ముగిసిన సైకిల్‌ యాత్ర

తేజేశ్వరరావును అభినందిస్తున్న సెట్‌శ్రీ సీఈవో ప్రసాదరావు, తదితరులు

శ్రీకాకుళం అర్బన్‌, న్యూస్‌టుడే: శ్రీకాకుళం ప్రభుత్వ పురుషుల డిగ్రీ కళాశాల వేదికగా నరసన్నపేటకు చెందిన అడ్వెంచర్‌ క్లబ్‌ రాష్ట్ర ప్రధానకార్యదర్శి బరాటం తేజేశ్వరరావు డిసెంబరు 10న ప్రారంభించిన సాహో సైకిల్‌ యాత్ర ఆదివారంతో ముగిసింది. జిల్లావ్యాప్తంగా అన్ని మండలాల్లో 38 రోజులపాటు పర్యటించినట్లు ఈయన తెలిపారు. అందులో భాగంగా పర్యాటక స్థలాలు, దేవాలయాలు, వెలుగులోనికి రాని ప్రాంతాలకు వెళ్లి వివరాలను సేకరించినట్లు చెప్పారు. ఈ సందర్భంగా తేజేశ్వరరావును సెట్‌ శ్రీ సీఈవో బి.వి.ప్రసాదరావు, డీఎస్‌ఏ చీఫ్‌ కోచ్‌ శ్రీనివాస్‌కుమార్‌, సైకిల్‌పోలో అసోసియేషన్‌ అధ్యక్షులు నటుకుల మోహన్‌, పర్యాటక శాఖాధికారి ఎన్‌.నారాయణరావు, తదితరులు అభినందించారు.