Kia cars: కియా కార్లు అద్దెకూ తీసుకోవచ్చు.. హైదరాబాద్‌ సహా 6 నగరాల్లో

ఈనాడు, హైదరాబాద్‌: కారు కొంటే బీమా - నిర్వహణ ఖర్చుల వంటివి తప్పవు. మరో కొత్త మోడల్‌ కొనుగోలుకు పాత కారు విక్రయించాలంటే తగిన ధర వస్తుందో రాదో అనే బెంగ ఒకటి. ఇలాంటివి ఏమీ లేకుండా, కొత్త కారును లీజుపై తీసుకుని, వాడుకునే సేవను కియా ఇండియా అందుబాటులోకి తెస్తోంది. ఓరిక్స్‌ ఆటో ఇన్‌ఫ్రాస్ట్రక్చర్‌ సర్వీసెస్‌తో ఒప్పందాన్ని కుదుర్చుకుని, ‘కియా లీజ్‌’ సేవను హైదరాబాద్, దిల్లీ, ముంబయి, చెన్నై, బెంగళూరు, పుణేలలో అందుబాటులోకి తీసుకురానున్నట్లు కియా ఇండియా చీఫ్‌ సేల్స్‌ ఆఫీసర్‌ మ్యుంగ్‌-సిక్‌ సోన్‌ తెలిపారు. కియా లీజ్‌లో భాగంగా వాహనాన్ని 24-60 నెలల వ్యవధికి లీజుకు తీసుకోవచ్చు. ఎలాంటి ముందస్తు చెల్లింపు చేయనక్కర్లేదు కియా సోనెట్‌ కోసం నెలకు రూ.21,900, సెల్టోస్‌కు రూ.28,900, కారెన్స్‌కు రూ.28,800 వరకు చెల్లించాల్సి ఉంటుంది.