తెదేపా ప్రచారంలో తప్పెట కొట్టాడని..

దళితుడిని చితకబాదిన వైకాపా సర్పంచి మరిది

రాయదుర్గం ప్రభుత్వ ఆసుపత్రిలో చికిత్స పొందుతున్న హనుమంతు

డి.హీరేహాళ్‌, న్యూస్‌టుడే: తెదేపా ఎన్నికల ప్రచారంలో తప్పెట కొట్టాడని ఓ దళితుడిని వైకాపా సర్పంచి మరిది చితకబాదాడు. ఈ ఘటన హీరేహాళ్‌ మండలంలో చోటు చేసుకుంది. హులికల్లు గ్రామంలో సోమవారం రాయదుర్గం తెదేపా ఎమ్మెల్యే అభ్యర్థి కాలవ శ్రీనివాసులు ఎన్నికల ప్రచారం నిర్వహించారు. హనుమంతు తెదేపాకు మద్దతుగా తప్పెట కొట్టాడు. దీన్ని జీర్ణించుకోలేక కల్యం వైకాపా మద్దతుదారు సర్పంచి పుష్పవతి మరిది శివ, అదే గ్రామానికి చెందిన దేవరాజు హనుమంతుపై పిడిగుద్దులు కురిపించారు. గ్రామంలో ఎవరైనా తెదేపాకు తప్పెట కొడితే వారికీ ఇదే గతి పడుతుందని శివ హెచ్చరించాడు. తీవ్రంగా గాయపడిన హనుమంతును బంధువులు రాయదుర్గం ప్రభుత్వ ఆసుపత్రికి తరలించి చికిత్స అందిస్తున్నారు. దాడి చేసిన ఇద్దరినీ విచారిస్తున్నట్లు ఎస్సై గురుప్రసాద్‌రెడ్డి తెలిపారు. బాధ్యులను శిక్షించాలని దళితులు కోరారు.