Renuka Chowdary: వీడియో బయటపెట్టిన రఘునందన్‌ కూడా నేరస్థుడే: రేణుకాచౌదరి

హైదరాబాద్‌: రాష్ట్రంలో రోజురోజుకూ నేరాలు పెరిగిపోతున్నాయని కాంగ్రెస్‌ సీనియర్‌ నేత, కేంద్ర మాజీ మంత్రి రేణుకా చౌదరి ఆందోళన వ్యక్తం చేశారు. మహిళలే కాదని.. పసి పిల్లలు కూడా సురక్షితంగా లేరని ఆమె ఆవేదన వ్యక్తం చేశారు. బంగారు తెలంగాణలో రక్షణ లేకుండా పోయిందని ఎద్దేవా చేశారు. గాంధీభవన్‌లో నిర్వహించిన మీడియా సమావేశంలో ఆమె మాట్లాడారు.

రాష్ట్రంలో 418 మంది ఎస్సీ, ఎస్టీలపై అత్యాచారాలు జరిగినట్లు పోలీసు నివేదికలే చెబుతున్నాయన్నారు. అత్యాచార బాధితులకు ఎలా న్యాయం చేస్తారని ఆమె ప్రశ్నించారు. జూబ్లీహిల్స్‌ అత్యాచార ఘటనలో వీడియో బయటపెట్టిన భాజపా ఎమ్మెల్యే రఘునందన్‌రావు కూడా నేరస్థుడేనని రేణుకాచౌదరి అన్నారు. ఖమ్మంలో మంత్రి పువ్వాడ అజయ్‌ వేధింపులు తాళలేక భాజపా కార్యకర్త ఆత్మహత్య చేసుకుంటే ఏం చర్యలు తీసుకున్నారని ఆమె ప్రశ్నించారు.