Breaking | Feedback | ePratibha | E-PAPER | Pratibha

Super star krishna: ప్రభుత్వలాంఛనాలతో ముగిసిన కృష్ణ అంత్యక్రియలు

దిగ్గజ నటుడు సూపర్‌స్టార్‌ కృష్ణ అంత్యక్రియలు ముగిశాయి. అభిమానుల కన్నీటి వీడ్కోలు మధ్య పద్మాలయ స్టూడియోస్‌ నుంచి మహాప్రస్థానం వరకూ కృష్ణ అంతిమయాత్ర సాగింది. కృష్ణను కడసారి చూసేందుకు ఆయన అభిమానులు మహాప్రస్థానం రహదారికి ఇరువైపులా భారీగా చేరారు. అనంతరం ప్రభుత్వ అధికారిక లాంఛనాలతో కృష్ణ అంత్యక్రియలు నిర్వహించారు.

Updated : 16 Nov 2022 15:46 IST

16/11/2022 15:45(IST)

ప్రభుత్వలాంఛనాలతో ముగిసిన కృష్ణ అంత్యక్రియలు

దిగ్గజ నటుడు సూపర్‌స్టార్‌ కృష్ణ అంత్యక్రియలు ముగిశాయి. ఆస్పత్రిలో చికిత్స పొందుతూ మంగళవారం తెల్లవారుజామున కృష్ణ కన్నుమూయడంతో ఆయన అభిమానులు శోకసంద్రంలో మునిగిపోయారు. అనంతరం సినీ, రాజకీయ ప్రముఖులు కృష్ణ పార్థివదేహాన్ని సందర్శించి నివాళులర్పించారు. మహేశ్‌బాబు కుటుంబాన్ని పరామర్శించారు. ఇక బుధవారం ఉదయం రెండు తెలుగు రాష్ట్రాల్లోని కృష్ణ అభిమానులు పద్మాలయ స్టూడియోకు చేరుకుని కృష్ణ పార్థివదేహం వద్ద పుష్పాంజలి ఘటించారు. అభిమానుల కన్నీటి వీడ్కోలు మధ్య పద్మాలయ స్టూడియోస్‌ నుంచి మహాప్రస్థానం వరకూ కృష్ణ అంతిమయాత్ర సాగింది. కృష్ణను కడసారి చూసేందుకు ఆయన అభిమానులు మహాప్రస్థానం రహదారికి ఇరువైపులా భారీగా చేరారు. అనంతరం ప్రభుత్వ అధికారిక లాంఛనాలతో కృష్ణ అంత్యక్రియలు నిర్వహించారు. మహాప్రస్థానంలోకి కృష్ణ కుటుంబ సభ్యులు, అతికొద్ది మంది ప్రముఖులను మాత్రమే అనుమతించారు.

16/11/2022 14:38(IST)

పద్మాలయ స్టూడియో నుంచి కృష్ణ అంతిమయాత్ర ప్రారంభం

హైదరాబాద్: పద్మాలయ స్టూడియో నుంచి సూపర్‌ స్టార్‌ కృష్ణ అంతిమయాత్ర ప్రారంభమైంది. ప్రభుత్వ అధికారిక లాంఛనాలతో కృష్ణ అంత్యక్రియలు నిర్వహిస్తున్న నేపథ్యంలో కృష్ణ పార్థివదేహం వద్ద పోలీసుల గౌరవ వందనం అనంతరం అంతిమయాత్ర ప్రారంభమైంది. పద్మాలయ స్టూడియో నుంచి మహాప్రస్థానం వరకు అంతిమయాత్ర కొనసాగనుంది. కడసారి వీడ్కోలుకు కృష్ణ అభిమానులు భారీగా తరలివచ్చారు.

16/11/2022 14:13(IST)

నిర్మాతల బాగోగులు కోరుకునే గొప్ప వ్యక్తి కృష్ణ: అల్లు అరవింద్‌

‘‘నేను సినిమాలు తీయడానికి వచ్చిన దగ్గర నుంచి కృష్ణగారిని గమనిస్తున్నా. ఇద్దరు, ముగ్గురు నిర్మాతలకు ఆయన గొప్ప సాయం చేశారు. సినిమా విడుదల సమయంలో తనకు రావాల్సిన రెమ్యునరేషన్‌ కూడా అడగకుండా ‘నువ్వు ఇబ్బందుల్లో ఉన్నావని తెలిసింది. డబ్బులు ఏమైనా కావాలా’ అని తన డబ్బులు ఇచ్చి సినిమా రిలీజ్‌ చేయించిన గొప్ప నటుడు. హీరోల్లో ఇలా నిర్మాత బాగోగులను కోరుకునేవారు ఎంతమంది ఉంటారు. ఇప్పటికీ అశేష అభిమానులను కలిగి ఉన్నారు. కృష్ణ కుటుంబానికి ప్రగాఢ సానుభూతి తెలియజేస్తున్నా’’ - సినీ నిర్మాత అల్లు అరవింద్‌

16/11/2022 13:37(IST)

కృష్ణ కాంస్య విగ్రహాన్ని ఏర్పాటు చేస్తాం: బండి సంజయ్‌

‘‘తెలుగు సినిమాకి సాంకేతిక హంగులు దిద్దిన నటుడు సూపర్‌ స్టార్‌ కృష్ణ. తెలంగాణలో భాజపా ప్రభుత్వం అధికారంలోకి వస్తే ట్యాంక్ బండ్‌పై కృష్ణ కాంస్య విగ్రహాన్ని ఏర్పాటు చేస్తాం. కృష్ణకు దాదా సాహెబ్ పాల్కే అవార్డు ఇచ్చే విషయమై తెలంగాణ భాజపా తరఫున కేంద్ర ప్రభుత్వానికి సిఫారసు చేస్తాం’’ - భాజపా రాష్ట్ర అధ్యక్షుడు బండి సంజయ్‌

16/11/2022 13:04(IST)

కృష్ణ పార్థివదేహానికి అంత్యక్రియలు.. మహాప్రస్థానంలో ఏర్పాట్లు పూర్తి

దిగ్గజ నటుడు కృష్ణ పార్థివదేహానికి అంత్యక్రియలు నిర్వహించేందుకు మహాప్రస్థానంలో ఏర్పాట్లు పూర్తయ్యాయి. మధ్యాహ్నం సుమారు 2గంటల తర్వాత కృష్ణ భౌతికకాయాన్నిఅంతిమయాత్రగా మహాప్రస్థానానికి తరలించనున్నారు. సుమారు 200 మందిని మాత్రమే ఇక్కడ అనుమతించనున్నారు. ప్రముఖులు తప్ప, అభిమానులు, మీడియాకు మహాప్రస్థానంలో అనుమతిలేదని అధికారులు చెబుతున్నారు.

16/11/2022 12:45(IST)

కృష్ణ జీవితం తెల్లకాగితం: కోట శ్రీనివాసరావు

‘‘కృష్ణ జీవితం తెల్లకాగితంలాంటిది. ఆయన గొప్ప సినిమాలు చేశారు. నన్ను ఎంతగానో ప్రోత్సహించారు. నేను ఇండస్ట్రీకి వచ్చిన కొత్తలో ఎన్టీఆర్‌ను విమర్శిస్తూ ‘మండలాధీశుడు’ అనే సినిమా నాతో తీశారు. ఆ మూవీ చేస్తున్నప్పుడు ధైర్యం చెప్పారు. కృష్ణ చాలా మంచి వారు. నేను ఎక్కువ సినిమాలు చేసింది ఆయనతోనే. ఆయన ఆత్మకు శాంతి చేకూరాలని ప్రార్థిస్తున్నా’’

16/11/2022 12:37(IST)

మహేశ్‌ను చూస్తుంటే బాధగా ఉంది: జయప్రద

‘‘కృష్ణ గొప్ప వ్యక్తి. నేను ఈ స్థాయిలో ఉన్నానంటే ఆయనే కారణం. నా కెరీర్‌లో కృష్ణగారితో 45కు పైగా సినిమాల్లో నటించా. ఇండస్ట్రీలో ఎంతో మందికి సాయం చేశారు. సెట్‌లో ఎప్పుడూ చిరునవ్వుతోనే ఉండేవారు. కృష్ణ కుటుంబంతో మాది విడదీయరాని అనుబంధం. మహేశ్‌ను చూస్తుంటే ఇప్పుడు చాలా బాధగా ఉంది. వరుసగా ఆప్తులను కోల్పోయారు. భగవంతుడు ఆయనకు ధైర్యం ప్రసాదించాలి. మేము రాజకీయంగా వేర్వేరు పార్టీల్లో ఉన్నా, సినిమాకు వచ్చే సరికి ఎప్పుడూ సహకరిస్తూనే ఉండేవారు’’ -సినీ నటి జయప్రద

16/11/2022 12:15(IST)

కృష్ణ నుంచి నేర్చుకోవాల్సింది అదే: రోజా

‘‘కృష్ణ మరణం సినీ పరిశ్రమకు తీరనిలోటు. చిన్నప్పటి నుంచి నేను కృష్ణకు అభిమానిని. ఆయన సొంత బ్యానర్‌లో కూడా నటించడం నా అదృష్టం. సినీ పరిశ్రమ కోసం ఎన్నో త్యాగాలు చేశారు. సాహసాలు, సంచలనాలకు కృష్ణ కేరాఫ్‌ అడ్రస్‌. అల్లూరి సీతామరాజు అంటే మనకు గుర్తొచ్చేది కృష్ణగారే. ప్రతి ఒక్కరి జీవితంలో సక్సెస్‌, ఫెయిల్యూర్‌ ఉంటాయి. దేనినైనా సమదృష్టితో చూడాలన్న విషయాన్ని కృష్ణగారి నుంచి నేర్చుకోవాలి. కృష్ణ ఆహారప్రియుడు. సెట్స్‌లోని వాళ్లకు కూడా ప్రత్యేక వంటకాలు చేయించేవారు. ఈ ఏడాది మహేశ్‌ కుటుంబంలో వరుస విషాద ఘటనలు చోటు చేసుకోవడం నిజంగా దురదృష్టకరం’’ -మంత్రి రోజా

16/11/2022 11:59(IST)

కృష్ణ పార్థివదేహానికి నివాళులర్పించిన గవర్నర్‌ తమిళసై

లెజెండరీ నటుడు కృష్ణ పార్థివదేహానికి తెలంగాణ గవర్నర్‌ తమిళ సౌందరాజన్‌ నివాళులర్పించారు. పద్మాలయ స్టూడియోస్‌కు చేరుకున్న ఆమె పుష్పాంజలి ఘటించారు. అనంతరం కృష్ణ కుటుంబ సభ్యులను పరామర్శించి ప్రగాఢ సానుభూతి తెలిపారు. ‘‘కృష్ణ మరణం నిజంగా షాక్‌కు గురి చేసింది. తన నటనతో అశేష ప్రేక్షకులను అలరించారు. సినీ పరిశ్రమకు ఆయన చేసిన సేవలు మరువలేం. ఆయన ఆత్మకు శాంతి కలగాలి’’ -తెలంగాణ గవర్నర్‌ తమిళసై

16/11/2022 11:22(IST)

కృష్ణ పార్థివదేహానికి నివాళులర్పించిన ఏపీ సీఎం జగన్‌

దిగ్గజ నటుడు కృష్ణ పార్థివదేహానికి ఆంధ్రప్రదేశ్‌ ముఖ్యమంత్రి వైఎస్ జగన్‌మోహన్‌రెడ్డి నివాళులర్పించారు. పద్మాలయ స్టూడియోస్‌కు చేరుకున్న ఆయన.. కృష్ణకు పుష్పాంజలి ఘటించారు. అనంతరం కృష్ణ కుటుంబ సభ్యులను పరామర్శించారు. మహేశ్‌ను హత్తుకుని ధైర్యం చెప్పారు. ఇతర కుటుంబ సభ్యులను పేరుపేరునా పలకరించారు.

