HRC: మంత్రి శ్రీనివాస్‌గౌడ్‌, ఆయన సోదరుడిపై హెచ్చార్సీలో ఫిర్యాదు

నారాయణగూడ, న్యూస్‌టుడే: రాష్ట్ర మంత్రి శ్రీనివాస్‌గౌడ్‌, ఆయన సోదరుడు శ్రీకాంత్‌గౌడ్‌ల నుంచి తమకు ప్రాణహాని ఉందంటూ మహబూబ్‌నగర్‌ జిల్లాకు చెందిన విశ్వనాథరావు, పుష్పలత దంపతులు బుధవారం రాష్ట్ర మానవ హక్కుల కమిషన్‌ (ఎస్‌హెచ్‌ఆర్‌సీ)ని ఆశ్రయించారు. 2018 ఎన్నికల సమయంలో ఓ కేసులో శ్రీనివాస్‌గౌడ్‌కు వ్యతిరేకంగా సాక్ష్యం చెప్పామని అక్రమ కేసులు పెట్టించి వేధింపులకు పాల్పడుతున్నారని కమిషన్‌ దృష్టికి తీసుకొచ్చారు. సీఐ మహేశ్వర్‌తో అర్ధరాత్రి వేళలో ఇంటిపై దాడులు చేయిస్తూ భయభ్రాంతులకు గురిచేస్తున్నారని ఆరోపించారు. ఓ పైవేటు సంస్థలో పనిచేస్తున్న తమ ఇద్దరినీ ఉద్యోగాల్లోంచి తీయించేశారని ఫిర్యాదు చేశారు. ఇప్పటికైనా వేధింపులు ఆగకపోతే మంత్రి, ఆయన సోదరుడి పేర్లతో లేఖ రాసి ఠాణా ముందు ఆత్మహత్య చేసుకుంటామని ఫిర్యాదులో పేర్కొన్నారు.