కలిసి చేస్తే.. కలదు ఫిట్‌నెస్‌..

జిమ్‌కెళ్తే.. కండలు పెరుగుతాయ్‌. కసరత్తులు చేస్తే ఫిట్‌నెస్‌ మెరుగవుతుంది. అందరికీ తెలిసిందే. అదే నలుగురితో కలిసి చేస్తే మరిన్ని లాభాలంటున్నారు నిపుణులు. ఎలాగంటే..

* సంగీతం వింటూ కసరత్తులు చేయడం.. శిక్షకుడి సూచనలు అనుసరించడం.. నలుగురిని అనుసరిస్తూ వ్యాయామం చేయడంతో మన శరీరంలో సంతోష కారకాలైన ఎండార్ఫిన్లు, డోపమైన్‌ అధికంగా విడుదలవుతాయట. దీంతో రోజంతా ఉల్లాసంగా, ఉత్సాహంగా గడుస్తుంది.
* ‘కోలర్‌ ఎఫెక్ట్‌’ ప్రకారం ఒక బృందంలో కలిసి పని చేసినప్పుడు, పోటీ పడినప్పుడు.. తమను తాము నిరూపించుకోవడానికి ఎవరైనా తీవ్రంగా శ్రమిస్తారు. ఇది వ్యాయామానికీ వర్తిస్తుంది. అదీగాక వర్కవుట్లు చేసేటప్పుడు ఒకరికొకరు సాయం చేసుకుంటూ మరింత మెరుగ్గా తయారవుతారు.
* ఒంటరిగా ఉన్నప్పుడు ఎవరికివారే.. కింగ్‌. ఒంటరిగా కసరత్తులు చేసినప్పుడు ఎవరూ చూడటం లేదనే నిర్లిప్తత ఉంటుంది. కానీ నలుగురితో కలిసి చేస్తే జవాబుదారీతనం ఉంటుంది. శిక్షకుడు చెప్పినట్టు వినాలి. పక్కవాళ్ల సలహాలు పాటించాలి.
* బృంద వ్యాయామాలతో సమయమే తెలియదు. ఒకరితో ఒకరు చర్చించుకుంటారు. నవ్వులు వెల్లివిరుస్తాయి. గ్రూపులో ఒకరిద్దరి మనస్తత్వం నచ్చినా స్నేహం కుదురుతుంది. వాళ్ల కోసమైనా క్రమం తప్పకుండా వెళ్లాలనిపిస్తుంది. ఇది ఒకవైపు ఫిట్‌నెస్‌.. మరోవైపు ఒత్తిడి నుంచి ఉపశమనానికి మార్గం.