ట్రాక్టర్‌తో తొక్కించి ఏఎస్సై హత్య

ఇసుక అక్రమ రవాణాను అడ్డుకోబోయినందుకు మధ్యప్రదేశ్‌లో దారుణం

శహ్‌దోల్‌: ఇసుక అక్రమ రవాణాను ఆపేందుకు యత్నించిన ఏఎస్సైను ట్రాక్టరుతో తొక్కించి చంపిన దారుణ ఘటన మధ్యప్రదేశ్‌లో చోటుచేసుకుంది. శహ్‌దోల్‌ జిల్లా బ్యోహారీ పోలీస్‌స్టేషన్‌ పరిధిలో విధులు నిర్వర్తిస్తున్న ఏఎస్సై మహేంద్ర బాగ్రీ, మరో ఇద్దరు సిబ్బంది కలిసి ఓ కేసులో నిందితుణ్ని అరెస్టు చేయడానికి శనివారం అర్ధరాత్రి బయలుదేరారు. బదోలీ అనే గ్రామానికి చేరుకునేసరికి.. ఇసుకను అక్రమంగా తరలిస్తున్న ఓ ట్రాక్టరు ఎదురుగా వచ్చింది. వాహనాన్ని ఆపాలని సంజ్ఞ చేసినప్పటికీ డ్రైవర్‌ ట్రాక్టరును వేగంగా వారి మీదకు పోనిచ్చాడు. ఈ క్రమంలో మహేంద్ర ఆ వాహనం కింద పడి దుర్మరణం పాలయ్యారు. ఇది గమనించిన డ్రైవర్‌.. ట్రాక్టరు దిగి పారిపోవడంతో వాహనం అదుపు తప్పి బోల్తా కొట్టింది. ఈ ఘటనకు సంబంధించి డ్రైవర్‌, మరో వ్యక్తిని అరెస్టు చేశామని.. వాహన యజమాని పరారీలో ఉన్నాడని పోలీసులు తెలిపారు.