16/11/2022 11:16(IST)

నిర్మాతల పాలిట కల్పవృక్షం: బాలకృష్ణ

‘‘డేరింగ్‌ అండ్‌ డాషింగ్‌ హీరో కృష్ణ మన మధ్య లేరన్నది నమ్మలేని నిజం. ఆయన సినీ కెరీర్‌లో ఎన్నో ప్రయోగాలు, సాహసాలు చేశారు. ఏ కొత్త టెక్నాలజీ వచ్చినా తెలుగు చిత్ర సీమకు పరిచయం చేశారు. పద్మాలయ స్టూడియోస్‌ స్థాపించి గొప్ప సినిమాలు తీశారు. సాంఘిక, జానపద, చారిత్రక, పౌరాణిక చిత్రాలు తీసి అందరి హృదయాల్లో గొప్ప నటుడిగా నిలిచారు. నిర్మాతల పాలిట కల్పవృక్షం. కొత్త దర్శకులు, నిర్మాతలను ఎన్టీఆర్‌, కృష్ణలే పరిచయం చేశారు. కృష్ణగారితో కలిసి ‘సుల్తాన్’లో నటించా. షూటింగ్‌ కోసం అండమాన్‌ వెళ్తే, నాన్నగారి గురించి ఎన్నో విషయాలు చెప్పేవారు. ఎన్టీఆర్‌, కృష్ణలు చిత్ర పరిశ్రమకు స్ఫూర్తి ప్రదాతలు’’ -సినీ నటుడు నందమూరి బాలకృష్ణ

16/11/2022 11:09(IST)

12 కిలోమీటర్ల బారులు

అనేక తర్జనభర్జనలు చేశాక ‘సింహాసనం’ చిత్ర వందరోజుల పండగ మద్రాసులో నిర్వహించాలనుకున్నారు. అన్ని అనుమతులు తీసుకున్నారు. ‘వేడుకకి ఎంతమంది వస్తారు?’ అని పోలీసులు అడిగారు. ఆంధ్రప్రదేశ్‌ నుంచి చెన్నై దూరం కాబట్టి ఐదారువేల మంది రావొచ్చని కృష్ణ (sper star krishna), దర్శకనిర్మాతలు భావించారు. కానీ అనూహ్యంగా ఆ సంఖ్య పెరిగింది. ఆ అభిమాన సముద్రం ఎంతలా ఉందంటే.. కార్యక్రమం నిర్వహించిన ప్రాంగణం నుంచి 12 కిలోమీటర్ల వరకు వాహనాలు బారులు తీరాయి. అతిథులుగా వచ్చిన రజనీకాంత్‌, జితేంద్రలు అత్యంత కష్టంగా వేదికపైకి రాగలిగారు. మందాకిని, జయప్రద, రాధ తదితర ఆర్టిస్టులు కనీసం స్టేజీ మీదకి రాలేకపోయారు.

16/11/2022 10:46(IST)

కృష్ణకు నివాళులర్పించిన నందమూరి బాలకృష్ణ

కృష్ణ భౌతికకాయానికి సినీ నటుడు నందమూరి బాలకృష్ణ కుటుంబం నివాళులర్పించింది. తన సతీమణి, కుమార్తెతో పద్మాలయ స్టూడియోకు వచ్చిన బాలకృష్ణ పూలమాల వేసి అంజలి ఘటించారు.

16/11/2022 10:29(IST)

కన్నీటి పర్యంతమైన కోట శ్రీనివాసరావు

పద్మాలయ స్టూడియోస్‌లో ఉన్న కృష్ణ భౌతికకాయానికి సీనియర్‌ నటుడు కోట శ్రీనివాసరావు నివాళులర్పించారు. అక్కడే మహేశ్‌బాబును ఆలింగనం చేసుకుని భావోద్వేగానికి గురయ్యారు. అనంతరం నటుడు అలీ, ఆయన సోదరుడు ఖయ్యూంలు కూడా కృష్ణకు నివాళులర్పించారు.

16/11/2022 10:13(IST)

కృష్ణ, విజయనిర్మలకు తప్పిన ప్రాణగండం

విజయనిర్మలతో పెళ్లయ్యాక ఇద్దరూ కలిసి నటించిన తొలి చిత్రం ‘అమ్మ కోసం’. ఆ సినిమా షూటింగ్‌ రాజమండ్రి దగ్గర్లోని పాపికొండల్లో జరిగింది. ఆర్టిస్టులందరికీ అక్కడే వసతి ఏర్పాటు చేశారు. కృష్ణ, విజయనిర్మల కొత్త జంట కావడంతో వాళ్ల కోసం ప్రత్యేకంగా ఒక బోట్‌హౌజ్‌ తయారు చేయించి దాన్ని గోదావరిలో తేలియాడేలా ఏర్పాటు చేశారు. తాళ్లతో ఒడ్డున ఉన్న చెట్లకు కట్టేశారు. ఒకరోజు పెద్ద తుపాను, వర్షం వచ్చి ఆ బోటులోకి నీళ్లు వచ్చాయి. కృష్ణ, విజయనిర్మల ఇద్దరికీ ఈత రాదు. ఒడ్డున ఉన్నవాళ్లు హాహాకారాలు చేయసాగారు. ప్రాణాలు వదిలేసుకున్న ఆ సమయంలో స్టంట్‌మాస్టర్‌ రాజు సమయస్ఫూర్తితో వ్యవహరించారు. బోటుకి తాళ్లు కట్టి వాటిని నాలుగు గుర్రాలకి బిగించి ఒడ్డుకు లాక్కొచ్చారు.

16/11/2022 10:00(IST)

అగ్గిపెట్టుందా...

కథానాయకుడు కృష్ణ నటన, హావభావాలు, ఆయన నృత్యాలు, సంభాషణలు చెప్పే విధానం ప్రత్యేకం. ఈతరం కుర్రకారు సైతం ఆయన హావభావాల్ని అనుకరిస్తుంటారు. ఆయన తొలినాళ్లల్లోనే సినిమాల్లో సుదీర్ఘమైన సంభాషణల్ని పలికి ప్రేక్షకుల్ని అలరించారు. ‘అగ్నిపర్వతం’ సినిమాలో అగ్ని జమదగ్ని... అంటూ అగ్గిపెట్టె అడిగే సన్నివేశాలు, ‘వీళ్లు అడ్రస్‌ లేనివాళ్లు కాదు ఆఫీసర్‌...’, ‘కన్నీటికి అర్థం తెలిసిన మనుషులు, కష్టానికి నిర్వచనం తెలిసిన మనుషులే ఇలాంటి సాయం చేస్తారు ఆఫీసర్‌’ అంటూ ఆయన చెప్పిన సంభాషణలు అప్పట్లో పాపులర్‌ అయ్యాయి. వందో చిత్రం ‘అల్లూరి సీతారామరాజు’లో ‘ఒక్క సీతారామరాజు చనిపోతే లక్షలాది సీతారామరాజులు ఉద్భవిస్తారు. ఒక్కొక్కడు ఒకొక్క విప్లవవీరుడై విజృంభించి బ్రిటిష్‌ సామ్రాజ్యపు పునాదులు పెళ్లగి స్తాడు. సీతారామరాజు ఒక వ్యక్తి కాదు.. సమూహ శక్తి, సంగ్రామ భేరి, స్వాతంత్య్ర నినాదం. స్వేచ్ఛా మారుతం. ఈ మట్టిలో మట్టినై... నీటిలో నీటినై... నా ప్రజల ఊపిరిలో ఊపిరినై, మనుషుల్లో భావాన్నై, హృదయాల జ్వాలనై... నా జాతి జనులు పాడుకునే సమరగీతాన్నై... సామ్రాజ్యవాద శక్తుల్ని గెలుస్తాను. స్వతంత్ర భారతి జయకేతనంగా నిలుస్తాను. అక్కడ కాదురా ఇక్కడ కాల్చు... వందే మాతరం’ అంటూ ఆయన చెప్పిన సంభాషణలు ప్రేక్షకుల్ని ఉద్రేకానికి గురిచేశాయి. సినిమా విజయంలో కీలకపాత్ర పోషించాయి. 200వ చిత్రం ‘ఈనాడు’లోనూ ఆయన చెప్పిన సంభాషణలు అంతే శక్తివంతంగా సాగుతాయి. ‘ఈ చేతులు పేదవాడి ఆక్రోశంతో రాటు దేలిపోయాయి. దగా పడిన తమ్ముళ్ల ఆవేదనతో కరుకు తేలిపోయాయి’, ‘రవి అస్తమించని బ్రిటిష్‌ సామ్రాజ్యవాదులే చీకటి మాటుకు పారిపోయారు, నువ్వెంత? పర్వతంలో పరమాణువులాంటివాడివి, సముద్రంలో ఇసుక రేణువులాంటివాడివి’ అనే సంభాషణల్ని కృష్ణ చెప్పిన తీరు ప్రత్యేకం.

16/11/2022 09:37(IST)

నాన్నను తలచుకుంటూ ట్విటర్‌లో మంజుల భావోద్వేగ పోస్ట్‌

‘‘ప్రియమైన నాన్న.. మీరు ఈ ప్రపంచానికి మాకూ సూపర్‌స్టార్‌. ఇంటికి వస్తే ప్రియమైన తండ్రిగా, సాధారణ వ్యక్తిగా మాకోసం ఉండేవారు. మీ వారసత్వం, సినిమాకు మీరు చేసిన సేవలు ఎప్పటికీ బతికే ఉంటాయి. మీరు లేరన్న బాధ మమ్మల్ని తీవ్రంగా కలచి వేస్తోంది. మిమ్మల్ని ఎప్పటికీ ప్రేమిస్తూనే ఉంటాం’’ -మంజుల ఘట్టమనేని

16/11/2022 09:19(IST)

అది ఆయన కలల పాత్ర.. కానీ ఆ కోరిక తీరలేదు!

కృష్ణ చేయాలనుకొని చేయలేకపోయిన పాత్ర కూడా ఒకటుంది. అదే ఛత్రపతి శివాజీ. ఆ పాత్ర చేయాలని ఎంతో తాపత్రయ పడ్డారట కృష్ణ. కానీ, అది చేస్తే హిందూ ముస్లిం గొడవలు రావొచ్చనే ఉద్దేశంతో ఆ ప్రయత్నాన్ని విరమించుకున్నట్లు ఓ సందర్భంలో పంచుకున్నారు. పూర్తిస్థాయిలో కాకపోయినా ‘చంద్రహాస్‌’ చిత్రంలో కొద్దిసేపు శివాజీ గెటప్‌లో కనిపించారు కృష్ణ. తన తనయుడు మహేష్‌బాబు పూర్తి స్థాయి బాండ్‌ చిత్రం చేస్తే చూడాలని ఆకాంక్షించారు కృష్ణ. ఇంత వరకు ఆ కోరిక తీరలేదు. అలాగే తన మనవడు గౌతమ్‌ కృష్ణతో కలిసి నటించాలనీ అనుకున్నారు. అదీ సాధ్యపడలేదు.

