సీఎంపై గులకరాయి వేసినా పట్టుకుంటారు... ఆయన బాబాయ్‌ను గొడ్డలితో నరికినా పట్టదా?

రోడ్డుషోలో మాట్లాడుతున్న వివేకా కుమార్తె సునీత, చిత్రంలో తులసిరెడ్డి తదితరులు

లింగాల, న్యూస్‌టుడే : ‘సీఎం జగన్‌పై గులకరాయితో దాడి జరిగిన నిమిషాల్లోనే నిందితుడిని అదుపులోకి తీసుకున్నారు.. మాజీ మంత్రి వైఎస్‌ వివేకానందరెడ్డిని క్రూరంగా నరికి..నరికి చంపి 5 ఏళ్లు గడిచినా ఇప్పటికీ న్యాయం జరగలేదు’ అని వివేకా కుమార్తె సునీత ఆవేదన వ్యక్తం చేశారు. పులివెందుల నియోజకవర్గంలోని వెలిదండ్ల, పార్నపల్లె, కోమన్నూతల, కుందిలిచెర్లోపల్లె, ఎగువపల్లె, దిగువపల్లె, మురారిచింతల, గుణకనపల్లె, రామన్నూతలపల్లె, చిన్నకుడాల తదితర ప్రాంతాల్లో బుధవారం సాయంత్రం ఆమె రోడ్‌షో నిర్వహించారు. ఈ సందర్భంగా ఆమె మాట్లాడుతూ.. వివేకా హత్యకేసులో న్యాయం కోసం అయిదేళ్లుగా పోరాడుతున్నానని, మీరైనా న్యాయం చేయండని ప్రజలను కోరారు. మీ బిడ్డకు అన్యాయం జరిగిందని, మీ దీవెనలు..ఆశీస్సులు కావాలన్నారు. హంతకులకు ఓటేయొద్దని పేర్కొన్నారు. కడప ఎంపీగా వైఎస్‌ షర్మిలను గెలిపించుకుంటే వివేక హత్య కేసుతో పాటు మన కష్టాలను పార్లమెంటు వరకు తీసుకెళ్తుందన్నారు. రోడ్డుషోలో పులివెందుల కాంగ్రెస్‌ పార్టీ ఎమ్మెల్యే అభ్యర్థి ధ్రువకుమార్‌రెడ్డి, పీసీసీ మీడియా సెల్‌ ఛైర్మన్‌ తులసిరెడ్డి, నాయకులు నర్రెడ్డి శివప్రకాష్‌రెడ్డి, బోనాల బాబురెడ్డి, యమ్మనూరు మనోహరరెడ్డి పాల్గొన్నారు.