శ్రీహరికోటలో తొలి ప్రైవేటు ప్రయోగ వేదిక

అగ్నికుల్‌ మిషన్‌ కంట్రోల్‌ సెంటర్‌ ఆవిష్కరణ

ఈనాడు, బెంగళూరు: భారతీయ అంతరిక్ష రంగం మరో కీలక అడుగు వేసింది. ఇస్రో ఉపగ్రహాల ప్రయోగ క్షేత్రం సతీశ్‌ ధవన్‌ స్పేస్‌ సెంటర్‌ (ఎస్‌డీఎస్‌సీ- శ్రీహరికోట) ప్రాంగణంలో చెన్నైకి చెందిన అంతరిక్ష అంకుర సంస్థ అగ్నికుల్‌ కాస్మోస్‌.. అగ్నికుల్‌ మిషన్‌ కంట్రోల్‌ సెంటర్‌ను ప్రారంభించారు. ఇస్రో ఛైర్మన్‌ ఎస్‌.సోమనాథ్‌ ఈనెల 25న ఈ కేంద్రాలను ఆవిష్కరించినట్లు అగ్నికుల్‌ కాస్మోస్‌ సంస్థ సోమవారం వెల్లడించింది. ఇకపై భారతీయ ఉపగ్రహాలు మరో ప్రయోగ కేంద్రం ద్వారా అంతరిక్షంలోకి ప్రయాణం చేయొచ్చని ఇస్రో ప్రకటించింది. దేశంలో తొలి ప్రైవేటు లాంచ్‌ప్యాడ్‌ ఏర్పాటుపై ఇస్రో హర్షం వ్యక్తం చేసింది. ఈ సందర్భంగా అగ్నికుల్‌ సహ వ్యవస్థాపకుడు, సీఈఓ శ్రీనాథ్‌ రవిచంద్రన్‌ మాట్లాడుతూ ఇస్రో, అంతరిక్ష శాఖ, ఇన్‌-స్పేస్‌లు అందించిన సహకారం, సదుపాయాలతోనే అంతరిక్ష రంగంలో ప్రైవేటు సంస్థలు చక్కగా రాణించగలవన్నారు. ఇస్రో ఆపరేషన్‌ బృందాల నుంచి లిక్విడ్‌ స్టేజ్‌ నియంత్రిత వ్యవస్థలు, ఉపగ్రహాల పర్యవేక్షణ, భద్రత, ఇస్రో మిషన్‌ కంట్రోల్‌ సెంటర్‌ నుంచి డేటా సేకరించే వెసులుబాటు ఈ కేంద్రానికి ఉందన్నారు. ఐటీ మద్రాస్‌ ఉద్దీపనతో అగ్నికుల్‌ సంస్థ ఏర్పాటైంది. ఈ కేంద్రం నుంచి తొలి ప్రయోగంగా 100 కిలోల పేలోడ్‌ను మోసుకెళ్లే రెండు దశల వాహకనౌక అగ్నిబాన్‌ను ప్రయోగిస్తామని అగ్నికుల్‌ ప్రకటించింది.