Shopping: అదే పనిగా కొనేస్తున్నారా..?

పనిలో ఉన్నా.. ఖాళీగా కూర్చున్నా మనసంతా ఈ కామర్స్‌ యాప్‌లు, వెబ్‌సైట్లపైనే. ఆఫర్లు ఏమున్నాయ్‌? రాయితీలు ఎంతొస్తున్నాయ్‌.. ఎప్పుడూ ఈ ఆరాలే. యాప్‌ తెరిచామా.. ఏదో ఒకటి కొని తీరాల్సిందే. చాలామందిది ఇదేవరుస. యువతలో 28శాతం మంది జేబుని గుల్ల చేసే ఈ వ్యసనంతో బాధ పడుతున్నారంటున్నాయి అధ్యయనాలు. ఎందుకిలా.. వాటికి అడ్డుకట్ట వేసేదెలా? అంటే..

మోజు ఎందుకంటే..

• షాపింగ్‌ చేస్తుంటే.. ఇన్‌స్టంట్‌ సంతోషం, ఉత్సాహం కలుగుతాయి. కంప్యూటర్, స్మార్ట్‌ 24గంటలూ అందుబాటులో ఉండటంతో వీటిని ఎప్పుడంటే అప్పుడు తెరవొచ్చు. 
• ఒత్తిడి, ఆందోళన, ఒంటరితనం.. ఇలాంటి సమస్యలతో బాధ పడుతున్న వారిలో కొందరు ఆ బాధ నుంచి ఉపశమనాన్ని షాపింగ్‌లో వెతుక్కుంటుంటారు.
• ఇష్టమైన పనులు చేయడం వల్ల శరీరంలో హాయిని కలిగించే డోపమైన్‌ అనే హార్మోను విడుదలవుతుంది. షాపింగ్‌తో కూడా ఇదే అనుభూతికి లోనవుతుంటారు. 
• ఆఫర్లు, రాయితీలు, ఊరించే ప్రకటనలు సైతం కుర్రకారుపై మత్తులా పని చేస్తాయి. వాటి మోజులో పడి కొని తీరాలనే కోర్కెను పెంచుతాయి.
• ఇతరులతో కలవనివారు, ఆత్మవిశ్వాసం తక్కువగా ఉన్నవారు సైతం ఆన్‌లైన్‌ షాపింగ్‌ని ఒక వ్యాపకంలా మార్చుకుంటారని కొన్ని పరిశోధనల్లో తేలింది. 

బయట పడదామిలా..

ఆర్థిక భారాన్ని కలిగిస్తూ, కొన్నాళ్లకి అపరాధభావాన్నీ కలుగజేసే ఈ వ్యసనం నుంచి బయట పడాలంటే ఏం చేయాలంటే..

• ఆన్‌లైన్‌ షాపింగ్‌ చేయాలనే కోరిక కలిగినప్పుడు వెంటనే ప్రత్యామ్నాయం వెదకాలి. వ్యాయామం, స్నేహితులతో మాట్లాడటం, బయటికి వెళ్లడం.. ఏదో ఒక వ్యాపకం పెట్టుకోవాలి.
• ఆన్‌లైన్‌ షాపింగ్‌కి నెలకు ఇంతమొత్తమే ఖర్చు చేయాలి అని ఒక పరిమితి విధించుకోవాలి. అంతకుమించి వాడకుండా క్రెడిట్, డెబిట్‌ కార్డులకు లిమిట్‌ సెట్‌ చేయాలి. 
• యోగా, ధ్యానంలాంటివి సైతం మనసుని అదుపులో పెట్టడానికి ఉపకరిస్తాయి. వాటిని పాటిస్తూ ఉంటే.. మనసు నియంత్రణలో ఉంటుంది. 
• అధిక షాపింగ్‌తో కలిగే అనర్థాల్ని ఎక్కడైనా రాసుకొని, తరచూ వాటిని గుర్తు చేసుకుంటుండాలి. అవసరమైతే స్మార్ట్‌ఫోన్‌ నుంచి ఆ షాపింగ్‌ యాప్‌లను తొలగించాలి.
• కొన్నిసార్లు ఎన్ని అనుకున్నా.. దేన్నీ ఆచరణలో పెట్టలేని పరిస్థితి. ఈ అడిక్షన్‌ ముదిరినప్పుడు తప్పకుండా మానసిక నిపుణుడిని సంప్రదించాల్సిందే.