కేపీహెచ్‌బీలో బాలిక ఆత్మహత్య  

కేపీహెచ్‌బీ కాలనీ: పాఠశాల నుంచి ఇంటికి వచ్చిన పద్నాలుగేళ్ల బాలిక తన గదిలో ఉరివేసుకుని ఆత్మహత్యకు పాల్పడింది. హైదరాబాద్‌లోని కేపీహెచ్‌బీ పరిధి సర్దార్‌ పటేల్‌ నగర్‌లో శనివారం జరిగిన ఈ ఘటన ఆలస్యంగా వెలుగులోకి వచ్చింది. మియాపూర్‌లోని ఓ ప్రైవేటు పాఠశాలలో విద్యార్థిని చదువుకుంటోంది. ‘మీ కూతురుగా బతకడానికి అర్హురాలిని కాదు’ అంటూ తల్లిదండ్రులకు లేఖ రాసి బాలిక ఆత్మహత్య చేసుకున్నట్లు తెలుస్తోంది. దీనిపై కేసు నమోదు చేసిన పోలీసులు.. బాలిక చదువుకుంటున్న పాఠశాలలో జరిగిన ఏదైనా సంఘటన వల్ల ఆత్మహత్యకు పాల్పడిందా అనే కోణంలో దర్యాప్తు చేస్తున్నారు.