ఆకర్షణ.. ఆయుష్షు నాలుగు నెలలే!

యువ నాడి

వయసు అల్లరి చేస్తున్నప్పుడు.. మస్తిష్కంలో వలపు గోల చెలరేగినప్పుడు.. ఎవరైనా ఇష్టపడ్డ అమ్మాయి లేదా అబ్బాయిపై తీవ్ర మోహం కలుగుతుంది. అనుక్షణం వాళ్ల సమక్షంలోనే ఉండాలనే కోరిక పెరుగుతుంది. చెలికాడితో మాట కలపాలనీ, ప్రియసఖితో సన్నిహితంగా మెలగాలనే ఉబలాటం ఎక్కువ అవుతుంది. యవ్వనంలో ఇది సహజమే అయినా ఈ ఆత్రం నాలుగు నెలలకు మించి ఉండదంటున్నాయి తాజా అధ్యయనాలు. ఈ భావోద్వేగాలు అంతకుమించి ఉంటే అది సీరియస్‌ ప్రేమగా రూపాంతరం చెందుతుందనీ.. లేదంటే ఆకర్షణ క్రమక్రమంగా తగ్గిపోతుందని సెలవిచ్చారు పరిశోధకులు. ఇష్టమైన వ్యక్తులు ఎదురుపడగానే మనసులో కల్లోలం చెలరేగడానికి కారణం మెదడులో ఉత్పత్తి అయ్యే డోపమైన్‌ అనే రసాయనం. అయితే రానురాను దీని తీవ్రత తగ్గుతుంటుంది. కొన్నాళ్లయ్యాక ఆ ఇద్దరూ బాధ్యతలు పంచుకోవడం.. ఒకరి బాగు మరొకరు కోరుకోవడం.. కష్టసుఖాలు పంచుకోవడంలాంటివి చేస్తున్నప్పుడు ఆకర్షణ కాస్తా.. శాశ్వత బంధంగా మారుతుంది. అది జరగలేదంటే.. అది ఉత్తినే అంటున్నారు. దీని వయసు నాలుగు నెలలు మించదంటున్నారు అధ్యయనకారులు.