16/11/2022 09:12(IST)

అన్నగారితో అనుబంధం

‘పాతాళ భైరవి’ చూసినప్పట్నుంచీ కృష్ణకు (super star krishna) ఎన్టీఆర్‌ అంటే విపరీతమైన అభిమానం. ఎన్టీఆర్‌ సినిమాలను సగటు ప్రేక్షకుడిలా థియేటర్‌లో చూసిన కృష్ణ... తర్వాతి రోజుల్లో కథానాయకుడిగా మారి, తన అభిమాన నటుడితో తెరను పంచుకోవడం ఆసక్తిదాయకం. ఎన్టీఆర్‌ను తొలిసారి చూసిన క్షణాన్ని, ఆయనతో మాట్లాడినప్పుడు కలిగిన పులకింతను కృష్ణ ఎన్నో సందర్భాల్లో గుర్తు చేసుకునేవారు.

పూర్తికథనం కోసం క్లిక్‌ చేయండి

16/11/2022 08:55(IST)

పద్మాలయ స్టూడియోలో కృష్ణ పార్థివదేహం.. ప్రత్యక్ష ప్రసారం

కృష్ణ పార్థివదేహాన్ని పద్మాలయ స్టూడియోకు తీసుకొచ్చారు. అభిమానుల సందర్శనార్థం మధ్యాహ్నం వరకు అక్కడే ఉంచనున్నారు. అనంతరం తెలంగాణ ప్రభుత్వం అధికార లాంఛనాలతో అంత్యక్రియలు నిర్వహించనున్నారు. తమ అభిమాన తారను కడసారి చూసుకునేందుకు భారీగా అభిమానులు తరలివస్తున్నారు. కృష్ణ పార్థివదేహాన్ని చూసి ఫ్యాన్స్‌ కన్నీటి పర్యంతమవుతున్నారు.

16/11/2022 08:05(IST)

ఎవరు పిలిచినా మేమున్నామంటూ..

హైదరాబాద్‌: నగరంలోని నానక్‌రామ్‌గూడతో నటశేఖర కృష్ణకు ప్రత్యేక అనుబంధం ఉంది. అక్కడ ఆయన 90వ దశకంలోనే స్థానిక రైతుల నుంచి స్థలాన్ని కొనుగోలు చేశారు. అందులో ఆదిలో ఇంటిని నిర్మించారు. ఐటీ సంస్థలు, ఫైనాన్షియల్‌ డిస్ట్రిక్ట్‌ రాకపూర్వమే ప్లానెట్‌ టెన్‌ పేరుతో వినోద కేంద్రం ఏర్పాటు చేశారు.

ఇప్పటికీ ఆ ప్రాంతాన్ని ప్లానెట్‌ టెన్‌ కూడలిగా స్థానికులు చెబుతుంటారు. కొన్నాళ్ల తర్వాత అక్కడే భవనం నిర్మించి స్థిర నివాసం ఏర్పరచుకున్నారు. పుష్కర కాలానికి పైగా కృష్ణ, విజయనిర్మల దంపతులు అక్కడే నివాసం ఉన్నారని గ్రామస్థులు తెలిపారు. ఈ క్రమంలో వారికి గ్రామంతో ప్రత్యేక అనుబంధం ఏర్పడింది. స్థానికులకు సహకారం అందించే వారు. వివాహాలు తదితర శుభకార్యాలకు ఎవరు పిలిచినా దంపతులిద్దరూ వచ్చేవారని గ్రామస్థులు చెప్పారు. ఆయన మృతితో గ్రామంలో విషాదం నెలకొంది.

16/11/2022 07:47(IST)

5వేల మంది వస్తారనుకుంటే.. 12 కిలోమీటర్ల బారులు

16/11/2022 07:44(IST)

పద్మాలయ స్టూడియోకు కృష్ణ భౌతికకాయం తరలింపు

కృష్ణ భౌతికకాయాన్ని పద్మాలయ స్టూడియోకి తరలించారు. నానక్‌రామ్‌ గూడలోని ఆయన నివాసం నుంచి పార్థివదేహాన్ని తీసుకెళ్లారు. అభిమానుల సందర్శనార్థం మధ్యాహ్నం వరకు అక్కడే ఉంచి ఆ తర్వాత అంత్యక్రియలు నిర్వహించనున్నారు. తెలంగాణ ప్రభుత్వ లాంఛనాలతో అంత్యక్రియలు జరగనున్నాయి.

16/11/2022 07:35(IST)

హైదరాబాద్‌ వాతావరణం అంటే కృష్ణకు ఎంతో ఇష్టం..

సూపర్‌స్టార్‌ కృష్ణది హైదరాబాద్‌తో నాలుగు దశాబ్దాలకుపైగా అనుబంధం. ఆయన శాశ్వతంగా దూరమైనా.. ఇక్కడి గడ్డపై ఆయన జ్ఞాపకాలు సజీవంగా ఉంటాయని అభిమానులు గుర్తు చేసుకుంటున్నారు. హైదరాబాద్‌లో చెమట పట్టని వాతావరణమన్నా.. ఇక్కడ దొరికే అరటిపండ్లు .. మంజీరా నీళ్లన్నా ఆయనకు ఎంతో ఇష్టం. తెలుగు చలనచిత్ర పరిశ్రమ భాగ్యనగరంలో స్థిరపడటానికి ముఖ్యమైన మూడు మూల స్తంభాల్లో ఆయన ఒకరు. పద్మాలయ స్టూడియో నిర్మాణం తర్వాత ఎక్కువ భాగం సినిమా షూటింగ్‌లు హైదరాబాద్‌లో చేసేవారు.

పూర్తి కథనం కోసం క్లిక్‌ చేయండి

16/11/2022 07:32(IST)

రాజీవ్‌గాంధీ ప్రోత్సాహంతో రాజకీయాల్లోకి..

నటుడిగా సాహసోపేతమైన పాత్రలతో వెండితెరపై చెరగని ముద్ర వేసిన కృష్ణ.. ఎంపీగా రాజకీయ క్షేత్రంలోనూ చక్రం తిప్పారు. రాజీవ్‌ గాంధీ ప్రోద్బలంతో రాజకీయాల్లోకి వచ్చిన ఆయన.. కాంగ్రెస్‌ పార్టీ తరఫున 1989లో ఏలూరు నియోజకవర్గం నుంచి లోక్‌సభ సభ్యునిగా గెలుపొందారు. ఆ తర్వాత 1991లో జరిగిన ఎన్నికల్లో అదే ఏలూరు నియోజకవర్గం నుంచి పోటీ చేసి ఓటమి పాలయ్యారు. రాజీవ్‌ మరణం తర్వాత అనూహ్యంగా రాజకీయాల నుంచి వైదొలగారు. దీని వెనకున్న కారణాన్ని ఓ సందర్భంలో పంచుకున్నారు కృష్ణ.

16/11/2022 07:31(IST)

సాహసి.. సినిమా ప్రగతి పిపాసి

ఇంజినీర్‌ కావాలన్నది తల్లితండ్రుల కల.. తీరా ప్రయత్నిస్తే.. బీఎస్సీ సీటు లభించింది. అలా చదువుపైనే దృష్టి కేంద్రీకరించిన ఆ కుర్రాడికి తొలి నుంచీ సినిమాలపై ఆసక్తి ఉండేది. కాలేజిలో అప్పుడప్పుడు ప్రదర్శించే నాటకాల్లో చిన్నచిన్న వేషాలు వేసే అలవాటుండేది. ఆనాటి దిగ్గజ హీరో అక్కినేనికి లభిస్తున్న ప్రేక్షకాదరణ.. ప్రజల బ్రహ్మరథం ప్రత్యక్షంగా చూశాక అతడిలో సినిమాకాంక్ష బలపడింది.

పూర్తి కథనం కోసం క్లిక్‌ చేయండి

16/11/2022 07:29(IST)

సాహసాల మొనగాడు ‘తేనెమనసు బుల్లోడు’

రేయి... పగలు అనే తేడా లేకుండా సినీ సీమలో అలుపెరగకుండా మెరిసింది ఓ తార. వెండితెరకు తనవైన సాహసాల వెలుగులు... ప్రయోగాల సొబగులు అద్ది సరికొత్త దారుల్ని చూపించింది ఆ ధ్రువతార. అందుకే అభిమానంతో స్వచ్ఛందంగా అంతా ‘సూపర్‌ స్టార్‌’ అన్నారు. అలా పిలిపించుకున్న ఆ తార, ధ్రువతార... మన ‘బుర్రిపాలెం బుల్లోడు’ ఘట్టమనేని కృష్ణ.

పూర్తి కథనం కోసం క్లిక్‌ చేయండి

16/11/2022 07:26(IST)

జగదేకవీరుడు.. ఓరుగల్లుకు సుపరిచితుడు

నటశేఖరుడు, జగదేకవీరుడు కృష్ణతో ఓరుగల్లు వాసులకు ఆత్మీయ అనుబంధం ఉంది. సినీ పరిశ్రమలో రారాజుగా వెలుగొందిన ఆయనకు ఇక్కడ అభిమానులు, సినిమాబంధం గలవారు ఎందరో ఉన్నారు. ఆయన మృతి చెందారని తెలిసి తీవ్ర విషాదంలో మునిగిపోయారు.

పూర్తి కథనం కోసం క్లిక్‌ చేయండి

15/11/2022 22:03(IST)

సూపర్ స్టార్ కృష్ణ మృతిపై లావు అంజయ్య చౌదరి సంతాపం

సూపర్ స్టార్ కృష్ణ మృతిపై తానా అధ్యక్షులు లావు అంజయ్య చౌదరి దిగ్భ్రాంతి వ్యక్తం చేశారు. ఆయన మరణం తెలుగు చిత్ర పరిశ్రమకు తీరని లోటని అన్నారు. లెజెండరీ నటుడు కృష్ణ మృతికి సంతాపం తెలియచేస్తూ వారి కుటుంబ సభ్యులకు తానా తరుపున ప్రగాఢ సానుభూతి తెలిపారు. వెండి తెర వేల్పులుగా వెలుగొందిన ఎన్టీఆర్, ఏన్నార్, శోభన్ బాబు, కృష్ణంరాజు, కృష్ణల మృతితో ఆనాటి శకం ముగిసిందని ఆవేదన వ్యక్తం చేశారు. సినిమా రంగంలో ఎన్నో విప్లవాత్మక మార్పులు తెచ్చి నూతన ఒరవడి సృష్టించిన వ్యక్తి సూపర్ స్టార్ కృష్ణ అని కొనియాడారు.

15/11/2022 21:43(IST)

కృష్ణ పార్థివ దేహానికి విజయశాంతి నివాళి

సూపర్‌ స్టార్‌ కృష్ణ పార్థివ దేహానికి సీనియర్‌ నటి విజయశాంతి నివాళులర్పించారు. ఆయన ఆత్మకు శాంతి చేకూరాలని భగవంతుణ్ని ప్రార్థించారు. ఆయన కుటుంబ సభ్యులకు ప్రగాఢ సానుభూతి తెలిపారు.

