ముత్తంగి రూపంలో రాములోరి దర్శనం

భద్రాచలం, న్యూస్‌టుడే: భద్రాచలం శ్రీసీతారామచంద్రస్వామి సోమవారం ముత్తంగి రూపంలో దర్శనమిచ్చారు. ముత్యాలతో పొదిగిన వస్త్రాలంకృతుడైన రామయ్యతండ్రి చూడముచ్చటగా కనిపించి మురిపించాడు. అర్చకులు భక్తిశ్రద్ధలతో సుప్రభాతం పలికి ఆరాధించి నామార్చన చేశారు. క్షేత్ర విశిష్టతను వైదిక పెద్దలు ప్రవచనం చేశారు. విష్వక్సేన పూజ, పుణ్యాహవాచనం నిర్వహించారు. అర్చకులు కన్యాదానం చేసి ప్రవర పఠించారు. మాంగల్యధారణ,  తలంబ్రాల వేడుక ఘనంగా సాగాయి. దర్బారు సేవలో ఆలపించిన కీర్తనలు తన్మయత్వాన్ని చాటాయి. భక్తులు ప్రధాన ఆలయంలోని మూలవిరాట్‌తో పాటు అనుబంధంగా ఉన్న ఆంజనేయుణ్ని, లక్ష్మీతాయారు అమ్మవారిని దర్శించుకుని తీర్థ ప్రసాదాలను స్వీకరించారు.