Tamilnadu: ఆలయానికి వెళ్తుండగా ప్రమాదం.. 11మంది మృతి!

చెన్నై: తమిళనాడులో ఘోర విషాదం చోటుచేసుకుంది. తిరుపత్తూరు జిల్లాలోని సెంబరై కొండపై ఉన్న ఆలయానికి వెళ్తున్న భక్తుల వాహనం లోయలోకి దూసుకెళ్లింది. ఈ ఘటనలో 11 మంది మృతిచెందగా.. 19మంది గాయపడినట్టు పోలీసులు వెల్లడించారు. రహదారిపై మలుపు వద్ద వ్యాన్‌ని డ్రైవర్‌ అదుపు చేయలేకపోవడంతో ఈ దుర్ఘటన చోటుచేసుకున్నట్టు తెలిపారు. ప్రమాదం సమయంలో వాహనంలో మొత్తం 30 మంది ఉన్నట్టు పేర్కొన్నారు. మృతులంతా పులియూరు గ్రామానికి చెందిన వారిగా గుర్తించారు. మృతుల్లో ఎక్కువ మంది మహిళలు, బాలికలే ఉన్నట్టు సమాచారం. క్షతగాత్రులను జిల్లా ప్రభుత్వ ఆస్పత్రికి తరలించి చికిత్స అందిస్తున్నట్టు తెలిపిన పోలీసులు.. ఈ ఘటనపై దర్యాప్తు చేస్తున్నట్టు పేర్కొన్నారు.

 ఈ ఘటనపై ముఖ్యమంత్రి స్టాలిన్‌ విచారం వ్యక్తంచేశారు. క్షతగాత్రులకు మెరుగైన వైద్య సాయం అందించాలని వైద్య శాఖ అధికారుల్ని ఆదేశించారు. ప్రమాదంలో మృతులకు రూ.2లక్షలు, క్షతగాత్రులైన వారి కుటుంబాలకు రూ.50వేలు చొప్పున ఎక్స్‌గ్రేషియో ప్రకటించారు.