ఆలూ కృత్రిమ కొరత వెనుక తృణమూల్‌: భాజపా

కోల్‌కతా: పశ్చిమబెంగాల్‌లో బంగాళాదుంపల(ఆలూ) కృత్రిమ కొరత సృష్టిస్తున్నారని, దీని వెనుక తృణమూల్‌ కాంగ్రెస్‌ హస్తం ఉందని భాజపా ఆరోపించింది. అకస్మాత్తుగా బంగాళా దుంపల ధరలు పెరగడంపై భాజపా రాష్ట్ర అధ్యక్షుడు దిలీప్‌ ఘోష్‌ ఆందోళన వ్యక్తంచేశారు. ప్రస్తుతం కిలో బంగాళా దుంపల ధర రూ.40లుగా ఉందని, సామాన్యుడికి ఎంతో కష్టంగా మారిందని , వారి జేబులకు చిల్లుపెట్టేదిగా ఉందని వ్యాఖ్యానించారు. ఆదివారం ఆయన మీడియాతో మాట్లాడుతూ.. బంగాళా దుంపల ధరలు ఎందుకు పెరిగాయని ప్రశ్నించారు. అధికార పార్టీ పెంచి పోషిస్తున్న వారే కృత్రిమ కొరత సృష్టిస్తున్నారని ఆరోపించారు. తృణమూల్‌ కాంగ్రెస్‌ నాయకత్వంపై ఆ పార్టీకి చెందిన సభ్యులే అసంతృప్తితో ఉన్నారన్నారు. 2021లో జరగబోయే అసెంబ్లీ ఎన్నికలకు ప్రముఖ రాజకీయ వ్యూహకర్త ప్రశాంత్‌ కిశోర్‌ (పీకే)ను నియమించుకోవడాన్ని కార్యకర్తలే వ్యతిరేకిస్తున్నారన్నారు. పీకే హఠావో.. టీఎంసీ బచావో వంటి నానాదాలు చేస్తున్నారని దిలీప్‌ ఘోష్‌ అన్నారు.