Currency: మన రూపాయి విలువ ఈ దేశాల్లో చాలా ఎక్కువ!

వియత్నాం

దక్షిణాసియాలో ఉండే వియత్నాం దేశానికి ప్రముఖ పర్యాటక ప్రాంతంగా మంచి పేరుంది. ఇక్కడ అందమైన బీచ్‌లు, ఆకట్టుకునే సంస్కృతి, నోరూరించే వంటలు సందర్శకులను కట్టిపడేస్తాయి. కాగా మన ఒక్క రూపాయి ఇక్కడ 305.71 వియత్నాం డాంగ్‌ గా ఉంది. అంటే ₹100.. వియత్నాం కరెన్సీలో 30,570.95 డాంగ్‌లతో సమానం.

ఇండోనేషియా

ఇండోనేషియా కూడా ఆసియా ఖండంలో భాగమే. అగ్ని పర్వతాలు ఎక్కువగా ఉన్న దేశాల్లో ఇదొకటి. పురాతన హిందూ, బౌద్ధ దేవాలయాలు ఎక్కువగా కనిపిస్తాయి. ఈ దేశపు కరెన్సీ ఇండోనేషియన్‌ రుపియా. మన ఒక్క రూపాయి విలువ ఇక్కడ 193.01 రూపియాలు. అంటే మన దగ్గర ₹100 ఉంటే, ఇండోనేషియాలో 19,301.24రుపియాలతో సమానం.

ఉజ్బెకిస్థాన్‌

మధ్య ఆసియాలో.. ఇస్లామిక్‌ దేశాల సరసన ఉన్న ఉజ్బెకిస్థాన్‌లో ఆధునిక భవనాలతోపాటు 17వ శతాబ్దం నాటి నిర్మాణాలు, సాంస్కృతిక అవశేషాలు కనిపిస్తుంటాయి. ఎటు చూసినా ఇస్లామిక్‌ శైలి కట్టడాలు, మసీదులు దర్శనమిస్తాయి. ఈ దేశపు కరెన్సీ ఉజ్బెకిస్థానీ సోమ్‌. మన రూపాయి విలువ అక్కడ 144.22సోమ్స్‌గా ఉంది. అంటే ₹100 ఉంటే, ఉజ్బెకిస్థాన్‌లో 14,422.17 సోమ్స్‌ ఉన్నట్లే. 

లావోస్‌

థాయ్‌లాండ్‌, వియత్నాం, మయన్మార్‌ దేశాలకు పొరుగున ఉండే లావోస్‌లో చాలావరకు అంతర్జాతీయ సదస్సులు జరుగుతుంటాయి. ఈ దేశంలో ఉన్న అత్యంత అందమైన గ్రామాలు, జలపాతాలను చూడటానికి సందర్శకులు వస్తుంటారు. లావోస్‌ కరెన్సీ లావోటియన్‌ కిప్‌. మన ఒక్క రూపాయి.. 140.72లావోటియన్‌ కిప్‌తో సమానం. అంటే భారతీయ కరెన్సీ ₹100కి లావోస్‌ కరెన్సీలో విలువ 14,071.72. 

పరాగ్వే

పరాగ్వేను దక్షిణ అమెరికా హృదయంగా అభివర్ణిస్తుంటారు. ఈ దేశానికి ఓ ప్రత్యేకత ఉంది. సముద్రమార్గం లేకపోయినా ప్రపంచంలోనే అత్యంత శక్తిమంతమైన నావికాదళం ఉన్న దేశంగా పేరుగాంచింది. ఈ దేశపు కరెన్సీ పరాగ్వేనియన్‌ గ్వారాని. ఒక రూపాయితో పోలిస్తే గ్వారాని మారకం విలువ 92.86గా ఉంది. అంటే మన ₹100.. అక్కడి దేశ కరెన్సీలో 9,286.03 గ్వారానిలతో సమానం.

