మక్తల్‌: కేసీఆర్‌ పదేళ్ల పాలన పూర్తిగా అవినీతిలో కూరుకుపోయిందని కేంద్ర హోంమంత్రి అమిత్‌షా ఆరోపించారు. ఈ ఎన్నికలు తెలంగాణ భవిష్యత్‌ను నిర్ణయించేవని చెప్పారు. ఎన్నికల ప్రచారంలో భాగంగా మక్తల్‌లో నిర్వహించిన భాజపా సభలో ఆయన మాట్లాడారు.

‘‘రాష్ట్రంలో భారాస పాలనలో ఎమ్మెల్యేలు, మంత్రుల భూ కబ్జాలకు అడ్డులేకుండా పోయింది. ప్రజల పనులు చేయకుండా దందాలు చేయడమే ఆ పార్టీ ఎమ్మెల్యే విధానం. ఈ ఎన్నికల్లో భాజపా అధికారంలోకి వస్తే మక్తల్‌, నారాయణపేటలో టెక్స్‌టైల్‌ పార్కు ఏర్పాటు చేస్తాం. భారాసకు కాంగ్రెస్‌ బీ టీమ్‌లాంటిది. రాష్ట్ర ప్రభుత్వ అవినీతి వల్లే కాళేశ్వరంలో ప్రాజెక్టు కుంగిపోయింది. కేసీఆర్‌ను ఇంటికి సాగనంపే సమయం వచ్చింది. కాంగ్రెస్‌కు ఓటేస్తే ఆ పార్టీ నుంచి గెలిచిన ఎమ్మెల్యేలు భారాసకు అమ్ముడుపోతారు. రాష్ట్రంలో కృష్ణా పరీవాహక ప్రాంతం అభివృద్ధి చెందలేదు. మత్స్యకారుల కోసం ప్రత్యేక శాఖను ఏర్పాటు చేసి నిధులిస్తాం’’అని అమిత్‌షా అన్నారు.