15/11/2022 20:41(IST)

కృష్ణ..సినిమాయే ప్రపంచంగా జీవించిన వ్యక్తి: మురళీ మోహన్‌

సూపర్‌స్టార్‌ కృష్ణ ఏ పని చేసినా ఏకాగ్రతతో చేసేవారిని సీనియర్‌ నటుడు మురళీమోహన్‌ అన్నారు. ఏ కొత్త టెక్నాలజీ వచ్చినా తక్షణమే అందిపుచ్చుకొనేవారని తెలిపారు. కృష్ణతో అనుబంధాన్ని ఆయన గుర్తు చేసుకున్నారు. అల్లూరి సీతారామ రాజు షూటింగ్‌ జరుగుతున్న సమయంలో డైరెక్టర్‌ రామచంద్రరావుకి గుండెపోటు వచ్చిందని, వెంటనే ఆయన్ను ఆస్పత్రికి తరలించి, సినిమా మొత్తానికి కృష్ణ దర్శకత్వం వహించారని మురళీమోహన్‌ చెప్పారు. డైరెక్షన్‌పై ఎలాంటి అనుభవం లేకపోయినా..సబ్జెక్ట్‌పై ఉన్న పట్టుతో ముందుకొచ్చారని అన్నారు. సినిమా మొత్తాన్ని తానే డైరెక్ట్ చేసినప్పటికీ.. పేరు మాత్రం రామచంద్రరావుదే వేశారని, సినిమాయే ప్రపంచంగా జీవించిన వ్యక్తి కృష్ణ అని కొనియాడారు. సినిమాలోని అన్ని విభాగాలపైనా ఆయనకు పట్టుందని అన్నారు.

15/11/2022 20:21(IST)

కృష్ణ లాంటి నటుణ్ని ఇప్పటి వరకు చూడలేదు: జయసుధ

తెలుగు సినీపరిశ్రమ ఉత్తమనటుణ్ని కోల్పోయిందని సీనియర్‌ నటి జయసుధ అన్నారు. ప్రస్తుతం విదేశాల్లో ఉన్న ఆమె.. సూపర్‌స్టార్‌ కృష్ణతో తనకున్న అనుబంధాన్ని గుర్తు చేసుకున్నారు. తొలిసారిగా పండంటి కాపురం సినిమా కోసం ఆయన భార్య విజయ నిర్మలే తనను పరిచయం చేసిందని అన్నారు. తొలినాళ్లలో ఆయనతో నటించేటప్పుడు ఇబ్బంది పడ్డానని చెప్పారు.‘‘ కృష్ణ చాలా మితభాషి. మహిళలతో అయితే ఇంకా తక్కువగా మాట్లాడతారు. సెట్లో ఆయనకు కోపం వచ్చిన సందర్భాలను వేళ్లపై లెక్కించొచ్చు’’ అని జయసుధ అన్నారు. ఒకవేళ ఏదైనా సినిమా ఫ్లాప్‌ అయితే, ప్రొడ్యూసర్‌ని ఇంటికి పిలిపించుకొని, అడ్వాన్స్‌ ఇవ్వక పోయినా ఫర్వాలేదని చెప్పి మరో సినిమాకు డేట్స్‌ ఇచ్చేవారని, అలాంటి నటుడిని ఇప్పటి వరకు ఎక్కడా చూడలేదని చెప్పుకొచ్చారు.

15/11/2022 19:44(IST)

సూపర్‌స్టార్‌ని కడసారి చూసేందుకు తరలివస్తున్న అభిమానులు

నానక్‌రామ్‌గూడ నివాసంలోని కృష్ణ పార్థివదేహాన్ని సందర్శించేందుకు అభిమానులను అనుమతిస్తున్నారు. అభిమాన నటుణ్ని కడసారి చూసేందుకు ప్రజలు పెద్ద ఎత్తున తరలివస్తున్నారు. రాత్రి 10.30 గంటల వరకు అభిమానులను అనుమతించనున్నారు. రేపు ఉదయం 9 గంటలకు పార్థివ దేహాన్ని పద్మాలయ స్టూడియోకు తరలిస్తారు. మధ్యాహ్నం 12.30 వరకు అక్కడే ఉంచుతారు. ఆ తర్వాత మహాప్రస్థానంలో ప్రభుత్వం అధికారిక లాంఛనాలతో కృష్ణ అంత్యక్రియలు నిర్వహించనున్నారు.

15/11/2022 19:07(IST)

సూపర్‌స్టార్‌ కృష్ణ మృతి తెలుగుజాతికి తీరని లోటు: నాట్స్‌

న్యూజెర్సీ: ప్రముఖ సినీ నటుడు సూపర్ స్టార్ కృష్ణ మరణ వార్త తమకు తీవ్ర దిగ్భ్రాంతికి గురిచేసిందని ఉత్తర అమెరికా తెలుగు సంఘం (నాట్స్) తెలిపింది. మూడు వందలకు పైగా చిత్రాల్లో నటించి తెలుగు ప్రజల గుండెల్లో కృష్ణ సుస్థిర స్థానం సంపాదించుకున్నారని కితాబిచ్చింది. నటుడిగానే కాకుండా అందరికీ ఆత్మీయుడిగా, నిర్మాతగా ఉన్నతమైన వ్యక్తిత్వం కలిగిన ఆయన ఇక లేరనే విషయాన్ని జీర్ణించుకోలేకపోతున్నానని నాట్స్ ఛైర్‌పర్సన్‌ అరుణ గంటి ఓ ప్రకటనలో తెలిపారు. కృష్ట మరణ వార్త అమెరికాలోని తెలుగువారందరినీ కలవరపరిచిందని నాట్స్ అధ్యక్షుడు బాపయ్య చౌదరి పేర్కొన్నారు. కృష్ణ ఆత్మకు శాంతి కలగాలని ఆకాంక్షించారు. కృష్ణ కుటుంబ సభ్యులకు ప్రగాఢ సానుభూతి తెలిపారు.

15/11/2022 18:41(IST)

ప్రేక్షకుల అభిమానాన్ని చూరగొన్నారు: తమ్మినేని వీరభద్రం

దిగ్గజ నటుడు కృష్ణ మృతిపట్ల సీపీఐ(ఎం) రాష్ట్ర కార్యదర్శి తమ్మినేని వీరభద్రం దిగ్భ్రాంతి వ్యక్తం చేశారు. ఆయన చనిపోవడం బాధాకరమన్నారు. ప్రజల్లో ఆలోచనా శక్తిని రేకెత్తించే అల్లూరి సీతారామరాజు లాంటి చిత్రాలు చేయడంతోపాటు, పలు చిత్రాలు నిర్మించి కృష్ణ ప్రేక్షకుల అభిమానాన్ని చూరగొన్నారని అన్నారు.ఆయన కుటుంబ సభ్యులకు ప్రగాఢ సానుభూతి తెలిపారు.

15/11/2022 18:09(IST)

ట్రాఫిక్‌ ఆంక్షలు.. నానక్‌రాంగూడలోనే కృష్ణ పార్థివదేహం

లెజెండరీ నటుడు కృష్ణ పార్థివదేహాన్ని అభిమానుల సందర్శనార్థం గచ్చిబౌలి స్టేడియానికి తరలించడం లేదు. తొలుత ప్రకటించిన షెడ్యూల్‌ ప్రకారం మంగళవారం సాయంత్రం స్టేడియంలో ఉంచాలనుకున్నారు. కానీ, ట్రాఫిక్‌ ఆంక్షల కారణంగా ఈ నిర్ణయాన్ని వాయిదా వేశారు. అభిమానులు కూడా ఇంటి వద్దే నివాళులర్పించేలా ఏర్పాట్లు చేస్తున్నారు. ఈ అసౌకర్యానికి చింతిస్తున్నట్లు కృష్ణ కుటుంబ సభ్యులు తెలిపారు. ఇతర ప్రాంతాల నుంచి వచ్చే అభిమానుల సందర్శనార్థం బుధవారం ఉదయం పద్మాలయ స్టూడియోస్‌లో కృష్ణ భౌతికకాయాన్ని ఉంచనున్నారు.

15/11/2022 17:57(IST)

కృష్ణ గురించి నాలుగైదు మాటల్లో చెప్పలేను: జయసుధ

‘‘కృష్ణ చనిపోయారన్న వార్త విని షాకయ్యా. అస్వస్థతకు గురయ్యారని తెలిసి, కోలుకుంటారని అనుకున్నా. నేను ఇండియాలో లేకపోవడం చాలా బాధగా ఉంది. కడసారి చూసేందుకు అవకాశం లేకుండా పోయింది. కృష్ణగారి గురించి నాలుగైదు మాటల్లో చెప్పలేను. మా కుటుంబానికి కృష్ణ, విజయనిర్మల ఎంతో సహకారం అందించారు’’ -సినీ నటి జయసుధ

15/11/2022 17:48(IST)

కృష్ణ 300వ సినిమా నేనే చేయాల్సింది: ఎస్వీ కృష్ణారెడ్డి

కృష్ణకు 80ఏళ్లు వచ్చినా, 8ఏళ్ల చిన్న పిల్లాడిలా ఉండేవారని దర్శకుడు ఎస్వీ కృష్ణారెడ్డి అన్నారు. కృష్ణతో తనకున్న అనుబంధాన్ని ఆయన గుర్తు చేసుకున్నారు. ‘‘విశ్వనాథ్‌గారి తర్వాత క్లారిటీ ఉన్న దర్శకుడినంటూ నాకు కితాబిచ్చారు. ఆయన ఎప్పుడు డైలాగ్స్‌ చదువుకునేవారో నాకు తెలియదు. ఆయన నటిస్తే సెకండ్‌ టేక్‌ ఉండేది కాదు. డబ్బింగ్‌ కూడా చాలా వేగంగా చెప్పేసి వెళ్లిపోయేవారు. 300వ చిత్రం కూడా నన్ను చేయమన్నారు. నాకు వేరే సినిమాలు ఉండటంతో నాకు కుదరలేదు. నిజం చెప్పాలంటే కృష్ణగారి వల్లే నేను బాగా బిజీ అయ్యా. ‘టాప్‌హీరో’కు కథానాయికగా మంజులను అనుకున్నాం. కానీ, అభిమానుల ఒత్తిడి వల్ల చేయలేదు. ఇండస్ట్రీకి వచ్చే కొత్తవాళ్లు ఆయనన నుంచి క్రమశిక్షణ, నిబద్ధత నేర్చుకోవాలి. సెట్‌కు ఫలానా టైమ్‌కు వస్తానంటే మేకప్‌ వేసుకుని మరీ వచ్చేవారు. డైరెక్టర్‌ను కంగారు పెట్టేవారు కాదు. తన సీన్‌ వచ్చే వరకూ వేచి చూసేవాళ్లు. దర్శకుడికి ఎదురు సలహాలు ఇచ్చేవారు కాదు. ఏది చెప్పినా ‘ఓకే’ అనేవారు’’ అంటూ కృష్ణతో ఉన్న అనుబంధాన్ని కృష్ణారెడ్డి గుర్తు చేసుకున్నారు.

