TS High Court: శంషాబాద్‌లో 181 ఎకరాల భూ వివాదం.. హైకోర్టు కీలక తీర్పు

హైదరాబాద్‌: శంషాబాద్‌లోని రూ.కోట్ల విలువైన భూ వివాదానికి సంబంధించి గురువారం తెలంగాణ హైకోర్టు కీలక తీర్పు వెలువరించింది. శంషాబాద్‌లో కబ్జాకు గురైన 181 ఎకరాల భూమి హెచ్‌ఎండీఏదేనని న్యాయస్థానం తేల్చి చెప్పింది. భూ ఆక్రమణదారుల పిటిషన్‌ను ఉన్నత న్యాయస్థానం డిస్మిస్‌ చేసింది. దీనిపై నవంబరు 18న తీర్పు రిజర్వ్‌ చేసిన ధర్మాసనం.. గురువారం తీర్పు వెల్లడించింది. శంషాబాద్‌ భూముల వివాదంపై హైకోర్టులో దాదాపు ఏడాది పాటు వాదనలు సాగాయి. తప్పుడు రికార్డులతో కబ్జాకు యత్నించారని హెచ్‌ఎండీఏ తరఫు న్యాయవాది వాదించారు. భూములు హెచ్‌ఎండీఏకి చెందినవేనని పూర్తి ఆధారాలు సమర్పించారు. ఏడాది వాదనల తర్వాత హెచ్‌ఎండీఏకు అనుకూలంగా హైకోర్టు తీర్పు వచ్చింది.