‘కాంగ్రెస్‌తోనే ప్రజా సంక్షేమం’

పార్టీ నాయకులు, కార్యకర్తలతో కాంగ్రెస్‌ ఎంపీ అభ్యర్థి సురేష్‌ షెట్కార్‌

నారాయణఖేడ్‌, న్యూస్‌టుడే: ఖేడ్‌ నియోజకవర్గంలోని పలు గ్రామాలకు చెందిన భారాస నాయకులు, కార్యకర్తలు ఆదివారం ఖేడ్‌లో కాంగ్రెస్‌ అభ్యర్థి సురేష్‌ షెట్కార్‌ సమక్షంలో కాంగ్రెస్‌లో చేరారు. మనూరు మండలం తిమ్మాపూర్‌కు చెందిన తాజా మాజీ ఉప సర్పంచి నర్సింహులు ముదిరాజ్‌, శంకర్‌నాయక్‌ తండాకు చెందిన మాజీ సర్పంచి కిషన్‌నాయక్‌తో పాటు పలువురు హస్తం గూటికి చేరారు. వారికి షెట్కార్‌ కాంగ్రెస్‌ కండువాలు వేసి పార్టీలోకి ఆహ్వానించారు. జహీరాబాద్‌ బార్‌ అసోసియేషన్‌కు చెందిన పలువురు సభ్యులు ఖేడ్‌లోని సురేష్‌ షెట్కార్‌ నివాసానికి వచ్చి మద్దతు ప్రకటించారు. ఈ సందర్భంగా ఆయన మాట్లాడుతూ.. కాంగ్రెస్‌తోనే ప్రజా సంక్షేమం సాధ్యమన్నారు. అన్ని రంగాల అభివృద్ధే లక్ష్యమన్నారు. మున్సిపల్‌ ఛైర్మన్‌ ఆనంద్‌ స్వరూప్‌ షెట్కార్‌ తదితరులు పాల్గొన్నారు.