ప్రధాని పర్యటన ఏర్పాట్లపై సమీక్ష

గన్నవరం గ్రామీణం, న్యూస్‌టుడే: ఎన్నికల నేపథ్యంలో ఈ నెల 8న భారత ప్రధాని నరేంద్రమోదీ పర్యటనకు ఏర్పాట్లు పూర్తి చేసినట్లు జిల్లా డీకే బాలాజీ తెలిపారు. ప్రధాని పర్యటనపై విమానాశ్రయ ఉద్యోగులు, వివిధ శాఖలతో ఆయన ఆదివారం సమీక్ష నిర్వహించారు. ప్రధాని పర్యటనలో విధులు నిర్వహించే శాఖలకు పలు సూచనలు చేశారు. నిబంధనల మేరకు కాన్వాయ్‌, జిల్లా పరిధిలో పర్యటన ఏర్పాట్ల గురించి వివిధ శాఖల తొలుత ఉన్నతాధికారులతో సమాలోచనలు చేశారు. విమానాశ్రయంలో లైఫ్‌ సపోర్ట్‌ వైద్య సదుపాయాలు, గన్నవరం సీహెచ్‌సీ, డా.పిన్నమనేని వైద్యశాలలో అత్యవసర వైద్య సదుపాయాలు అందుబాటులో ఉంచాలన్నారు. వీఐపీ లాంజ్‌, విద్యుత్తు సదుపాయం, ఇతర వసతుల కల్పన ఏర్పాట్లు చేయాలని ఆదేశించారు. బుధవారం సాయంత్రం ప్రత్యేక విమానంలో విజయవాడ అంతర్జాతీయ విమానాశ్రయం చేరుకోనున్న ప్రధాని మోదీ.. విమానాశ్రయం నుంచి రోడ్డు మార్గంలో విజయవాడ బయలుదేరి వెళ్తారు. విజయవాడ పర్యటన ముగించుకున్న అనంతరం తిరిగి విమానాశ్రయం చేరుకొని ప్రత్యేక విమానంలో దిల్లీ బయలుదేరి వెళ్తారని పేర్కొన్నారు. డీఎంహెచ్‌వో గీతాభాయ్‌, ఆర్డీవో పద్మావతి, తహసీల్దార్‌ పవన్‌కుమార్‌, ఏపీడీ ఎమ్‌ఎల్‌కే.రెడ్డి తదితరులు పాల్గొన్నారు.