిన ప్రత్యేక కార్యక్రమంలో ఆయన పాల్గొన్నారు. అనంతరం ప్రధాని మోదీ, రాష్ట్రపతి ప్రణబ్‌ముఖర్జీలకు స్వాగతం పలికేందుకు విమానాశ్రయానికి బయలుదేరి వెళ్లారు. ఆయన రాకతో ఈఎన్‌సీ పరిసరాల్లో నేవీ, సాధారణ పోలీసులు విస్తృత బందోబస్తు చేపట్టారు.


బుద్ధ ప్రాజెక్టు అద్భుతం: సీఎం చంద్రబాబు
ఎం.వి.పి. కాలనీ, న్యూస్‌టుడే: బుద్ధ ప్రాజెక్టు అద్భుతంగా ఉందని, వుడా చేపట్టబోయే అన్ని ప్రాజెక్టులు ఇదే తరహాలో ఉండాలని రాష్ట్ర ముఖ్యమంత్రి నారా చంద్రబాబునాయుడు అన్నారు. కైలాసగిరి కొండ దిగువన వుడా ఆధ్వర్యంలో హెల్త్‌ ఎరీనాలో నూతనంగా బుద్ధ వనం పేరిట నిర్మించిన నిర్మించిన బుద్ధుడి విగ్రహాన్ని ఆయన శుక్రవారం సాయంత్రం సందర్శించారు. బుద్ధుడి విగ్రహాన్ని జీవకళ ఉట్టిపడేలా అద్భుతంగా నిర్మించారని వుడీ వీసీ బాబూరావునాయుడిని అభినందించారు. హెల్త్‌ ఎరీనాను మరింత అభివృద్ధి చేసేందుకు వాకర్స్‌ను సలహాలు, సూచనలు స్వీకరించాలన్నారు. ఇక్కడ లేజర్‌ షో వంటివి అవసరం ఉండదన్నారు. నగరవాసులు ధ్యానం చేసుకునేందుకు చక్కటి అవకాశం ఇక్కడ ఉందన్నారు. హెల్త్‌ ఎరీనాలో మరింత పచ్చదనం పెంపొందించాలని సూచించారు. తొలుత వుడా వీసీ బాబూరావునాయుడు, హవా గౌరవ అధ్యక్షుడు డాక్టర్‌ వి.పెదసోములు, కార్యదర్శి ఉమామహేశ్వరరావు, లతాదాస్‌ పుష్పగుచ్ఛాలు అందజేసి చంద్రబాబుకు స్వాగతం పలికారు. రాష్ట్ర మంత్రి గంటా శ్రీనివాసరావు, ఏవీసీ రమేష్‌, అధికారులు జయరామిరెడ్డి, విద్యుల్లత, లక్ష్మి తదితరులు పాల్గొన్నారు.


