Andhra News: పలమనేరులో అదనంగా మరో రెండు షరతులు

ఈనాడు డిజిటల్‌, చిత్తూరు: నారా లోకేశ్‌ ‘యువగళం’ పాదయాత్ర సందర్భంగా పోలీసుల ఆంక్షలు కొనసాగుతూనే ఉన్నాయి. ఇప్పటికే విధించిన వాటికి అదనంగా.. పలమనేరు నియోజకవర్గంలో మరో రెండు ఆంక్షలను పాటించాలని పోలీసులు ఆదేశించారు. ఈనెల 30 నుంచి ఫిబ్రవరి 4 వరకు పలమనేరు నియోజకవర్గంలో నిర్వహించే పాదయాత్ర, బహిరంగ సభలకు అనుమతులివ్వాలని మాజీ మంత్రి అమరనాథరెడ్డి డీఎస్పీ సుధాకర్‌రెడ్డిని కోరారు. చెన్నై- బెంగళూరు మార్గంలోని మొగిలి నుంచి బంగారుపాళ్యం వరకు బైక్‌ ర్యాలీకి అనుమతులు కోరగా నిరాకరించారు. పలమనేరు పట్టణం, బంగారుపాళ్యం నాలుగు రోడ్ల కూడలిలో తలపెట్టిన బహిరంగసభకూ అనుమతులు నిరాకరిస్తున్నట్లు గురువారం ప్రకటించారు. ఈ రెండు కొత్త నిబంధనలను పాటించాలని పేర్కొన్నారు. ఆయా ప్రాంతాల్లో ప్రజలతో మమేకమవ్వడానికే అనుమతి ఇచ్చారు. బహిరంగ సభ నిర్వహించాలంటే సరైన ప్రదేశాన్ని గుర్తించి పలమనేరు డీఎస్పీ సుధాకర్‌రెడ్డికి ముందస్తుగా సమాచారం ఇచ్చి అనుమతులు తీసుకోవాలని సూచించారు. ఈ నెల 30వ తేదీ ఉదయం 8 గంటల నుంచి ఫిబ్రవరి 4 ఉదయం 9.50 గంటల వరకే ఈ అనుమతులు వర్తిస్తాయని పేర్కొన్నారు.