కాంబోడియా

చారిత్రక కట్టడాలను కాపాడుకుంటూ వస్తోన్న ఆసియా దేశం కాంబోడియా. అక్కడి చారిత్రక నిర్మాణాలు, మ్యూజియాలను చూసేందుకు ఏటా లక్షల మంది సందర్శకులు వెళ్తుంటారు. ఆ దేశ కరెన్సీ కాంబోడియన్‌ రియల్స్‌ కాగా.. మన రూపాయితో పోలిస్తే ఆ దేశ కరెన్సీ మారకం విలువ 54.89గా ఉంది. అంటే భారత కరెన్సీ ₹100 ఉంటే, కాంబోడియా కరెన్సీలో 5,488.51రియల్స్‌తో సమానం.

కొలంబియా

దక్షిణ అమెరికాలోని కొలంబియా దేశం.. కరేబియన్‌, పసిఫిక్‌ సముద్రాల తీరంలో ఉంటుంది. పర్యాటకంగా ఈ దేశం అంతగా అనువైనది కాదనే చెప్పాలి. ఎందుకంటే ఈ దేశంలో నేరాలు ఎక్కువగా జరుగుతుంటాయట. ముఖ్యంగా మనుషుల్ని అపహరిస్తుంటారు. అందుకే ఈ దేశంలో పర్యటించేవారిని సంబంధిత అధికారులు హెచ్చరిస్తుంటారు. కాగా.. ఈ దేశ కరెన్సీని కొలంబియన్‌ పెసోగా పిలుస్తారు. ఒక రూపాయి విలువ అక్కడ 52.20 పెసోలుగా ఉంది. అంటే ₹100 ఉంటే, అది 5,219.61 పెసోలతో సమానం.

మంగోలియా

చైనా, రష్యా దేశాలతో సరిహద్దును పంచుకుంటూ మధ్యలో ఉండే మంగోలియా దేశానికి గొప్ప చరిత్ర ఉంది. ఈ దేశం ఒకప్పుడు మంగోలుల సామ్రాజ్యంగా ఉండేది. చెంఘీజ్‌ఖాన్‌ రాజ్యాన్ని స్థాపించి చైనా, రష్యాలో అనేక ప్రాంతాలను తన కైవసం చేసుకున్నాడు. కాలక్రమంలో తిరిగి చైనా, రష్యా తమ ప్రాంతాలను సొంతం చేసుకోగా.. ప్రస్తుతం మంగోలియా ఒక దేశంగా మిగిలింది. ఈ దేశపు కరెన్సీ మంగోలియన్‌ టగ్రిక్‌. మన భారత కరెన్సీ ఒక రూపాయితో పోలిస్తే.. మంగోలియన్‌ టగ్రి మారకం విలువ 38.49గా ఉంది. అంటే ₹100.. మంగోలియా కరెన్సీలో 3,849 టగ్రిలతో సమానం.

దక్షిణ కొరియా

తూర్పు ఆసియా దేశాల్లో ఒకటైన దక్షిణ కొరియా అన్ని రంగాల్లోనూ దూసుకెళ్తూ ప్రపంచంతో పోటీ పడుతోంది. ఈ దేశంలో సినిమాలు, కె-పాప్‌ సంగీతం, ఫ్యాషన్‌, టెక్నాలజీ రంగం, కాస్మోటిక్‌ సర్జరీలు చాలా పాపులర్‌. ఈ దేశపు కరెన్సీ సౌత్‌ కొరియన్‌ వాన్‌. ఇక్కడి ఒక్క సౌత్‌ కొరియన్‌ వాన్‌తో రూపాయి మారకం విలువ చూస్తే.. ఒక రూపాయి 15.93వాన్‌లతో సమానం. అంటే ₹100 ఉంటే దక్షిణ కొరియా కరెన్సీలో 1592.50 వాన్‌ ఉన్నట్లు. ఇవే కాకుండా.. భారత రూపాయి విలువ చిలీ కరెన్సీలో 10.94, శ్రీలంక కరెన్సీలో 2.72, పాకిస్థాన్‌ కరెన్సీలో 2.29, నేపాల్‌ కరెన్సీలో 1.60తో సమానంగా ఉంది.