ఇన్‌ఛార్జీ వీసీగా బాధ్యతలు స్వీకరించిన నారాయణ
* పరిపాలనలో మార్పులు ఉండబోవని వెల్లడి
సిరిపురం, న్యూస్‌టుడే: ఆంధ్ర విశ్వవిద్యాయం ఇన్‌ఛార్జి వీసీగా ఆచార్య ఈఏ నారాయణ శుక్రవారం బాధ్యతలు స్వీకరించారు. మధ్యాహ్నం వర్సిటీలోని వీసీ ఛాంబర్‌కు చేరుకొని తొలిఫైలుపై సంతకం పెట్టి అధికారికంగా బాధ్యతలు తీసుకున్నారు. ఏయూ మాజీ వీసీ ఆచార్య జీఎస్‌ఎన్‌ రాజు, రిజిస్ట్రార్‌ ఆచార్య ఉమామహేశ్వరరావు హాజరై బాధ్యతలు అప్పగించారు. ఆంధ్ర విశ్వవిద్యాలయం ఇన్‌ఛార్జీ వీసీగా ఆచార్య నారాయణను నియమిస్తూ రాష్ట్ర ప్రభుత్వం ఉత్తర్వులిచ్చిన విషయం తెలిసిందే. నారాయణ తొలుత వర్సిటీ ప్రాంగణంలోని సీఆర్‌ రెడ్డి, మహాత్మాగాంధీ, బీఆర్‌ అంబేడ్కర్‌ విగ్రహాలకు పూలమాలలు వేశారు. ఆయన మాట్లాడుతూ ఏయూ అభివృద్ధికి శక్తివంచన లేకుండా కృషి చేస్తానన్నారు. అందరి సహకారంతో ముందుకు వెళ్లనున్నట్లు తెలిపారు. 40 ఏళ్లుగా అనుబంధం ఉన్న వర్సిటీకి సేవ చేసే అవకాశం లభించడంపై హర్షం వ్యక్తం చేశారు. అంతర్జాతీయంగా వర్సిటీకి గుర్తింపు తెచ్చే విధంగా ప్రతి ఒక్కరూ సహకరించాలన్నారు. వర్సిటీ పరిపాలన యంత్రాంగంలో ఎలాంటి మార్పులు ఉండబోవన్నారు. తొలుత మాజీ వీసీ ఆచార్య జీఎస్‌ఎన్‌ రాజుతో కలిసి రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు ఇంటికి వెళ్లి కృతజ్ఞతలు తెలిపారు. ఆచార్య నారాయణకు మాజీ వీసీ ఆచార్య జీఎస్‌ఎన్‌ రాజు, రిజిస్ట్రార్‌ ఉమామహేశ్వరరావుతోపాటు వర్సిటీ ఉన్నతాధికారులు, ఆచార్యులు అభినందనలు తెలియజేశారు.