15/11/2022 16:21(IST)

కృష్ణ వ్యక్తిత్వానికి సెల్యూట్‌ చేయాల్సిందే: ఆర్‌.నారాయణమూర్తి

‘‘డేరింగ్‌ అండ్‌ డాషింగ్‌ హీరో కృష్ణ. ఆయన మరణంతో ఒక గొప్ప శకం ముగిసింది. సినిమా ఇండస్ట్రీలో ఏదో సాధిద్దామని వచ్చిన ఎందరినో ప్రోత్సహించారు. నాలాంటి వారికి కూడా అవకాశాలు ఇచ్చారు. కృష్ణగారి ఆఫీస్‌ ఎప్పుడూ జనంతో కళకళలాడుతూ ఉండేది. సినిమా హిట్టయితే ఓకే. ఫ్లాఫ్ అయితే, నిర్మాతలను పిలిచి మరీ డేట్స్‌ ఇచ్చి ఆదుకునేవారు. ‘అల్లూరి సీతారామరాజు’లో కృష్ణ నటన చూసి ఎన్టీఆరే స్వయంగా మెచ్చుకుని, మళ్లీ ఆ సినిమా తీయాలనుకున్న తన నిర్ణయాన్ని విరమించుకున్నారు. ‘దేవదాస్‌’ తీసి ఏయన్నార్‌తో మెప్పు పొందారు. కృష్ణ వ్యక్తిత్వానికి నిజంగా సెల్యూట్‌ చేయాల్సిందే’’

15/11/2022 16:05(IST)

కృష్ణ భౌతికకాయానికి నివాళులర్పించనున్న ఏపీ సీఎం జగన్‌

దిగ్గజ నటుడు సూపర్‌స్టార్‌ కృష్ణ భౌతికకాయానికి ఏపీ సీఎం జగన్‌మోహన్‌రెడ్డి బుధవారం నివాళులర్పించనున్నారు. రేపు ఉదయం 11 గంటలకు గచ్చిబౌలి స్టేడియానికి రానున్న జగన్‌.. కృష్ణ పార్థివదేహానికి అంజలి ఘటించి మహేశ్‌బాబు కుటుంబాన్ని పరామర్శిస్తారు. అనంతరం రేపు మధ్యాహ్నం 12.30 గంటలకు గచ్చిబౌలి నుంచి పద్మాలయకు కృష్ణ అంతిమ యాత్ర జరగనుంది. అనంతరం మహాప్రస్థానంలో అంతక్రియలు నిర్వహించనున్నారు.

15/11/2022 15:55(IST)

బుధవారం తెలుగు సినీ పరిశ్రమకు బంద్‌

ప్రముఖ నటుడు, నిర్మాత, దర్శకుడు సూపర్‌స్టార్‌ కృష్ణ కన్నుమూయడం పట్ల తెలుగు సినీ పరిశ్రమ తీవ్ర విచారం వ్యక్తం చేసింది. నానక్‌రాంగూడలోని కృష్ణ ఇంటికి వచ్చిన సినీ, రాజకీయ ప్రముఖులు కడసారి ఆయన భౌతికకాయాన్ని చూసి నివాళులర్పించారు. కృష్ణ మృతికి గౌరవ సూచికంగా శ్రద్ధాంజలి ఘటిస్తూ తెలుగు సినీ పరిశ్రమ బుధవారం బంద్‌ పాటించనుంది. ఈ మేరకు తెలుగు చలన చిత్ర నిర్మాతల మండలి ప్రకటన విడుదల చేసింది.

15/11/2022 14:56(IST)

కృష్ణ ల్యాండ్‌మార్క్‌ పర్సన్‌: నిర్మాత సురేశ్‌బాబు

ఎలాంటి కల్మషం లేని మనిషి కృష్ణ అని ప్రముఖ నిర్మాత దగ్గుబాటి సురేశ్‌బాబు అన్నారు. నిర్మాతకు అనుకూలంగా ఉండే వ్యక్తి ఆయనని చెప్పారు. కృష్ణ ల్యాండ్‌ మార్క్‌ పర్సన్‌ అని.. ఆయన మృతి తమకు తీరని లోటని చెప్పారు.

15/11/2022 14:49(IST)

కృష్ణ భౌతికకాయాన్ని చూసిన కన్నీటి పర్యంతమైన మోహన్‌బాబు

దిగ్గజ నటుడు కృష్ణ భౌతికకాయాన్ని చూసి నటుడు మోహన్‌బాబు భావోద్వేగానికి గురయ్యారు. కృష్ణ పార్థివదేహం వద్దకు వచ్చి, ‘సోదరా.. సోదరా’ అంటూ కన్నీటి పర్యంతమయ్యారు. ఆదిశేషగిరిరావు ఓదార్చే ప్రయత్నం చేసినా, మోహన్‌బాబు దుఃఖాన్ని ఆపుకోలేకపోయారు. అనంతరం మహేశ్‌బాబును హత్తుకుని ధైర్యం చెప్పారు. కృష్ణ నటించిన ఎన్నో చిత్రాల్లో మోహన్‌బాబు ప్రతినాయకుడిగా నటించిన సంగతి తెలిసిందే. అంతేకాదు, ఇద్దరూ కలిసి నాలుగైదు చిత్రాల్లో కథానాయకులుగానూ మెప్పించారు.

15/11/2022 14:32(IST)

మంచి మిత్రుడిని కోల్పోయాను: కేసీఆర్‌

తెలుగు చలన చిత్ర రంగంలో సుప్రసిద్ధ సినీనటుడు కృష్ణ మన మధ్య లేకపోవడం చాలా బాధాకరమని తెలంగాణ సీఎం కేసీఆర్‌ అన్నారు. వ్యక్తిగతంగా మంచి మిత్రుడిని కోల్పోయానని చెప్పారు. నానక్‌రామ్‌గూడలో కృష్ణ పార్థివదేహానికి నివాళులర్పించి కుటుంబసభ్యులను పరామర్శించిన అనంతరం కేసీఆర్‌ మీడియాతో మాట్లాడారు.

‘‘కృష్ణ ఆతిథ్యమిస్తే చాలా సార్లు ఆయన ఇంటికి వచ్చాను. ఎలాంటి అరమరికలు లేకుండా ఆయన ముక్కుసూటిగా మాట్లాడే మనిషి. పార్లమెంట్‌ సభ్యుడిగా దేశానికి సేవలందించారు. అల్లూరి సీతారామరాజు లాంటి దేశభక్తి సినిమాను తీశారు. కృష్ణ సేవలను, ఆయన చేసిన దేశభక్తి ప్రయత్నాన్ని గుర్తిస్తూ అధికారికంగా ప్రభుత్వ లాంఛనాలతో అంత్యక్రియలు నిర్వహించాలని ఆదేశించాం. ఆయన కుటుంబసభ్యులకు దుఃఖాన్ని భరించే ధైర్యాన్ని భగవంతుడు ప్రసాదించాలని కోరుకుంటున్నాను’’ అని కేసీఆర్‌ అన్నారు.

15/11/2022 14:19(IST)

కృష్ణ పార్థివదేహానికి సీఎం కేసీఆర్‌ నివాళులు

కృష్ణ పార్థివదేహం వద్ద తెలంగాణ సీఎం కేసీఆర్‌ నివాళులర్పించారు. నానక్‌రామ్‌గూడలోని కృష్ణ నివాసానికి చేరుకుని నివాళులర్పించిన అనంతరం ఆయన కుటుంబసభ్యులను పరామర్శించారు. మహేశ్‌బాబును కేసీఆర్‌ ఓదార్చారు. సీఎంతో పాటు మంత్రులు హరీశ్‌రావు, ప్రశాంత్‌రెడ్డి, ఎంపీ జోగినపల్లి సంతోష్‌కుమార్, ఎమ్మెల్సీ పల్లా రాజేశ్వర్‌రెడ్డి తదితరులు కృష్ణ భౌతికకాయం వద్ద నివాళులర్పించారు.

15/11/2022 13:54(IST)

కృష్ణ అజాతశత్రువు: టి.సుబ్బరామిరెడ్డి

‘‘కృష్ణ ఎంతో కాలం నుంచి నాకు సన్నిహితుడు. ఆయన మరణవార్త విని చాలా బాధపడ్డా. చిత్ర పరిశ్రమకు కొత్త టెక్నాలజీలను పరిచయం చేసిన వ్యక్తి కృష్ణ. ఇండస్ట్రీలో కృష్ణ అజాతశత్రువు. మహేశ్‌బాబు కుటుంబానికి నా ప్రగాఢసానుభూతి తెలియజేస్తున్నా’’ -నిర్మాత టి.సుబ్బరామిరెడ్డి

15/11/2022 13:33(IST)

కృష్ణ భౌతికకాయానికి నివాళులర్పించిన చంద్రబాబు

కృష్ణ భౌతికకాయానికి తెదేపా అధినేత చంద్రబాబునాయుడు నివాళులర్పించారు. అనంతరం మహేశ్‌బాబును పరామర్శించి, ఆయన కుటుంబ సభ్యులకు ప్రగాఢ సానుభూతి తెలియజేశారు.‘‘కృష్ణ భావితరాలకు ఆదర్శం. తెలుగు రాష్ట్రాల్లో ఎక్కువ అభిమాన సంఘాలు కలిగిన ఏకైక నటుడు ఆయన. అలాగే డేరింగ్‌ అండ్‌ డాషింగ్‌ సినిమాలు చేశారు. మహేశ్‌బాబు కుటుంబంలో ఈ ఏడాది ముగ్గురు చనిపోవడం నిజంగా బాధాకరం. వారి కుటుంబానికి ఆ దేవుడు మనోధైర్యాన్ని ప్రసాదించాలి.’’అని చంద్రబాబు అన్నారు.

15/11/2022 13:27(IST)

మహేశ్‌బాబును పరామర్శించిన జూ.ఎన్టీఆర్‌

ఆస్పత్రిలో చికిత్స పొందుతూ కన్నుమూసిన దిగ్గజ నటుడు కృష్ణ భౌతికకాయానికి జూ.ఎన్టీఆర్‌, కల్యాణ్‌రామ్‌, నాగచైతన్య, సంగీత దర్శకుడు ఎం.ఎం.కీరవాణిలు నివాళులర్పించారు. కృష్ణ మృతితో తీవ్ర విషాదంలో ఉన్న మహేశ్‌బాబును ఓదార్చారు.

15/11/2022 13:19(IST)

కృష్ణ భౌతికకాయానికి నివాళులర్పించిన వెంకయ్యనాయుడు

సినీ నటుడు కృష్ణ పార్థివదేహానికి భారత మాజీ ఉపరాష్ట్రపతి ఎం.వెంకయ్యనాయుడు నివాళులర్పించారు. కృష్ణ సోదరుడు ఆది శేషగిరిరావు, తనయుడు మహేశ్‌బాబుతో పాటు, ఇతర కుటుంబ సభ్యులను పరామర్శించారు. ‘‘కృష్ణ నటించిన అల్లూరి సీతారామరాజు ఒక గొప్ప చిత్రం. అందులో ఆయన నటన అద్భుతం. కృష్ణ స్నేహశీలి. ఆయన మరణం విచారకరం. వారి కుటుంబ సభ్యులకు ప్రగాఢసానుభూతి తెలియజేస్తున్నా’’అని వెంకయ్యనాయుడు అన్నారు.

