చవక రక్త పరీక్షతోనే అల్జీమర్స్‌ గుర్తింపు

ప్రస్తుతం అందుబాటులో ఉన్న రక్తపరీక్షతోనే అల్జీమర్స్‌ సంకేతాలను గుర్తిస్తే? అదీ సూదితో తీసే వెన్ను ద్రవం పరీక్షతో సమానంగా ఫలితం చూపిస్తే? ఇది సాధ్యమేనని తాజా అధ్యయనం ఒకటి పేర్కొంటోంది. రక్తంలో ఉన్న పి-టావ్‌217 ప్రోటీన్‌ను గుర్తించటం ఈ పరీక్ష ప్రత్యేకత. ప్రస్తుతం వెన్ను ద్రవాన్ని తీసి దానిలోని ప్రొటీన్ల ఆనవాళ్ల సాయంతో అల్జీమర్స్‌ను గుర్తిస్తున్నారు. అధునాతన పెట్‌ స్కాన్‌ కూడా నిర్ధరణకు వాడుతున్నారు. ఇవి ఖరీదైనవి, అంతగా అందుబాటులో లేనివి కావటం వల్ల కొందరికి ఈ పరీక్షలు చేయటం కష్టమవుతుంది. ఈ నేపథ్యంలో చవకైన, తేలికైన రక్త పరీక్ష కొత్త ఆశలు రేపుతోంది. అల్జీమర్స్‌ జబ్బు సూచికలైన అమీలాయిడ్‌ బీటా, టావు ప్రొటీన్ల మార్పులను పి-టావ్‌217 చాలావరకు సూచిస్తుండటం విశేషం. ఈ రక్త పరీక్ష 97% కచ్చితత్వంతో పనిచేస్తోందని తేలింది.