Murali Mohan: కొత్త ప్రతిభ ఎంతైనా అవసరం: మురళీ మోహన్‌

ఇంటర్నెట్‌ డెస్క్: చిత్ర పరిశ్రమలో కొత్త ప్రతిభ ఇంకా రావాల్సిన అవసరం ఎంతైనా ఉందని సీనియర్‌ నటుడు మురళీ మోహన్‌ (Murali Mohan) అభిప్రాయపడ్డారు. ఇప్పటికే పలువురు ఇండస్ట్రీలోకి వచ్చి, తమని తాము నిరూపించుకున్నారని అన్నారు. ‘రామ జన్మభూమి’ (Rama Janma Bhoomi) సినిమా టీజర్‌ లాంచ్‌ ఈవెంట్‌కు ఆయన ముఖ్య అతిథిగా హాజరయ్యారు.

ఈ సందర్భంగా ఆయన మాట్లాడుతూ.. ‘‘ఇప్పుడు తెలుగు సినిమా స్థాయి పెరిగింది. మన సినిమాలు ఎప్పుడు ప్రారంభమవుతున్నాయో, విడుదలవుతున్నాయో తెలుసుకునేందుకు హిందీ వాళ్లూ ఆసక్తి చూపిస్తున్నారు. సినిమా బాగుంటే హక్కులు కొనుగోలు చేసేందుకు, అవకాశం వస్తే ఏదైనా పాత్రలో నటించేందుకు బాలీవుడ్‌ వాళ్లు ముందుకొస్తున్నారు. ప్రపంచ వ్యాప్తంగా ఇప్పుడు సినిమాలు రిలీజ్ అవుతుండడంతో సక్సెస్‌ మరింత పెరిగే అవకాశం ఉంది’’ అని అన్నారు. దర్శకుడు వి. సముద్ర మళ్లీ ఫామ్‌లోకి వచ్చారని, ఆయన మరిన్ని విజయాలు అందుకోవాలని ఆకాంక్షించారు. నూతన నటులతో సముద్ర తెరకెక్కించిన చిత్రమే ‘రామజన్మభూమి’.