NTR: ఇటుక ఇటుకలో అభిమానం.. ఎన్టీఆర్‌పై వినూత్న రీతిలో ప్రేమ

ఇంటర్నెట్ డెస్క్‌: టాలీవుడ్‌ హీరో ఎన్టీఆర్‌పై ఉన్న ప్రేమను ఓ వ్యక్తి వినూత్న రీతిలో చాటాడు. తన ఇంటి నిర్మాణంలో ఉపయోగించే ఇటుకలపై ఎన్టీఆర్‌ పేరు రాయించుకున్నాడు. ప్రస్తుతం ఇది సోషల్‌ మీడియాలో నెటిజన్లను ఆకట్టుకుంటోంది. కర్నూల్ జిల్లాలోని ఓ ఎన్టీఆర్‌ అభిమాని కొత్తగా ఇల్లు కట్టుకుంటున్నాడు. దీంతో తన ఇంటి నిర్మాణం కోసం ప్రత్యేకంగా ఇటుకలను తయారు చేయించుకున్నాడు. ప్రతి ఇటుకపై ఎన్టీఆర్ అని రాయించుకున్నాడు. దీనికి సంబంధించిన ఫొటోలను ఎక్స్‌లో పంచుకున్నాడు. ప్రస్తుతం అవి వైరల్‌ అవుతున్నాయి. ఆ ఇటుకలను చూసిన వారంతా కొత్త ఆలోచన అని కామెంట్స్ పెడుతున్నారు.

‘స్కంద’ సన్నివేశంపై ట్రోల్స్.. ఫొటోతో స్ట్రాంగ్‌ కౌంటర్‌ ఇచ్చిన రామ్‌ పోతినేని

ఇక సినిమాల విషయానికొస్తే.. ప్రస్తుతం కొరటాల శివ దర్శకత్వలో ఎన్టీఆర్ ‘దేవర’ (Devara)లో నటిస్తున్నారు. దీని షూటింగ్  గోవాలో శరవేగంగా జరుగుతోంది. జాన్వీ కపూర్‌, ఎన్టీఆర్‌ల మధ్య సన్నివేశాలను చిత్రీకరిస్తున్నారు. ఇక ఇందులోని యాక్షన్ సన్నివేశాలు సినిమాకే హైలైట్‌ కానున్నాయి. ఈ సన్నివేశాల కోసం కొరటాల శివ హాలీవుడ్‌ కొరియోగ్రాఫర్లను రంగంలోకి దింపినట్లు తెలుస్తోంది. దీంట్లో తారక్‌ అండర్ వాటర్‌ ఫైటింగ్‌ సీన్‌ ఉంటుందని టాక్ వినిపిస్తుంది. దీని కోసం ఎన్టీఆర్ ప్రత్యేకంగా ట్రైనింగ్‌ కూడా తీసుకుంటున్నారట. ముంబయి నుంచి తీసుకొచ్చిన ట్రైనర్స్‌తో తారక్‌కు శిక్షణ ఇప్పించారట. ఇక ఇందులో విలన్‌గా సైఫ్‌ అలీఖాన్ (Saif Ali Khan) కనిపించనున్నారు. రెండు భాగాలుగా ఇది విడుదల కానుంది. మొదటి పార్ట్‌ వచ్చే ఏడాది ఏప్రిల్‌5న ప్రేక్షకుల ముందుకు రానుంది. దీపావళికి ఈ సినిమా నుంచి అప్‌డేట్‌ వస్తుందని అభిమానులు ఆశిస్తున్నారు.