‘పథకాలే భాజపాను గెలిపిస్తాయి’

మాట్లాడుతున్న ఎంపీ బీబీ పాటిల్‌

మాచారెడ్డి, న్యూస్‌టుడే: జహీరాబాద్‌ పార్లమెంట్‌లో భాజపా గెలుపు ఖాయమని కామారెడ్డి ఎమ్మెల్యే వెంకటరమణారెడ్డి పేర్కొన్నారు. మాచారెడ్డి, పల్వంచ మండలాల్లో భాజపా కార్యకర్తలతో ఆత్మీయ సమ్మేళనం కార్యక్రమాన్ని ఆదివారం నిర్వహించారు. ఆయన మాట్లాడుతూ.. కేంద్ర ప్రభుత్వం అమలు చేసిన పథకాలే మరోసారి భాజపాను అధికారంలోకి తెస్తాయని అన్నారు. తాను చేసిన వాగ్దానాలను ఎన్నికల అనంతరం నెరవేరుస్తానని పేర్కొన్నారు. భాజపాకు ఓటు వేసి భారీ మెజారిటీని ఇవ్వాలని కోరారు. భాజపా ఎంపీ అభ్యర్థి బీబీ పాటిల్‌ మాట్లాడుతూ.. కేంద్రం నుంచి నిధులు తెచ్చి గ్రామాలు, తండాలను అభివృద్ధి చేస్తానన్నారు. గెలిపించాలని కోరారు. ఆయా గ్రామాలకు చెందిన పలువురు భాజపాలో చేరారు. పార్టీ జిల్లా ఉపాధ్యక్షుడు వెంకట్‌ రెడ్డి, మండలాధ్యక్షుడు సురేశ్‌, మండల ప్రధాన కార్యదర్శి నర్సింలు, కుమ్మరి రాజశేఖర్‌, గోపి గంగారం, హారిక, బాలరాజు తదితరులు పాల్గొన్నారు.