ఎన్నికల సమయంలో అప్రమత్తంగా ఉండండి

మాట్లాడుతున్న నాగార్జునరావు, చిత్రంలో ఇతర అధికారులు

శ్రీకాకుళం అర్బన్‌, న్యూస్‌టుడే: ఎన్నికల సమయంలో అధికారులు అప్రమత్తంగా ఉండాలని రాష్ట్ర పన్నులశాఖ సంయుక్త కమిషనర్‌ బి.నాగార్జునరావు సూచించారు. శ్రీకాకుళం వాణిజ్య పన్నుల శాఖ సర్కిల్‌ కార్యాలయంలో విజయనగరం డివిజన్‌ ట్రేడ్‌ యూనియన్‌ సభ్యులతో బుధవారం సమావేశం నిర్వహించారు. ఈ సందర్భంగా ఆయన మాట్లాడారు. ఎన్నికల నేపథ్యంలో రాజకీయ పార్టీల ప్రతినిధులు పంపిణీ నిమిత్తం వివిధ రకాల సామగ్రి తెప్పించేందుకు ప్రయత్నాలు చేసే అవకాశం ఉందన్నారు. వాటి రవాణాపై ప్రత్యేక దృష్టి సారించాలని చెప్పారు. బిల్లులు లేని సరకులు రవాణా చేస్తే చర్యలు తీసుకోవాలని ఆదేశించారు. అధికారులు తమ పరిధిలోని వ్యాపారులతో సమావేశాలు నిర్వహించి నిబంధనల పాటించేలా చూడాలని చెప్పారు. ఎన్నికల ప్రవర్తన నియమావళి అమలులో ఎవరైనా నిర్లక్ష్యంగా వ్యవహరిస్తే తీవ్ర పరిణామాలు ఉంటాయని హెచ్చరించారు. కార్యక్రమంలో డిప్యూటీ అసిస్టెంట్‌ కమిషనర్‌ జి.రాణిమోహన్‌, సిబ్బంది పాల్గొన్నారు.