పట్టణాల్లోని ఆలయ భూముల లీజులకు కమిటీ

ఉత్తర్వులు జారీ చేసిన ప్రభుత్వం

ఈనాడు, అమరావతి: పట్టణ ప్రాంతాల్లోని ఆలయాల భూములను సద్వినియోగం చేసుకునేలా, వాటిని దీర్ఘకాలిక లీజులకు ఇచ్చే అంశాన్ని పరిశీలించేందుకు కమిటీని ఏర్పాటుచేస్తూ ప్రభుత్వం శుక్రవారం ఉత్తర్వులు జారీచేసింది. దేవాదాయశాఖ కార్యదర్శి, కమిషనర్, ఆ శాఖ చీఫ్‌ ఇంజినీర్, ఆయా ఆలయాల ఈవోలు ఈ కమిటీలో ఉంటారు.

రాష్ట్రవ్యాప్తంగా వివిధ నగరాలు, పట్టణాల్లోని ప్రధాన, ముఖ్య ఆలయాలకు చెందిన భూములు ఖాళీగా ఉన్నాయి. వాటిలో భక్తులకు వసతుల కల్పనకు వీలుగా పెద్ద హోటళ్ల వంటివి నిర్మించేందుకు ముందుకొచ్చే వారికి అవసరమైన భూములను దీర్ఘకాలిక (33 ఏళ్లకు) లీజులకు ఇవ్వాలని భావిస్తున్నారు. దీనివల్ల ఆయా ఆలయాలకు వచ్చే భక్తులకు సౌకర్యాలు అందుబాటులోకి రావడంతోపాటు, ఆలయానికి అదనపు రాబడి రానుంది. ఇందుకు సంబంధించిన అన్ని అంశాలను పరిశీలించేందుకు ప్రభుత్వం కమిటీని ఏర్పాటు చేసింది.

ఖాళీ స్థలాల లీజులకు ప్రతిపాదనలు పంపండి

రాష్ట్రంలోని ఆలయాలకు చెందిన ఖాళీ స్థలాలను 11 ఏళ్లకు లీజుకు ఇచ్చేలా ప్రతిపాదనలు పంపాలని అన్ని జిల్లాల దేవాదాయశాఖ అధికారులకు.. ఆ శాఖ కమిషనర్‌ కె.రామచంద్రమోహన్‌ ఆదేశాలు జారీచేశారు. పది రోజుల్లో ప్రతి జిల్లా నుంచి కనీసం 10 ప్రతిపాదనలు పంపాలని కోరారు. వీటిని టెండరు/బహిరంగ వేలం ద్వారా కేటాయించనున్నారు.

• ప్రతి జిల్లా దేవాదాయశాఖ అధికారి.. నెలకు కనీసం మూడు చొప్పున  ఆక్రమణలు తొలగించేలా చర్యలు తీసుకోవాలని కమిషనర్‌ కోరారు. ఆలయ భూములను ఆక్రమించిన వారిపై చర్యలు తీసుకునేలా ఆదేశాలిచ్చారు.
• దేవాదాయశాఖకు చెందిన 80,793 ఎకరాలు ఇంకా వెబ్‌ల్యాండ్‌లో నమోదు కాలేదని గుర్తించారు. అన్ని జిల్లాల దేవాదాయశాఖ అధికారులూ అక్కడి కలెక్టర్లు, జేసీలకు లేఖలు రాసి, ఆ భూములను వెబ్‌ల్యాండ్‌లో నమోదయ్యేలా చూడాలని కమిషనర్‌ ఆదేశించారు.