TGRDC CET 2024: రెసిడెన్షియల్‌ డిగ్రీ కాలేజీల్లో చేరతారా? దరఖాస్తు చేసుకోండి

TGRDC CET 2024 | ఇంటర్నెట్‌ డెస్క్‌: తెలంగాణలో ఇంటర్‌ పూర్తి చేసి రెసిడెన్షియల్‌ డిగ్రీ కాలేజీల్లో చేరాలనుకొనేవారికి గుడ్‌న్యూస్‌. మహాత్మా జ్యోతిబా ఫూలే బీసీ సంక్షేమ, ఎస్సీ, ఎస్టీ బాలుర/బాలికల సంక్షేమ రెసిడెన్షియల్‌ డిగ్రీ కాలేజీల్లో ప్రవేశాలకు దరఖాస్తుల ప్రక్రియ కొనసాగుతోంది. డిగ్రీ ప్రథమ సంవత్సరంలో అడ్మిషన్‌కు ఉమ్మడి ప్రవేశ పరీక్ష (RDC CET-2024)నిర్వహించనున్నారు. ఆసక్తి కలిగిన విద్యార్థులు ఏప్రిల్‌ 12 వరకు ఆన్‌లైన్‌ https://tsrdccet.cgg.gov.in/లో దరఖాస్తు చేసుకోవచ్చు. ఈ పరీక్ష రాష్ట్రవ్యాప్తంగా ఏప్రిల్‌ 28న జరగనుంది. ఏప్రిల్‌ 21 నుంచి హాల్‌టికెట్లు అందుబాటులో ఉంచనున్నారు.

• రాష్ట్రంలోని పలుచోట్ల ఉన్న రెసిడెన్షియల్‌ డిగ్రీ కళాశాలల్లో బీఎస్సీ, బీకాం, బీఏ, బీబీఏ, బీఎస్సీ- ఫ్యాషన్‌ టెక్నాలజీ, బీఎస్సీ (ఆనర్స్‌) డిజైన్‌, టెక్నాలజీ, బీఎస్సీ లైఫ్‌సైన్సెస్‌, బీకాం (కంప్యూటర్‌ అప్లికేషన్స్‌)తో పాటు పలు వైవిధ్యమైన కోర్సులు అందుబాటులో ఉన్నాయి.

అర్హతలివే..

• 2023-24లో ఇంటర్‌ పరీక్షల్లో 50శాతం మార్కులతో పాసై ఉండాలి. ఇంగ్లిష్‌లో 40శాతం మార్కులు సాధించాల్సి ఉంటుంది. ఎస్సీ/ఎస్టీ అభ్యర్థులకు 5శాతం సడలింపు ఉంది.
• విద్యార్థుల తల్లిదండ్రులు/సంరక్షకుల వార్షికాదాయం గ్రామీణ ప్రాంతాల్లో రూ.1.5 లక్షలు;  పట్టణ ప్రాంతాల్లో రూ.2 లక్షలకు మించరాదు. 
• తహసీల్దార్‌/ఎమ్మార్వో తాజాగా ఇచ్చిన ఆదాయ ధ్రువీకరణ పత్రం అడ్మిషన్‌ సమయంలో చూపించాల్సి ఉంటుంది. 
• ఎంపిక ప్రక్రియ: ప్రవేశపరీక్షలో మెరిట్, రూల్‌ ఆఫ్‌ రిజర్వేషన్‌ ఆధారంగా సీట్లు భర్తీ చేస్తారు.
• పరీక్ష: RDC CET 2024 పరీక్ష 150 మార్కులకు రెండున్నర గంటల సమయం ఉంటుంది. ఇంటర్‌ సిలబస్‌ ఆధారంగానే పరీక్ష ఉంటుంది. 
• ఇంగ్లిష్‌, తెలుగు భాషల్లో ఆబ్జెక్టివ్‌ రూపంలో ప్రశ్నలు అడుగుతారు. ఓఎంఆర్‌ సమాధాన పత్రంపై రాయాల్సి ఉంటుంది. 
• తప్పుడు సమాధానాలకు నెగెటివ్‌ మార్కులు లేవు. దరఖాస్తు రుసుం రూ.200
• బీసీ విద్యార్థులకు మెయింటినెన్స్‌ ఛార్జీలు రూ.1000 కాగా, కాషన్‌ డిపాజిట్‌ రూ.1000, దోస్త్‌ స్టూడెంట్‌ రిజిస్ట్రేషన్‌ కింద రూ.425 చొప్పున చెల్లించాల్సి ఉంటుంది. సాంఘిక సంక్షేమ, గిరిజన సంక్షేమ డిగ్రీ కళాశాలల్లో విద్యార్థులకు అడ్మిషన్‌/ఇతర ఫీజులు లేవు. రెసిడెన్షియల్‌ డిగ్రీ కాలేజీలు, కోర్సుల వివరాలు, సీట్ల సంఖ్య, రిజర్వేషన్లు తదితర సమాచారాన్ని కింది పీడీఎఫ్‌లో చూడొచ్చు.