ప్రేమ పూజ చేద్దామంటే..

కళ్లన్నీ సెల్లుకే అప్పగించి సిల్లీఫెలోలా ఎదురు చూస్తుండగా ఏ సాయంత్రానికో నా చరవాణి మోగింది. అది నా వలపు రాణి సందేశమే అనుకుంటూ పరుగెత్తుకెళ్లి హల్లో అన్నా. తీయని స్వరం నా చెవిలో తేనెల మాటలు కుమ్మరిస్తుందనుకుంటే.. ఏదో కీచు గొంతు నా పీచమణిచేలా భయపెట్టింది. అయినా.. గొంతు వరస మార్చి నా చెలి సరసమాడుతోందని సర్దిచెప్పుకున్నా. ముచ్చట్లన్నీ ముగిశాక ముచ్చటగా ఐలవ్యూ చెబుతుందని ఆత్రంగా ఎదురుచూశా. తను చెప్పేది విని నా హృదయం ఉప్పొంగుతుంది అనుకుంటే.. చావు కబురు చల్లగా చెప్పి నా గుండెను ఆపేసినంత పని చేసింది. ఆఖర్న గోల్డ్‌ లోన్‌ కట్టమంటూ గద్దించేసరికి.. చేసింది నా బంగారం కాదు.. బంగారం లోను భామ అని తెలిసి తెగ బాధ పడ్డా. ఎలాగోలా ఆ గోలని ముగించి గేటు తీసేలోగా.. ఎన్నాళ్లుగానో ఎదురు చూసిన నా అందాల దేవత ఎదురుగా ప్రత్యక్షమైంది. ప్రేమ పూజ మొదలు పెడదామని నోరు విప్పేలోపే.. ‘ఏంటి ఇంతసేపు నీ ఫోన్‌ ఎంగేజ్‌? ఎవరా అమ్మాయి??’ అంటూ మూతి మీద ఒక్కటిచ్చింది. తను మూడక్షరాల పదం చెబితే మురిసిపోదామని భావిస్తే.. కింద పడ్డ మూడు పళ్లని చూసి లబోదిబో అన్నా.
పంపినవారు: పంగా సాంబశివారెడ్డి, ఈమెయిల్‌