15/11/2022 13:16(IST)

కృష్ణ పార్థివదేహానికి నివాళులు అర్పించిన మంత్రి కేటీఆర్

కృష్ణ పార్థివదేహానికి తెలంగాణ ఐటీశాఖ మంత్రి కేటీఆర్‌ నివాళులర్పించారు. అనంతరం మహేశ్‌బాబు కుటుంబ సభ్యులను కలిసి పరామర్శించారు. అంత్యక్రియలకు సంబంధించిన ఏర్పాట్ల గురించి ఆరా తీశారు.

15/11/2022 13:11(IST)

కృష్ణ భౌతికకాయానికి నివాళులర్పించిన సినీ నటులు చిరంజీవి, వెంకటేశ్‌

లెజెండరీ నటుడు కృష్ణ పార్థివదేహానికి అగ్ర కథానాయకులు చిరంజీవి, వెంకటేశ్‌లు నివాళులర్పించారు. నానక్‌రాంగూడ చేరుకున్న ఇరువురు కృష్ణ భౌతికకాయం వద్ద పుష్పాలను ఉంచి అంజలి ఘటించారు. అనంతరం మహేశ్‌బాబు కుటుంబ సభ్యులను పరామర్శించారు. మహేశ్‌కు ధైర్యం చెప్పారు.

15/11/2022 13:01(IST)

తెలుగు సినిమాలో విప్లవాత్మక మార్పులు తెచ్చిన ధైర్యశాలి కృష్ణ : రాజమౌళి

‘‘సూపర్‌స్టార్‌ కృష్ణగారి మరణం నిజంగా బాధాకరం. తెలుగు సినిమాకు కృష్ణ ఎంతో సేవ చేశారు. 300లకు పైగా చిత్రాల్లో నటించడమే కాదు, దర్శకుడిగా, నిర్మాతగా కీర్తి గడించారు. సినిమా పట్ల ప్రేమ, అభిరుచి ఉండటం వల్లే ఆయన కొత్త టెక్నాలజీలను పరిచయం చేశారు. అంతేకాదు, ఎంతో ధైర్యంగా వాటిని వినియోగించారు. తెలుగు సినిమాలో విప్లవాత్మక మార్పులు తెచ్చారు. తొలి 70ఎం.ఎం. రంగుల చిత్రం ఆయన తెచ్చినవే. భయపడకుండా ఎలా ముందుకు సాగాలో ఆయన నుంచి పాఠాలు నేర్చుకోవచ్చు. మహేశ్‌బాబు కుటుంబానికి నా ప్రగాఢ సానుభూతి తెలియజేస్తున్నా’’ - దర్శకుడు రాజమౌళి

15/11/2022 12:53(IST)

కృష్ణ భౌతికకాయానికి నివాళులు అర్పించిన పవన్‌కల్యాణ్‌

దిగ్గజ నటుడు కృష్ణ భౌతికకాయానికి జనసేన అధినేత, సినీ నటుడు పవన్‌కళ్యాణ్‌ నివాళులర్పించారు. అనంతరం ఆయన కుటుంబ సభ్యులను కలిసి ప్రగాఢ సానుభూతి తెలిపారు. దర్శకుడు బోయపాటి, నిర్మాత సురేష్ బాబు, సి.కళ్యాణ్, నటుడు అడవి శేష్‌, ఎర్రబెల్లి దయాకర్ రావు, చలసాని శ్రీనివాస్ రావులు కూడా కృష్ణ పార్థివదేహానికి అంజలి ఘటించారు.

15/11/2022 12:47(IST)

సూపర్‌స్టార్‌ కృష్ణ వీఎన్‌ ఆదిత్య ఘన నివాళి..

‘‘నటశేఖర’ కృష్ణగారు మొదటి వంద సినిమాలూ స్టార్ హీరో.. రెండు వందల చిత్రాలకు హీరోతో పాటు దర్శకుడు, ఎడిటర్, రచయిత, నిర్మాత.. మూడు వందల పైచిలుకు సినిమాల సమయానికి పైవాటన్నిటితో పాటు స్టూడియో అధినేత. ఎవరెస్టంత ఎదుగుదలకి, భూదేవంత ఒదిగిన వినయానికి, నిలువెత్తు నిదర్శనం సూపర్ స్టార్ కృష్ణ గారు. తెలుగు సినిమా ‘సింహాసనం’ మీద ఆయనే ‘నెంబర్ వన్’ ‘ఊరికి మొనగాడు’ అనిపించుకున్న ఈ ‘బుర్రిపాలెం బుల్లోడు’ ఇక లేడన్నది నమ్మలేకపోతున్నాం.. గుండె ‘అగ్ని పర్వతమై’ జ్వలిస్తోంది.. తెలుగు సినిమాలని సాంకేతికంగా కొత్త పుంతలు తొక్కించిన ఏకైక వ్యక్తి ఘట్టమనేని శివరామకృష్ణ గారు. ఆయన ఆత్మకు సద్గతులు కలుగు గాక. ఆయన ఘనకీర్తి తెలుగు జాతి ఉన్నంతవరకూ ఆచంద్రతారార్కమై వెలుగొందు గాక.. ఓమ్ శాంతి’’ -వీ.ఎన్.ఆదిత్య, ప్రధాన కార్యదర్శి, తెలుగు చలన చిత్ర దర్శకుల సంఘం

15/11/2022 12:42(IST)

ప్రభుత్వ లాంఛనాలతో కృష్ణ అంత్యక్రియలు

సినీనటుడు కృష్ణ పార్థివదేహానికి అధికార లాంఛనాలతో అంత్యక్రియలు జరపాలని తెలంగాణ ముఖ్యమంత్రి కె.చంద్రశేఖర్‌రావు అధికారులను ఆదేశించారు. ఈ మేరకు ఏర్పాట్లు చేయాలని ప్రభుత్వ ప్రధాన కార్యదర్శి సోమేష్ కుమార్‌కు సూచనలు చేశారు.

15/11/2022 12:23(IST)

కృష్ణ మృతి పట్ల విచారం వ్యక్తం చేసిన రాహుల్‌గాంధీ

‘‘తెలుగు సినిమా సూపర్‌స్టార్‌ ఘట్టమనేని కృష్ణజీ కన్నుమూశారన్న విషయం నన్నెంతో బాధించింది. వృత్తిపట్ల ఆయనకున్న నిబద్ధత, విలువలు ప్రజలకు ఆదర్శం. ఆయన కుటుంబ సభ్యులు, స్నేహితులు, అభిమానులకు ప్రగాఢ సానుభూతి తెలియజేస్తున్నా’’ కాంగ్రెస్‌ నేత రాహుల్‌గాంధీ

15/11/2022 12:10(IST)

కృష్ణ మృతిపట్ల సంతాపం తెలిపిన ప్రధాని నరేంద్రమోదీ

దిగ్గజ నటుడు కృష్ణ మరణం పట్ల ప్రధాని నరేంద్రమోదీ విచారం వ్యక్తం చేశారు. ‘‘కృష్ణగారు లెజెండరీ నటుడు. తన విలక్షణ నటనతో ఎందరో హృదయాలను గెలుచుకున్నారు. ఆయన మరణం సినిమా, ఎంటర్‌టైన్‌మెంట్‌ రంగానికి తీరనిలోటు. మహేశ్‌బాబు, ఆయన కుటుంబ సభ్యులకు నా ప్రగాఢ సానుభూతి’’-ప్రధాని నరేంద్రమోదీ

15/11/2022 11:58(IST)

తుపాను బాధితులను ఆదుకున్న దయార్ద్ర హృదయుడు: మండలి బుద్ధ ప్రసాద్‌

కృష్ణ మరణం సినీరంగానికి తీరని లోటు అని మాజీ ఉపసభాపతి మండలి బుద్ధ ప్రసాద్‌ అన్నారు. సాహసానికి ప్రతీకగా నిలిచి తెలుగు సినిమా చరిత్రలో ఆయన తనకంటూ ప్రత్యేక స్థానం సంపాదించుకున్నారని చెప్పారు. ‘‘మా తండ్రి మండలి వెంకట కృష్ణారావుకు కృష్ణ అత్యంత సన్నిహితులు. 1977 నవంబర్‌ 19న దివిసీమ ఉప్పెన వచ్చినపుడు రూ.10వేల విరాళం ప్రకటించడమే కాకుండా.. రూ.లక్షల విలువ చేసే నిత్యావసర వస్తువులను ఆయన పంపిణీ చేశారు. ఒక సంవత్సరం పాటు తనకు వచ్చే ఆదాయంలో 10 శాతం తుపాను బాధితులకు అందజేసిన దయార్ద్ర హృదయులు. హీరో అనే పదాన్ని తన ఇంటిపేరుగా మార్చుకున్న కృష్ణ.. నిజ జీవితంలోనూ హీరోనే. ఆయన ఆత్మకు శాంతి కలగాలని ప్రార్థిస్తు్న్నా’’ అని మండలి బుద్ధ ప్రసాద్‌ పేర్కొన్నారు.

15/11/2022 11:36(IST)

ఆస్పత్రి నుంచి ఇంటికి కృష్ణ పార్థివదేహం

ఆస్పత్రిలో చికిత్స పొందుతూ కన్నుమూసిన లెజెండరీ నటుడు కృష్ణ పార్థివదేహాన్ని కాంటినెంటల్‌ ఆస్పత్రి నుంచి నానక్‌రాంగూడలోని ఆయన ఇంటికి తరలించేందుకు ఏర్పాట్లు పూర్తయ్యాయి. కృష్ణ భౌతికకాయాన్ని ఇంటి వద్ద కాసేపు ఉంచి అక్కడి నుంచి అభిమానుల సందర్శనార్థం గచ్చిబౌలి స్టేడియానికి తరలించనున్నారు. ఈ మేరకు కృష్ణ కుటుంబ సభ్యులు, పోలీసులు ఏర్పాట్లు చేస్తున్నారు.

15/11/2022 11:05(IST)

కృష్ణ మరణం పట్ల ఏపీ గవర్నర్ సంతాపం

ప్రముఖ చలన చిత్ర నటుడు, నిర్మాత కృష్ణ మరణం పట్ల ఆంధ్రప్రదేశ్ గవర్నర్ మాననీయ బిశ్వ భూషణ్ హరి చందన్ సంతాపం ప్రకటించారు. నటుడుగా, నిర్మాతగా, దర్శకునిగా, చిత్ర నిర్మాణ సంస్థ అధినేతగా, తెలుగు సినిమా రంగానికి ఐదు దశాబ్దాలపాటు కృష్ణ అందించిన సేవలు మరువలేనివన్నారు. 350 పైగా సినిమాల్లో నటించి, సినీ ప్రేక్షకుల హృదయాల్లో చెరగని ముద్ర వేసిన కృష్ణ మృతి తెలుగు చలనచిత్ర రంగానికి తీరని లోటని గవర్నర్ పేర్కొన్నారు. సూపర్ స్టార్ కుటుంబ సభ్యులకు గవర్నర్ హరి చందన్ తన ప్రగాఢ సానుభూతిని తెలిపారు.

