ప్రముఖ పారిశ్రామికవేత్త డీకే శ్రీనివాస్‌ను విచారించిన ఎన్‌సీబీ

బెంగళూరు (సదాశివనగర), న్యూస్‌టుడే: హైదరాబాద్‌ నుంచి బెంగళూరుకు వచ్చిన ప్రముఖ పారిశ్రామికవేత్త డి.కె.శ్రీనివాస్‌ను నార్కోటిక్‌ కంట్రోల్‌ బ్యూరో (ఎన్‌సీబీ) అధికారులు కెంపేగౌడ విమానాశ్రయంలో మంగళవారం రాత్రి అదుపులోకి తీసుకున్నారు. అక్కడి నుంచి సదాశివనగరలోని ఆయన నివాసానికి తీసుకొచ్చి సోదాలు జరిపారు. అనంతరం యలహంకలోని ఆయన కార్యాలయానికి తీసుకెళ్లారు. అక్కడ కొన్ని దస్త్రాలను స్వాధీనపరచుకున్నారు. పలు ప్రశ్నలు సంధించి మరిన్ని వివరాలు సేకరిస్తున్నారు. మాదక ద్రవ్యాలను వినియోగించడంతో పాటు ఇతరులకు కూడా దానిని ఇచ్చినట్లు శ్రీనివాస్‌పై అభియోగాలు ఉండడంతో ఎన్‌సీబీ అధికారులు విచారిస్తున్నారు.