Allu Arjun: ‘పుష్ప 3’ సన్నాహాలు

అల్లు అర్జున్‌ ప్రస్తుతం సుకుమార్‌ దర్శకత్వంలో ‘పుష్ప: ది రూల్‌’ చేస్తున్న సంగతి తెలిసిందే. ‘పుష్ప: ది రైజ్‌’కు కొనసాగింపుగా తెరకెక్కుతున్న చిత్రమిది. ఇదింకా చిత్రీకరణ దశలో ఉండగానే ‘పుష్ప 3’ కూడా ఉండనుందనే వార్తలొచ్చాయి. దీనిపై అల్లు అర్జున్‌ జర్మనీలో జరుగుతున్న 74వ బెర్లిన్‌ చలన చిత్రోత్సవాల్లో స్పందించారు. ‘‘పుష్ప’ని మేము ఫ్రాంచైజీగా మార్చాలని అనుకుంటున్నాము. ఆ లైనప్‌ కోసం మా దగ్గర కొన్ని అద్భుతమైన ఆలోచనలు ఉన్నాయి. కాబట్టి కచ్చితంగా మీరు ‘పుష్ప 3’ని ఆశించవచ్చు’’ అని వెల్లడించారు. అనంతరం ‘పుష్ప 2’ గురించి మాట్లాడుతూ.. ‘‘తొలి భాగంతో పోల్చితే ఈ సినిమాలో పాత్రలు.. వాటి మధ్య సంఘర్షణ మరింత బలంగా ఉంటాయి. పుష్పరాజ్‌ను క్యారెక్టరైజేషన్‌ పరంగా.. స్కేల్‌ పరంగా.. ప్రజెంటేషన్‌ పరంగా చాలా ఎక్కువ స్థాయిలో చూస్తారు. కచ్చితంగా ఇది అందర్నీ అలరిస్తుందని నమ్ముతున్నా. ఈ చిత్రం తర్వాత చాలా ఆసక్తికరమైన ప్రాజెక్ట్‌లు వరసలో ఉన్నాయి. కచ్చితంగా అవన్నీ భారీ స్థాయిలోనే ఉంటాయి’’ అన్నారు. ఈ బెర్లిన్‌ చిత్రోత్సవాల్లో ‘పుష్ప: ది రైజ్‌’ను ప్రత్యేకంగా ప్రదర్శించారు. ఇక ‘పుష్ప 2’ విషయానికొస్తే.. చిత్రీకరణ దశలో ఉన్న ఈ సినిమా ఆగస్టు 15న ప్రేక్షకుల ముందుకు రానుంది. దీంట్లో రష్మిక కథానాయిక. ఫహాద్‌ ఫాజిల్‌, సునీల్‌ తదితరులు కీలక పాత్రలు పోషిస్తున్నారు. మైత్రీ మూవీ మేకర్స్‌ సంస్థ నిర్మిస్తోంది.