నాపై దాడికి పాల్పడితే ఏం జరుగుతుందో మీ ఊహకే వదిలేస్తున్నా: పవన్‌ కల్యాణ్‌

మంగళగిరి: అధికారం కోసం కాదు.. మార్పు కోసమే రాజకీయాల్లోకి వచ్చానని జనసేన అధినేత పవన్‌ కల్యాణ్‌ అన్నారు. మంగళగిరిలోని పార్టీ కార్యాలయంలో నిర్వహించిన జనసేన ఆవిర్భావ దినోత్సవ కార్యక్రమంలో ఆయన మాట్లాడారు.

పవన్‌ కల్యాణ్‌ ప్రసంగంలో ముఖ్యాంశాలు

• 150 మందితో జనసేనను ప్రారంభించాం.. ఇవాళ 6.50 లక్షల మంది క్రియాశీలక కార్యకర్తలు, నాయకులు ఉన్నారు.
• ఒక ఆశయం కోసం వచ్చిన వాణ్ని ఓడిపోతే శూన్యమనిపించింది. అన్యాయం జరిగితే సగటు మనిషి తిరగబడేలా ధైర్యం ఇచ్చేందుకు వచ్చా.
• ఇంకెవరూ బతక్కూడదు.. మా గుంపే బతకాలనుకుంటే కుదరదు. వైకాపా, జగన్‌పై నాకు వ్యక్తిగతంగా ద్వేషం లేదు. కానీ, మమ్మల్ని తొక్కేస్తామంటే.. మేము తొక్కేస్తాం.
• కుటుంబంలోని ఒక వ్యక్తి రాజకీయాల్లోకి వస్తే కుటుంబ సభ్యులందరినీ ఇబ్బంది పెడతారని చాలా మంది భయపెట్టారు.
• చట్టాలు అందరూ చెప్పే వారే.. కానీ ఎవరూ పాటించరు. అధికారంలో ఉన్న మనుషులు ఇంత క్రూరంగా ఉంటారా అనిపిస్తోంది.
• ఒక సమూహాన్ని ప్రభావితం చేసే వ్యక్తి రాజకీయాల్లోకి వస్తే పుట్టగతులు ఉండవనుకున్నారు. పుట్టక ముందే చంపే పరిస్థితిని తీసుకొచ్చారు.
• నాపై దాడికి పాల్పడితే ఏం జరుగుతుందో మీ ఊహకే వదిలేస్తున్నా. ప్రజల కష్టాలు, కన్నీళ్లు నావే అనుకుని పనిచేస్తున్నా.
• నటుడిగా, ప్రజాభిమానం ఉన్న వ్యక్తిగా ప్రపంచమంతా తెలుసు. తగ్గే కొద్దీ ఎదుగుతాం తప్ప.. నాశనం ఉండదు.
• అప్పులు తెచ్చి వెల్ఫేర్‌ చేసుకుంటూ వెళ్లిపోతే. ప్రతి ఆటో డ్రైవర్‌, ప్రతి మహిళ.. శ్రీలంక అధ్యక్షుడి భవనాన్ని ఎలా వాడుకున్నారో తాడేపల్లి ప్యాలెస్‌ను కూడా అలాగే వాడుకుంటారు.
• శ్రీలంక అధ్యక్షుడికి పట్టిన గతి ఒక ముఖ్యమంత్రికి జరగదని గ్యారంటీ ఏంటి. జనం తిరగబడితే ఎలా ఉంటుందో ఆంధ్రా - తెలంగాణ సరిహద్దులో చూశారు. ప్రజలు తిరగబడితే ఎవరూ తట్టుకోలేరు.