Toyota price hike: ఏప్రిల్‌ 1 నుంచి టయోటా కార్ల ధరల పెంపు

Toyota price hike | దిల్లీ: ప్రముఖ కార్ల తయారీ సంస్థ టయోటా కిర్లోస్కర్‌ మోటార్‌ (Toyota Kirloskar Motor) కార్ల ధరలను పెంచనుంది. ఎంపిక చేసిన మోడళ్లపై 1 శాతం వరకు ధరలను పెంచనున్నట్లు ప్రకటించింది. ముడి సరకుల ధరలు, నిర్వహణ ఖర్చులు పెరిగిన కారణంగా ఈ పెంపు నిర్ణయం తీసుకున్నట్లు తెలిపింది. ఏప్రిల్‌ 1 నుంచి పెరిగిన ధరలు అమల్లోకి వస్తాయని కంపెనీ ప్రకటించింది. దేశీయంగా టయోటా కంపెనీ గ్లాంజా వంటి హ్యాచ్‌బ్యాక్‌ల మొదలు ఫార్చూనర్‌ వంటి ఎస్‌యూవీల వరకు వివిధ రకాల కార్లను విక్రయిస్తోంది. టయోటా జనవరిలో ఒకసారి ధరల పెంపు చేపట్టింది. ఈ ఏడాది ధరలు పెంచడం రెండోసారి. మరోవైపు కార్ల తయారీ సంస్థ హోండా కూడా వచ్చే ఆర్థిక సంవత్సరం నుంచి ధరల పెంచుతున్నట్లు ప్రకటించింది.