ప్రతీఒక్కరూ వీక్షించేలా పక్కాగా ఏర్పాట్లు
* ఐఎఫ్‌ఆర్‌ నేపథ్యంలో ట్రాఫిక్‌ సమస్యలను అధిగమిస్తాం
* ఏడీజీపీ ఆర్‌పీ ఠాకూర్‌ స్పష్టీకరణ
పూర్ణామార్కెట్‌, న్యూస్‌టుడే: ఐఎఫ్‌ఆర్‌ నేపథ్యంలో విశాఖ నగర వ్యాప్తంగా భద్రతాపరమైన బందోబస్తు, రహదారి రద్దీ నియంత్రణకు పక్కాగా ఏర్పాట్లు చేశామని రాష్ట్ర శాంతిభద్రతల ఏడీజీపీ ఆర్‌పీ ఠాకూర్‌ అన్నారు. శుక్రవారం మధ్యాహ్నం ఆయన విలేకరులతో సమావేశమై మాట్లాడారు. ఈనెల 7న జరిగే అ.నౌ.స.కు ప్రజలంతా వీక్షించే విధంగా జాగ్రత్తలు తీసుకున్నామన్నారు. ప్రధాన వేదిక అయిన ఆర్‌కే బీచ్‌ వద్ద రద్దీని నియంత్రించేందుకు 1.30 లక్షల పాసులను జారీ చేశామని, నగరంలో ఉన్న అన్ని థియేటర్లలోనూ విన్యాసాలను ప్రత్యక్ష ప్రసారం జరుగుతుందన్నారు. అంతే కాకుండా వీవీఐపీ, వీఐపీ, వీదేశీయుల రాకపోకలు సాగించే మార్గాల్లో కట్టుదిట్టమైన భద్రతతో పాటుగా వీవీఐపీ, వీఐపీలు, సాధారణ ప్రజలు రాకపోకలు సాగించే విధంగా 11 కూడళ్లలో ట్రాఫిక్‌ మళ్లింపు చేస్తున్నామని, వీఐపీ వాహనాలకు ఏపీఐఐసీ మైదానం, యోగా గ్రామంలో పార్కింగ్‌ స్థలాలను ఏర్పాటు చేశామన్నారు. అంతే కాకుండా సాధారణ ప్రజలకు మరో నాలుగు ప్రాంతాల్లో పార్కింగ్‌ ప్రదేశాలను ఏర్పాటు చేశామని వివరించారు. వాహనాలకు పాసులు లేకపోతే అనుమతించడం జరగదని, చెకింగ్‌ పాయింట్‌ల వద్ద త్వరితగతిన తనిఖీలు నిర్వహించే విధంగా ఏర్పాట్లు చేశామన్నారు. విన్యాసాలు వీక్షించడానికి వచ్చే ప్రజలకు తప్పనిసరిగా పాసులు ఉండాలని, లేకపోతే కోస్టల్‌ బ్యాటరీ నుంచి లోపలికి అనుమతించమన్నారు. విదేశాల నుంచి వచ్చే అతిథులతో పాటుగా దేశ ముఖ్య అతిథులు, రక్షణ దళాలు, కేంద్ర, రాష్ట్ర మంత్రులతో పాటుగా వివిధ శాఖలకు చెందిన ఉన్నతాధికారులు రాకపోకలు సాగించే ప్రాంతాల్లో నిఘా కట్టుదిట్టం చేస్తున్నామని వివరించారు. అనంతరం రహదారులపై జరిగే ట్రాఫిక్‌ మళ్లింపు, పార్కింగ్‌ ప్రదేశాలతో కూడిన చిత్రపటాన్ని విడుదల చేశారు. కార్యక్రమంలో సీపీ అమిత్‌గార్గ్‌, ట్రాఫిక్‌ ఏడీసీపీ మహేంద్రపాత్రుడు పాల్గొన్నారు. 
Untitled Document
జడ్పీ నుంచి 70 మందికి అ.నౌ.స. ప్రత్యేక విధులు
రాళ్లగెడ్డలో ఉద్రిక్తం
కోరుకొండలో గిరిజనుల ర్యాలీ
గిరిజనుల రక్షణ కోసమే పోలీస్‌ స్టేషన్ల ఏర్పాటు
ఎలమంచిలిలో నెమళ్ల దహనం
గంజాయి నిరోధానికి కార్యదళం
రూ. 50కే తట్ట టమోటా
నాడు చుట్టూ పొలాలు.. నేడు అపురూప చిత్రాలు
మహిళల ఆత్మగౌరవాన్ని దెబ్బతీసే విధంగా తెదేపా పాలన
జికాపై అప్రమత్తం
అప్పన్నను దర్శించిన ప్రముఖులు
దూరవిద్యలో డిగ్రీ ప్రవేశాలకు దరఖాస్తుల ఆహ్వానం
జూ పార్కులో సైకిల్‌ సవారీ ప్రారంభం
వేతనాల్లో హెచ్చతగ్గులు ఎందుకో..?
రెండు గంటల్లో క్షయ వ్యాధి నిర్ధరణ
దేశంలో తొలి 20 స్థానాల్లో విశాఖ సహకార బ్యాంక్‌
ఆర్బిట్రేషన్‌ సెంటర్‌ ఏర్పాటు చేయండి
ఐ.టి.ఐ. అభ్యర్థులకు పాలిటెక్నిక్‌లో ప్రవేశాలు
‘గాంధీ శిల్పబజార్‌’ మైమరపిస్తోంది
ఈఎన్‌సీకి గవర్నర్‌ రాక
బుద్ధ ప్రాజెక్టు అద్భుతం: సీఎం చంద్రబాబు
ఇన్‌ఛార్జీ వీసీగా బాధ్యతలు స్వీకరించిన నారాయణ
ప్రతీఒక్కరూ వీక్షించేలా పక్కాగా ఏర్పాట్లు
 
  తాజా వార్తలు
  ప్రధాన వార్తలు
  ప్రత్యేక కథనాలు
Untitled Document
 
 
Untitled Document
 
 
 
Untitled Document
Copyright © 2015 Ushodaya Enterprises Pvt. Ltd., All Rights Reserved.
For Marketing enquiries contact 9000180611 or Marketing@eenadu.net