15/11/2022 10:54(IST)

సినిమాను జడ్జ్‌ చేయడంలో ఆయన తర్వాతే: మురళీమోహన్‌

సూపర్‌స్టార్‌ కృష్ణ నిర్మాతలకు శ్రేయోభిలాషి అని ప్రముఖ సినీనటుడు, ఆయన స్నేహితుడు మురళీమోహన్‌ చెప్పారు. కృష్ణతో తనకు 60 ఏళ్లకు పైనే అనుబంధం ఉందన్నారు. ఇద్దరం 1956లో ఏలూరులోని సీఆర్‌ రెడ్డి కాలేజ్‌లో ఇంటర్మీడియట్‌లో చేరామని గుర్తు చేసుకున్నారు. ఒకే రకమైన మనస్తత్వంతో ఆత్మీయంగా ఉండేవాళ్లమని మురళీమోహన్‌ వివరించారు. ఎప్పటికైనా థియేటర్‌ కట్టాలని, పడవలాంటి పెద్ద కారు కొనాలని అప్పట్లో కృష్ణ చెప్పేవారని.. ఆయన అనుకున్నవన్నీ సాధించారన్నారు. ‘గూడఛారి 116’ సినిమాతో కృష్ణ సినీ కెరీర్‌ స్ట్రాంగ్‌ అయిందని.. ఆ సినిమా ఘన విజయం తర్వాత ఆయనతో సినిమా తీసేందుకు నిర్మాతలు పోటీపడ్డారని గుర్తు చేసుకున్నారు. దీంతో ఒకేసారి సుమారు 20 సినిమాల్లో నటించాలని కృష్ణకు అవకాశాలు వచ్చాయని వివరించారు. సినిమా విడుదల అయిన తర్వాత దాన్ని జడ్జ్‌ చేయడంలోఎవరైనా ఆయన తర్వాతే అని మురళీమోహన్‌ కొనియాడారు.

15/11/2022 10:41(IST)

ఆయని లేని ప్రతిరోజూ భారమే: ఘట్టమనేని కుటుంబం

‘‘మా కుటుంబానికి కృష్ణ మృతి తీరనిలోటు. కేవలం వెండితెరపైనే కాదు, ప్రేమ, మానవత్వం, ఆప్యాయత పంచడంలోనూ సూపర్‌స్టారే. ఆయన చేసిన ఎన్నో మంచి పనులు ద్వారా మన మధ్య జీవించే ఉంటారు. అంతేకాదు, ఎంతోమంది కృష్ణ స్ఫూర్తిప్రదాత. అన్నింటికన్నా మిన్నగా మమ్మల్ని కృష్ణ ప్రేమించారు. ఇక ప్రతి రోజూ ఆయన్ని కోల్పోయిన భారంతోనే గడుపుతాం’’ ఘట్టమనేని కుటుంబం

15/11/2022 10:30(IST)

మాటలు రావడం లేదు: నితిన్‌

‘‘కృష్ణగారు చనిపోయారన్న వార్త విన్న తర్వాత మాటలు రావడం లేదు. ఆయన ఆత్మకు శాంతికలగాలి. ఇలాంటి బాధాకరసమయంలో ఘట్టమనేని కుటుంబానికి మనోధైర్యం ప్రసాదించాలని ఆ భగవంతుడిని ప్రార్థిస్తున్నా’’ -యువ నటుడు నితిన్‌

15/11/2022 10:23(IST)

ఆయనతో నటించిన మూడు సినిమాలు మధుర జ్ఞాపకాలు: రజనీకాంత్‌

లెజెండరీ నటుడు కృష్ణ మృతి పట్ల అగ్ర కథానాయకుడు రజనీకాంత్‌ విచారం వ్యక్తం చేశారు. ఆయన మృతి తెలుగు చిత్ర పరిశ్రమకు తీరని లోటు అని అన్నారు. కృష్ణతో మూడు సినిమాలు నటించానని, అవి ఎప్పటికీ మధుర జ్ఞాపకాలు అని గుర్తు చేసుకున్నారు. మహేశ్‌బాబు, ఆయన కుటుంబానికి తన ప్రగాఢ సానుభూతి తెలిపారు. కృష్ణ ఆత్మకు శాంతి కలగాలని ప్రార్థించారు. కృష్ణ-రజనీకాంత్‌ కలిసి, ఇద్దరూ అసాధ్యులే, అన్నదమ్ముల సవాల్‌, రామ్‌ రాబర్ట్‌ రహీమ్‌ చిత్రాల్లో నటించారు.

15/11/2022 10:04(IST)

ప్రతి జానర్‌లో సినిమా తీసిన ధైర్యశైలి కృష్ణ: నాగార్జున

‘‘చలనచిత్ర పరిశ్రమలో ప్రతి జానర్‌లోనూ సినిమా తీసిన ధైర్యశాలి. తెలుగు చిత్రాల్లో ఆయనే నిజమైన కౌబాయ్‌. ఆయన సానుకూల ధోరణిని ఆకళింపు చేసుకోవడానికి నేను గంటల తరబడి కృష్ణగారి పక్కనే కూర్చొనేవాడిని. లెజెండరీ సూపర్‌స్టార్‌. మిమ్మల్ని మిస్‌ అవుతున్నాం కృష్ణగారు’’ -సినీ నటుడు అక్కినేని నాగార్జున

15/11/2022 09:46(IST)

మంచిని ఆస్తిగా పొందిన నటుడు కృష్ణ: బ్రహ్మానందం

సినీ పరిశ్రమలో తనకంటూ ప్రత్యేకశైలిని ఏర్పరుచుకుని, ఎన్నో అద్భుతమైన సినిమాల్లో నటించిన వ్యక్తి కృష్ణ అని హాస్యనటుడు బ్రహ్మానందం అన్నారు. కృష్ణ మృతి పట్ల విచారం వ్యక్తం చేసిన ఆయన మాట్లాడుతూ.. కృష్ణ సాహసాలకు కేరాఫ్‌ అడ్రస్‌గా నిలవడమే కాదని, గుండెధైర్యం కలిగిన నిర్మాత కూడానని అన్నారు. కృష్ణ మంచి నటుడు, దర్శకుడు, నిర్మాత అన్న ఆయన, మంచిని ఆస్తిగా పొందిన మహా నటుడు కృష్ణ అని కొనియాడారు.

15/11/2022 09:34(IST)

‘సూపర్‌స్టార్‌’కు నిజమైన అర్థం చెప్పారు: అల్లరి నరేశ్‌

‘‘ఆయనలాంటి లెజెండ్‌ మరొకరు లేరు. ‘సూపర్‌స్టార్‌’ అంటే ఏంటో నిజమైన అర్థాన్ని కృష్ణగారు మనకు నేర్పారు. నా తండ్రి (ఈవీవీ సత్యనారాయణ)ఆయనకు పెద్ద అభిమాని. ఆయనను కోల్పోవడంతో మాటలు రావడం లేదు. మహేశ్‌బాబు సర్‌కు, ఆయన కుటుంబానికి మనోధైర్యం ఇవ్వాలని ఆ దేవుడిని ప్రార్థిస్తున్నా’’అల్లరి నరేశ్‌

15/11/2022 09:19(IST)

చిత్రసీమకు కృష్ణ సేవలు మరువలేనివి: బాలకృష్ణ

‘‘ఘట్టమనేని కృష్ణగారి మరణం తీవ్ర దిగ్బ్రాంతిని కలిగించింది. తన నటనతో చిత్రసీమలో సరికొత్త ఒరవళ్ళు సృష్టించి ఎనలేని ఖ్యాతి సంపాదించి ప్రేక్షకుల మనసులో చెరగని ముద్ర వేసుకున్నారు. నటుడిగా, నిర్మాతగా, దర్శకుడిగా స్టూడియో అధినేతగా చిత్ర పరిశ్రమకు ఆయన అందించిన సేవలు మరువలేనివి. కృష్ణగారితో మా కుటుంబానికి ఎంతో అనుబంధం వుంది. నాన్నగారు, కృష్ణ గారు కలసి అనేక చిత్రాలకు పని చేశారు. ఆయనతో కలిసి నేను నటించడం మర్చిపోలేని అనుభూతి. కృష్ణ గారు లేనిలోటు సినీ పరిశ్రమకూ, అభిమానులకు ఎప్పటికీ తీరనిది. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నాను. ఇటీవలే సోదరుడు రమేష్ బాబుని, మాతృమూర్తి ఇందిరాదేవిని కోల్పోయి దుఃఖంలో ఉన్న నా సోదరుడు మహేష్ బాబుకు ఈ కష్టం కాలంలో దేవుడు మనో ధైర్యాన్ని ఇవ్వాలని కోరుకుంటూ.. ఆయన కుటుంబ సభ్యులందరికీ నా ప్రగాఢ సానుభూతిని తెలియజేస్తున్నాను’’ - నందమూరి బాలకృష్ణ

15/11/2022 09:16(IST)

ప్రేక్షకుల మనసుల్లో చిరస్థాయిగా నిలిచిపోతారు: కేటీఆర్‌

350కి పైగా సినిమాల్లో నటించిన కృష్ణ తెలుగు సినీ ప్రేక్షకుల మనసులలో చిరస్థాయిగా నిలిచిపోతారని తెలంగాణ ఐటీశాఖ మంత్రి కేటీఆర్ అన్నారు. కేవలం నటుడిగానే కాకుండా దర్శకుడిగా, నిర్మాతగా ఆయన తెలుగు సినిమా రంగానికి చేసిన సేవలు అజరామరం అని కొనియాడారు. తెలుగు సినిమా చరిత్రలో విభిన్న తరహా పాత్రలను పోషించడంతోపాటు, అద్భుతమైన సినిమాలను నిర్మించి తెలుగు సినిమా చరిత్రలో తనదైన స్థానాన్ని సూపర్ స్టార్ కృష్ణ సృష్టించుకున్నారన్నారు. ఆయన మరణం తెలుగు సినిమా రంగానికి తీరని లోటన్న కేటీఆర్.. కృష్ణ ఆత్మకి శాంతి చేకూరాలని ప్రార్థించారు.

15/11/2022 08:59(IST)

తెలుగు చలనచిత్ర సీమకు తీరనిలోటు: పవన్‌కల్యాణ్‌

దిగ్గజ నటుడు కృష్ణ మరణం తెలుగు చలన చిత్ర సీమకు తీరనిలోటు అని జనసేన అధినేత పవన్‌కల్యాణ్‌ విచారం వ్యక్తం చేశారు. ‘‘చిత్రసీమలో సూపర్‌స్టార్ బిరుదుకి సార్థకత చేకూర్చిన కృష్ణగారు తుది శ్వాస విడిచారనే విషయం ఎంతో ఆవేదన కలిగించింది. ఆయన కోలుకొంటారని ఆశించాను. ఇప్పుడు ఈ విషాద వార్త వినాల్సి వచ్చింది. కృష్ణగారి పవిత్ర ఆత్మకు శాంతి చేకూరాలని భగవంతుణ్ణి ప్రార్థిస్తున్నాను. స్నేహశీలి, మృదుస్వభావి అయిన ఆయన ప్రతి ఒక్కరితో ఎంతో ఆప్యాయంగా ఉండేవారు. మద్రాస్‌లో ఉన్నప్పటి నుంచి మా కుటుంబంతో చక్కటి అనుబంధం ఉంది. తెలుగు చలన చిత్ర పరిశ్రమ అభివృద్ధికి కథానాయకుడిగా, నిర్మాతగా, దర్శకుడిగా, స్టూడియో అధినేతగా ఆయన సేవలు చిరస్మరణీయాలు. పార్లమెంట్ సభ్యుడిగా ప్రజాజీవితంలో కూడా ఆయన తన ముద్ర వేశారు. సినిమా రంగం క్షేమాన్ని కాంక్షించే కృష్ణగారి మరణం తెలుగు చలనచిత్ర సీమకు తీరని లోటు. ఆయన కుమారుడు మహేష్ బాబుకి, ఇతర కుటుంబ సభ్యులకు నా తరఫున, జనసేన పక్షాన ప్రగాఢ సానుభూతి తెలియచేస్తున్నాను’’ అని పవన్‌ ట్వీట్‌ చేశారు.

