Sitara: మహేశ్‌ తనయ మంచి మనసు.. ఫిదా అవుతోన్న నెటిజన్లు

హైదరాబాద్‌: పేదలకు చేతనైనంత సాయం చేస్తూ ఇప్పటికే పలు సందర్భాల్లో గొప్ప మనసు చాటుకున్నారు నటుడు మహేశ్‌బాబు (Mahesh Babu) ముద్దుల కుమార్తె సితార (Sitara). తాజాగా జరిగిన ఓ కార్యక్రమంలో పెద్దల పట్ల తనకున్న గౌరవాన్ని ఆమె చూపించారు. దీనికి సంబంధించిన కొన్ని వీడియోలు నెట్టింట వైరల్‌గా మారాయి. 

దసరా వేడుకలను పురస్కరించుకుని హైదరాబాద్‌ కూకట్‌పల్లిలోని ఓ షాపింగ్‌ మాల్‌లో అతిపెద్ద బొమ్మల కొలువు ఏర్పాటు చేశారు. దీని ప్రారంభోత్సవ కార్యక్రమంలో మహేశ్‌ సతీమణి నమత్ర, కుమార్తె సితార పాల్గొన్నారు. ఈ సందర్భంగా సదరు షాపింగ్‌ మాల్‌ వారు పలువురు పేద వృద్ధులు, మహిళలకు బహుమతులు అందజేశారు. ఇందులో భాగంగా.. బహుమతి అందుకోవడం కోసం స్టేజ్‌పైకి ఎక్కడానికి ఇబ్బందిపడిన ఓ వృద్ధురాలికి సితార సాయం చేశారు. చేయి పట్టుకుని ఆమెను వేదికపైకి తీసుకువచ్చారు. అనంతరం, అక్కడి వారందరితో నవ్వుతూ మాట్లాడారు. ఫొటోలు దిగారు. సితార మంచి మనసుకు మురిసిపోయిన ఓ వృద్ధురాలు.. అపురూపంగా ఆమెను ముద్దుపెట్టుకున్నారు. దీనికి సంబంధించిన పలు వీడియోలు ప్రస్తుతం నెటిజన్ల దృష్టిని ఆకర్షిస్తున్నాయి. ‘లైక్‌ ఫాదర్‌ లైక్‌ డాటర్‌’ అంటూ వాళ్లు కామెంట్స్‌ చేస్తున్నారు.

Kiran Abbavaram: మాటిస్తున్నా.. మీరు గర్వపడేలా చేస్తా: కిరణ్‌ అబ్బవరం

ప్రస్తుతం స్కూల్‌ విద్యను అభ్యసిస్తున్నారు సితార. ఇటీవల ఆమె ఓ నగల దుకాణానికి వాణిజ్య ప్రకటనకర్తగా వ్యవహరించారు. ఈ యాడ్‌ కోసం తాను అందుకొన్న మొత్తాన్ని సేవా కార్యక్రమాలకు ఇచ్చేసినట్లు ఆమె ఇటీవల చెప్పారు. అలాగే, ఈ ఏడాది తన పుట్టినరోజు నాడు.. అనాథ ఆడపిల్లలకు సైకిళ్లను బహుమతిగా అందించారు. తనకు సినీ పరిశ్రమ అంటే ఇష్టమని, భవిష్యత్తులో అవకాశం వస్తే తప్పకుండా నటిస్తానని తెలిపారు.