ఉస్మానియాలో పెచ్చులూడిన పైకప్పు.. ఉద్యోగి తలకు గాయాలు

కింద పడిన పైకప్పు

ఉస్మానియా ఆసుపత్రి, న్యూస్‌టుడే: ఉస్మానియా ఆసుపత్రిలోని మైనర్‌ ఆపరేషన్‌ థియేటర్‌లో పైకప్పు పెచ్చులూడింది. ఈ ఘటనలో విధి నిర్వహణలో ఉన్న పేషెంట్‌ కేర్‌ ఉద్యోగి తలకు గాయాలయ్యాయి. ఆదివారం ఉదయం ఉస్మానియా ఓపీ భవనంలోని మైనర్‌ ఆపరేషన్‌ థియేటర్‌లో ఓ రోగికి వైద్యులు చికిత్స చేసి వెళ్లిపోయారు. తరువాత అక్కడి శస్త్రచికిత్స టేబుల్‌ను పేషెంట్‌ కేర్‌ ఉద్యోగి వినోద్‌కుమార్‌ శుభ్రం చేస్తున్న సమయంలో ప్రమాదవశాత్తూ ఈ శిథిల భవనం పైకప్పు పెద్ద శబ్దంతో పెచ్చులూడింది. వినోద్‌కుమార్‌ తలపై పడడంతో గాయాలయ్యాయి. ఆయన తలపై కుట్లు వేసి చికిత్స చేసిన అనంతరం అవుట్‌ పేషెంట్‌గా ఇంటికి పంపించారు. ఇటీవల ఈ ఆపరేషన్‌ థియేటర్‌ను ఆధునికీకరించారు. ఈ భవనంలోని ఆర్‌ఎంవో కార్యాలయం, హెల్త్‌ ఇన్‌స్పెక్టర్‌, మీకో వార్డు తదితర విభాగాల్లోనూ గతంలో సీలింగ్‌ పెచ్చులూడిపోయింది.