‘మృత్యు’ ప్రయాణం!

హైవేలపై ఆగి ఉన్న వాహనాలతో ప్రమాద ఘంటికలు
మూడు రోజుల వ్యవధిలో రాష్ట్రంలో 25 మందికి పైగా మృతి
అప్రమత్తమైన పోలీసులు.. గస్తీ పెంచాలని ఆదేశాలు
ఈనాడు - హైదరాబాద్‌

సెలవులు...శుభకార్యాలు. వెరసి వేసవికాలంలో..ముఖ్యంగా మే నెలలో అత్యధికంగా రోడ్డు ప్రమాదాలు జరుగుతుంటాయి. జాతీయ రహదారులు, హైవేల మంత్రిత్వశాఖ నివేదిక ప్రకారం 2022 సంవత్సరంలో అత్యధికంగా మే నెలలోనే రోడ్డు ప్రమాదాలు, మరణాలు నమోదయ్యాయి. రెండు, మూడు రోజులుగా రాష్ట్రంలో వరుసగా జరుగుతున్న ప్రమాదాలు ఈ విషయాన్ని మరోసారి నిరూపిస్తున్నాయి. అయినా నష్ట నివారణ చర్యలు చేపట్టకపోవడంతో ప్రమాదాలు కొనసాగుతున్నాయి.

కోదాడ సమీపంలో గురువారం ఆగి ఉన్న లారీని ఢీకొట్టిన ఘటనలో ఒకే కుటుంబానికి చెందిన ఆరుగురు మరణించారు. పటాన్‌చెరు వద్ద బాహ్యవలయ రహదారిపై ఆగి ఉన్న లారీని ఢీకొట్టిన ఘటనలో ఓ వ్యాపారి సజీవ దహనమయ్యారు. అంతకు రెండు రోజులకు ముందు సూర్యాపేట వద్ద ఆగి ఉన్న కంటైనర్‌ను.. కారు ఢీకొట్టిన ఘటనలో యువ దంపతులు మృత్యువాతపడ్డారు. బుధవారం వరంగల్‌ జిల్లా వర్ధన్నపేట సమీపంలో ప్రైవేటు ట్రావెల్స్‌ బస్సు ఢీకొట్టిన ఘటనలో నలుగురు ఇంటర్‌ విద్యార్థులు మరణించారు. మిగతా అన్ని ప్రమాదాలు కలుపుకొని రెండు రోజుల్లోనే రాష్ట్రంలో 25 మందికిపైగానే అర్ధంతరంగా తనువు చాలించారు. ఈ ప్రమాదాల్లో ఎక్కువగా హైవేలపై నిలిపి ఉంచిన లారీలను..ఇతర వాహనాలు ఢీకొట్టడం వల్ల జరిగినవే కావడం గమనార్హం.

నిద్దరోతున్న నిఘా..

జాతీయ రహదారులపై వాహనాలు నిలపకూడదు. ఈ నిబంధన ఎక్కడా అమలు కావడం లేదు. ఇందుకు ప్రధాన కారణం ఆయా రహదారులపై గస్తీ లేకపోవడమే. వాస్తవంగా ఆయా రహదారుల పరిధిలోని పోలీస్‌స్టేషన్ల సిబ్బంది నిరంతరం గస్తీ నిర్వహించాలి. నిబంధనలు ఉల్లంఘించే వాహనదారులపై కేసులు నమోదుచేయాలి. డ్రైవర్లు వాహనంలో లేనిపక్షంలో వాటిని అక్కణ్నుంచి తొలగించాలి. ఇవేమీ జరగడం లేదు.

రహదారి భద్రతా మండలి ఉన్నా..

రాష్ట్రంలో ప్రత్యేకంగా రహదారి భద్రతా మండలి ఉంది. దానికి ప్రత్యేక సదుపాయాలు ఏవీ లేవు. గస్తీ కోసం వాహనాలు సమకూర్చాలన్న ఆ సంస్థ ప్రతిపాదన చాలాకాలంగా ప్రభుత్వం వద్ద పెండింగ్‌లో ఉంది. కనీసం వాహనాలు, వాటికి అవసరమైన సిబ్బందిని కేటాయిస్తే శాంతిభద్రతల పోలీసులతో సంబంధం లేకుండా తామే నిరంతరం గస్తీ నిర్వహిస్తామని, తద్వారా ఇలాంటి ప్రమాదాలు నివారించడం వీలవుతుందని రహదారి భద్రతా మండలి అధికారులు చెబుతున్నా..పట్టించుకునే వారు కరవయ్యారనే విమర్శలున్నాయి.

ప్రమాదాల నెల...మే!

సాధారణంగా మే నెలలో దేశవ్యాప్తంగా అత్యధికంగా ప్రమాదాలు జరుగుతుంటాయి. జాతీయ రహదారుల మంత్రిత్వశాఖ నివేదిక ప్రకారం 2022 సంవత్సరంలో దేశవ్యాప్తంగా మిగతా అన్ని నెలల కంటే మే నెలలో అత్యధికంగా ప్రమాదాలు జరిగాయి. ఆ నెలలో 43,307 ప్రమాదాలు జరగ్గా 16,791 మంది మరణించారు. మార్చిలో 40,307 ప్రమాదాలు, 14,859 మరణాలు చోటుచేసుకున్నాయి. ఏప్రిల్‌లో 39,033 ప్రమాదాలు, 14,489 మరణాలు నమోదయ్యాయి. మొత్తంగా ఆ సంవత్సరంలో దేశవ్యాప్తంగా 4,61,312 రోడ్డు ప్రమాదాలు, 1,68,491 మరణాలు సంభవించగా..దాదాపు నాలుగో వంతు ప్రమాదాలు, మూడో వంతు మరణాలు కేవలం మార్చి, ఏప్రిల్‌, మే నెలల్లోనే సంభవించాయి. ఇందుకు ప్రధాన కారణం వేసవి సెలవులు, శుభకార్యాలు. విద్యా సంస్థలకు సెలవులు ఉండటంతో కుటుంబాలతో కలిసి పర్యాటక ప్రాంతాలకు వెళ్లేవారి సంఖ్య పెరుగుతుంది. దాంతోపాటు వివాహాలు, ఇతర శుభకార్యాలు ఈ కాలంలోనే ఎక్కువగా జరుగుతుంటాయి. ఈ నేపథ్యంలో రహదారులపై రద్దీ పెరగడం కూడా ప్రమాదాలకు కారణమవుతోంది. ఈ సమయంలో గస్తీ పెంచితే ఉల్లంఘనలకు పాల్పడేవారిని, మితిమీరిన వేగంతో ప్రయాణించే వారిని గుర్తించవచ్చు. తద్వారా ప్రమాదాలు తగ్గించవచ్చు. ఇదేమీ జరగకపోవడంతో రహదారులపై మారణహోమం కొనసాగుతోంది. రాష్ట్రంలో గత కొన్ని రోజులుగా జరుగుతున్న పరిణామాలతో ఎట్టకేలకు పోలీస్‌ శాఖ ఉన్నతాధికారులు అప్రమత్తమయ్యారు. హైవేలపై గస్తీ పెంచాలని తాజాగా ఆదేశాలు జారీ చేశారు.