వడగాలులు తగ్గుముఖం.. వర్షాలకు అవకాశం!

ఈనాడు డిజిటల్‌, విశాఖపట్నం: రాష్ట్రంలో వాతావరణ పరిస్థితులు మారుతున్నాయి. ఓ వైపు వడగాలులు తగ్గుముఖం పట్టి వర్షాలు కురవడానికి అనుకూల పరిస్థితులు నెలకొన్నాయి. సోమవారం శ్రీకాకుళం, పార్వతీపురం మన్యం, అల్లూరి సీతారామరాజు, శ్రీ సత్యసాయి, వైఎస్సార్‌, అన్నమయ్య జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశముందని విపత్తు నిర్వహణ సంస్థ పేర్కొంది. మంగళవారం శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, ఏలూరు, పల్నాడు, ప్రకాశం, నెల్లూరు, నంద్యాల, శ్రీసత్యసాయి, వైఎస్సార్‌, అన్నమయ్య, చిత్తూరు, తిరుపతి జిల్లాల్లో పిడుగులతోపాటు మోస్తరు నుంచి భారీ వర్షాలకు అవకాశముందని తెలిపింది.

ఆదివారం రాష్ట్రంలోనే అత్యధికంగా నంద్యాల జిల్లా మహానందిలో 45.8, కర్నూలు జిల్లా జి.సింగవరంలో 45.6, నెల్లూరు జిల్లా వేపినాపి అక్కమాంబపురంలో 45.5, ప్రకాశం జిల్లా వెలిగండ్లలో 45.2, తిరుపతి జిల్లా మంగనెల్లూరు, వైఎస్సార్‌ జిల్లా ఉప్పలూరు, సింహాద్రిపురంలో 45.1 డిగ్రీల ఉష్ణోగ్రతలు నమోదయ్యాయి. 5 మండలాల్లో తీవ్ర వడగాలులు, 117 మండలాల్లో వడగాలులు వీచాయి. సోమవారం  విజయనగరం జిల్లాలో 13,  శ్రీకాకుళంలో 10, పార్వతీపురం మన్యం జిల్లాలోని 6 మండలాల్లో వడగాలులు వీస్తాయని విపత్తు నిర్వహణ సంస్థ పేర్కొంది.