బాణసంచా పేలుళ్లకు బెదిరి.. వృద్ధురాలిని పొడిచిన ఆవు

వైకాపా ఎన్నికల ప్రచారంలో ఘటన

అల్లూరు, న్యూస్‌టుడే: వైకాపా నాయకులు కాల్చిన బాణసంచా ఒక వృద్ధురాలు గాయపడటానికి కారణమైంది. శ్రీపొట్టిశ్రీరాములు నెల్లూరు జిల్లా అల్లూరు నగర పంచాయతీ పరిధిలోని రామాపురం సంఘం కాలనీలో కావలి ఎమ్మెల్యే సమీప బంధువు మన్నెమాల సుకుమార్‌రెడ్డి తన అనుచరులతో ఆదివారం రాత్రి ప్రచారం నిర్వహించారు. అందులో భాగంగా భారీగా బాణసంచాను కాల్చారు. ఆ శబ్దాలకు బెదిరిన ఓ ఆవు పరుగులు పెట్టడంతో అక్కడ ఉన్న వారంతా పరుగులు తీశారు. మానికల మార్తమ్మ అలియాజ్‌ రమణమ్మ (70) అనే వృద్ధురాలు తప్పించుకోలేకపోవడంతో ఆమెను ఆవు పొడిచింది. తీవ్రంగా గాయపడిన బాధితురాలిని వైకాపా నాయకులు నెల్లూరులోని ఓ ప్రైవేటు ఆసుపత్రికి కారులో తరలించారు. ఆమె పరిస్థితి విషమంగా ఉన్నట్లు సమాచారం.