15/11/2022 08:40(IST)

krishna: కృష్ణ చనిపోవడానికి కారణం అదే.. వైద్యులు

దిగ్గజ నటుడు కృష్ణ మల్టీ ఆర్గాన్‌ ఫెయిల్యూర్‌ వల్ల చనిపోయినట్లు కాంటినెంటల్‌ ఆస్పత్రి వైద్యులు స్పష్టం చేశారు. ఈ మేరకు డాక్టర్‌ గురు ఎన్‌ రెడ్డి మీడియాతో మాట్లాడుతూ.. ‘‘సోమవారం ఉదయం కృష్ణ గుండెపోటుతో ఆస్పత్రికి వచ్చారు. ఆయనను వెంటనే ఎమర్జెన్సీ తరలించి సీపీఆర్‌ చేశాం. ఆ తర్వాత చికిత్స చేయడం ప్రారంభించాం. వచ్చినప్పటి నుంచే ఆయన ఆరోగ్య పరిస్థితి విషమంగా ఉంది. రెండు మూడు గంటల తర్వాత పలు అవయవాలు పనిచేయడం మానేశాయి. సుమారు నాలుగు గంటల తర్వాత డయాలసిస్‌ అవసరం ఏర్పడంతో అది కూడా చేశాం. సోమవారం సాయంత్రం కృష్ణ ఆరోగ్యం మరింత విషమించింది. ఎలాంటి చికిత్స చేసినా ఫలితం ఉండదని వైద్యుల బృందం నిర్ధారణకు వచ్చింది. దీంతో ఆయనకు ఎలాంటి ఇబ్బంది కలగకుండా ఉన్న కొద్ది గంటలు మనఃశాంతిగా వెళ్లిపోవాలని కుటుంబ సభ్యులతో చర్చించి నిర్ణయం తీసుకున్నాం. మంగళవారం తెల్లవారుజామున 4.09 నిమిషాలకు కృష్ణ తుది శ్వాస విడిచారు.’’ అని డాక్టర్‌ గురు తెలిపారు.

15/11/2022 08:15(IST)

హైదరాబాద్‌లో చిత్ర పరిశ్రమ అభివృద్ధికి ఎంతో కృషి చేశారు: రేవంత్‌

సినిమా రంగంలో ఎన్నో విప్లవాత్మక మార్పులు తెచ్చి నూతన ఒరవడి సృష్టించిన వ్యక్తి సూపర్‌స్టార్‌ కృష్ణ అని టీపీసీసీ అధ్యక్షుడు రేవంత్‌రెడ్డి అన్నారు. కృష్ణ మృతి పట్ల రేవంత్‌ సంతాపం వ్యక్తం చేశారు. ఆయన మరణం సినిమా రంగానికి తీరని లోటని చెప్పారు. కృష్ణ కుటుంబసభ్యులకు తన ప్రగాఢ సానుభూతి తెలిపారు. హైదరాబాద్‌లో తెలుగు చిత్ర పరిశ్రమ అభివృద్ధికి ఆయన ఎంతో కృషి చేశారన్నారు. కృష్ణ ఆత్మకు శాంతి చేకూరాలని భగవంతుడిని ప్రార్థిస్తున్నట్లు పేర్కొన్నారు.

15/11/2022 08:10(IST)

కృష్ణ మరణంతో అద్భుత సినీశకం ముగిసింది: తెదేపా అధినేత చంద్రబాబు

‘‘తెలుగు సినీ పరిశ్రమలో మంచి మనిషిగా, నిర్మాతల హీరోగా, నటశేఖరుడిగా, సూపర్‌స్టార్‌గా పిలిపించుకున్న నటులు, మాజీ ఎంపీ కృష్ణ గారి మరణం దిగ్భ్రాంతికి గురిచేసింది. నటుడిగా, దర్శకుడిగా, తెలుగు సినిమాకు తొలి సాంకేతికతను అద్దిన సాహసనిర్మాతగా కృష్ణగారిని చెబుతారు. ఆయన మరణంతో ఒక అద్భుత సినీశకం ముగిసినట్లయింది. ఇటీవలే తల్లిని, ఇప్పుడు తండ్రిని కూడా కోల్పోయిన మహేష్ బాబుకు ఇది తీరని వేదన. ఈ బాధ నుంచి త్వరగా కోలుకునే మనోధైర్యాన్ని ఆయనకు ఇవ్వాలని భగవంతుని కోరుకుంటూ.. వారి కుటుంబ సభ్యులకు నా ప్రగాఢ సానుభూతిని తెలియజేస్తున్నాను’’

15/11/2022 08:07(IST)

నిజ జీవితంలోనూ ఆయన మనసున్న మనిషి: సీఎం జగన్‌

కృష్ణ మృతి పట్ల ఏపీ సీఎం జగన్‌ సంతాపం వ్యక్తం చేశారు. కుటుంబసభ్యులకు ఆయన తన ప్రగాఢ సానుభూతి తెలిపారు. కృష్ణ ఆంధ్రా జేమ్స్‌బాండ్‌గా కీర్తి గడించారని జగన్‌ కొనియాడారు. నిజ జీవితంలోనూ ఆయన మనసున్న మనిషి అని.. కృష్ణ మరణం తెలుగు సినీరంగానికి, తెలుగువారికి తీరని లోటు అన్నారు. ఈ కష్ట సమయంలో ఆయన కుటుంబసభ్యులకు దేవుడు మనోధైర్యం ఇవ్వాలని కోరుకుంటున్నట్లు జగన్‌ పేర్కొన్నారు.

15/11/2022 07:41(IST)

నూతన ఒరవడులు ప్రవేశపెట్టిన ఘనత కృష్ణదే: సీఎం కేసీఆర్‌

సూపర్‌స్టార్‌ కృష్ణ మృతి పట్ల తెలంగాణ సీఎం కేసీఆర్‌ సంతాపం తెలిపారు. విభిన్న కుటుంబ కథాచిత్రాలతో పాటు ప్రజలకు సామాజిక స్పృహ కలిగించే సాంఘిక చిత్రాల నటుడిగా కృష్ణ జనాదరణ పొందారన్నారు. నాటి కార్మిక, కర్షక లోకం ఆయన్ను తమ అభిమాన హీరోగా, సూపర్‌స్టార్‌గా కీర్తించేవారని సీఎం గుర్తుచేసుకున్నారు. సొంత నిర్మాణ సంస్థ స్థాపించి సినిమా రంగంలో నూతన ఒరవడులను ప్రవేశపెట్టిన ఘనత కృష్ణదేనని కేసీఆర్‌ కొనియాడారు. ఆయన కుటుంబసభ్యులకు సీఎం తన ప్రగాఢ సానుభూతి తెలిపారు.

15/11/2022 07:37(IST)

చిన్నప్పటి నుంచే సినిమాలపై ఆసక్తి..

కృష్ణ అసలు పేరు ఘట్టమనేని శివరామ కృష్ణమూర్తి. చిన్నప్పటి నుంచి ఆయనకు సినిమాలపై ఎంతో ఆసక్తి ఉండేది. అయితే ఆయన తల్లిదండ్రులు మాత్రం కృష్ణను ఇంజినీర్‌ చేయాలనుకున్నారు. కానీ, సీటు దొరక్కపోవడంతో డిగ్రీలో చేరారు. అక్కడ చదువుతున్నప్పుడు ఏలూరులో ప్రఖ్యాత నటుడు అక్కినేని నాగేశ్వరరావుకు ఘనంగా సన్మానం జరిగింది. ఆ కార్యక్రమానికి హాజరైన కృష్ణకు సినిమాలపై ఇష్టం మరింత పెరిగి ఈ రంగంవైపు వచ్చేశారు. 1965లో ఇందిరను కృష్ణ వివాహం చేసుకున్నారు. వీరికి ఐదుగురు సంతానం. రమేశ్‌బాబు, మహేశ్‌బాబు, పద్మావతి, ప్రియదర్శిని, మంజుల. ఆ తర్వాత సినీ నటి, దర్శకురాలు విజయనిర్మలను కృష్ణ రెండో వివాహం చేసుకున్నారు.

15/11/2022 07:31(IST)

తెలుగు తెరపై కృష్ణ స్ఫూర్తి అజరామరం: వెంకయ్యనాయుడు

తెలుగు తెరపై సూపర్‌స్టార్‌ కృష్ణ స్ఫూర్తి అజరామరమని మాజీ ఉపరాష్ట్రపతి వెంకయ్యనాయుడు అన్నారు. కృష్ణ నటించిన పాత్రలు యువశక్తికి చిహ్నంగా ఉండేవని గుర్తుచేసుకున్నారు. ఆయన కుటుంబసభ్యులకు వెంకయ్యనాయుడు తన ప్రగాఢ సానుభూతి తెలిపారు.

15/11/2022 07:28(IST)

ఏపీ గవర్నర్‌ సంతాపం

ప్రముఖ సినీనటుడు కృష్ణ మృతి పట్ల ఏపీ గవర్నర్‌ బిశ్వభూషణ్‌ హరిచందన్‌ సంతాపం తెలిపారు. నటుడు, నిర్మాత, దర్శకుడు, నిర్మాణ సంస్థ అధినేతగా తెలుగు సినీ రంగానికి ఆయన అందించిన సేవలు మరువలేనివన్నారు. 350కి పైగా చిత్రాల్లో నటించి సినీ ప్రేక్షకుల హృదయాల్లో చెరగని ముద్ర వేశారని గవర్నర్‌ కొనియాడారు. కృష్ణ కుటుంబ సభ్యులకు తన ప్రగాఢ సానుభూతి తెలిపారు.

15/11/2022 07:16(IST)

ప్రముఖ నటుడు కృష్ణ కన్నుమూత

ప్రముఖ నటుడు, సూపర్‌స్టార్‌ కృష్ణ (79) (Krishna) కన్నుమూశారు. ఆదివారం అర్ధరాత్రి కార్డియాక్ అరెస్టుకు గురైన కృష్ణను కుటుంబసభ్యులు గచ్చిబౌలిలోని కాంటినెంటల్‌ ఆసుపత్రికి తరలించారు. చికిత్స పొందుతూ మంగళవారం వేకువజామున ఆయన తుదిశ్వాస విడిచారు. కృష్ణ మృతితో ఆయన కుటుంబసభ్యులతో పాటు అభిమానులు, తెలుగు సినీలోకం శోకసంద్రంలో మునిగిపోయింది. 1942 మే 31న గుంటూరు జిల్లా తెనాలి మండలంలోని బుర్రిపాలెం గ్రామంలో వీరరాఘవయ్య చౌదరి, నాగరత్న దంపతులకు కృష్ణ జన్మించారు. ఐదుగురు సంతానంలో ఈయనే పెద్దవారు.