Crime News: దారుణం! భర్తను చంపి మరుగుదొడ్డి కింద పూడ్చి..

జడ్చర్ల: ఆస్తి తగాదాలతో భర్తను హత్య చేసిన భార్య.. మృతదేహాన్ని ఇంట్లోని మరుగుదొడ్డి కింద పాతి పెట్టింది. ఈ ఘటన మహబూబ్‌నగర్‌ జిల్లా నవాబుపేట మండలంలో చోటు చేసుకుంది. వివరాల్లోకి వెళితే.. మండలంలోని దర్పల్లి గ్రామపంచాయతీ పరిధిలో గల చిన్నంబావి గ్రామానికి చెందిన చిన్నయ్య(45) ఇటీవల తనకున్న ఆస్తిని అమ్మేసి ఓ ఇంటిని నిర్మించి తన చెల్లెళ్లకు ఇచ్చాడు. ఈ విషయంలో చిన్నయ్య, రాములమ్మ మధ్య గొడవలు మొదలయ్యాయి. భర్త చేసిన పనితో విసుగు చెందిన రాములమ్మ.. చిన్నయ్యను హత్య చేసి తన ఇంట్లోనే మరుగుదొడ్డి కింద పాతిపెట్టింది. గత రెండు నెలలుగా చిన్నయ్య కనిపించకపోవడంతో అతని సోదరి పోలీసులకు ఫిర్యాదు చేసింది. కేసు నమోదు చేసిన పోలీసులు విచారణ చేపట్టారు. ఈ క్రమంలో చిన్నయ్యను చంపింది రాములమ్మే అని విచారణలో తేల్చారు. రాములమ్మ చెప్పిన వివరాల మేరకు రంగంలోకి దిగిన పోలీసులు మరుగుదొడ్డి ఉన్న ప్రాంతంలో జేసీబీ సాయంతో ఇంటిని కూల్చేసి.. మురుగుదొడ్డి కింద ఉన్న చిన్నయ్య మృతదేహాన్ని వెలికితీశారు. వెంటనే రాములమ్మను పోలీసులు అదుపులోకి తీసుకున్నారు.