ఎలక్ట్రిక్‌ వాహనం బ్యాటరీ పేలి గాయాలు

వనస్థలిపురం, న్యూస్‌టుడే: ఛార్జింగ్‌కు పెట్టిన ఎలక్ట్రిక్‌ వాహనం బ్యాటరీ పేలడంతో ఒకరికి గాయాలైన సంఘటన వనస్థలిపురం ఠాణా పరిధిలో  చోటుచేసుకుంది. పోలీసులు, స్థానికులు తెలిపిన వివరాల ప్రకారం... ఎన్‌జీఓకాలనీ వివేకానంద పార్కు సమీపంలో ఉంటున్న సీహెచ్‌.కోటేశ్వర్‌రావు(32) కొంతకాలం కిందట ఎలక్ట్రిక్‌ ద్విచక్ర వాహనాన్ని కొన్నారు. శనివారం సాయంత్రం తన నివాసంలో ఛార్జింగ్‌ కోసం పెట్టి...  పూర్తయిందా అని పరిశీలిస్తుండగా ఒక్కసారిగా వాహనంలోని బ్యాటరీ భారీ శబ్దంతో పేలింది. మంటలు వ్యాపించడంతో ఆయన ముఖం కాలిపోయింది. స్థానికులు సమాచారం వెంటనే అగ్నిమాపక శాఖకు అందించారు. సంఘటన స్థలానికి చేరుకున్న సిబ్బంది మంటలను ఆర్పివేశారు. ఇంటి ఆవరణలో వాహనం పేలిపోవడంతో పక్కనే ఉన్న సామగ్రి దగ్ధమైంది. కోటేశ్వర్‌రావును తొలుత సమీపంలోని ప్రైవేటు ఆసుపత్రికి, అక్కడి నుంచి ఉస్మానియాకు తరలించారు.