అమరావతి:  పల్నాడు జిల్లా చిలకలూరిపేట నియోజకవర్గం పోస్టల్‌ బ్యాలెట్‌ ఓటింగ్‌లో గందరగోళం తలెత్తింది. అధికారుల తప్పిదం కారణంగా 1219 మంది ఉద్యోగుల ఓట్లు ప్రశ్నార్థకంగా మారాయి. నియోజకవర్గానికి సంబంధించిన పోస్టల్‌ బ్యాలెట్‌ ఓటింగ్‌ ప్రక్రియను ఆదివారం నాదెండ్ల మండలం గణపవరం జడ్పీ ఉన్నత పాఠశాలలో నిర్వహించారు. ఎన్నికల విధుల్లో పాల్గొనే పీవో, ఏపీవో, ఓపీవోలకు పోస్టల్‌ బ్యాలెట్‌ నమోదుకు అవకాశం కల్పించారు. మొత్తం 1219 మంది ఉదయం నుంచి సాయంత్రం వరకు బారులు తీరి ఓట్లు వేశారు.

కార్యక్రమం పూర్తయిన తర్వాత అధికారులు పొరపాటును గుర్తించారు. పోస్టల్‌ బ్యాలెట్‌ ఓటు బదులు ఈవీఎంలో పెట్టే బ్యాలెట్‌ను ఉద్యోగులకు అందజేశారు. వారు దానిపైనే ఓటు వేశారు. ఓటింగ్‌ పూర్తయిన తర్వాత గుర్తించిన అధికారులు విషయాన్ని ఉన్నతాధికారులకు తెలిపారు. ఈ వ్యవహారంపై రాష్ట్ర ఎన్నికల ప్రధానాధికారి ముఖేష్‌కుమార్ మీనాకు కలెక్టర్ నివేదిక ఇచ్చారు. తెదేపా నేతలు వర్ల రామయ్య, మర్రెడ్డి శ్రీనివాసరెడ్డి తదితరులు సీఈవో ముకేశ్‌ కుమార్‌ మీనాను కలిసి ఫిర్యాదు చేశారు. 1219 మంది ఉద్యోగులు ఓటు హక్కు కోల్పోకుండా చూడాలని కోరారు. రీ పోలింగ్‌ నిర్వహించాలని, పొరపాటు చేసిన అధికారులపై చర్యలు తీసుకోవాలని డిమాండ్‌ చేశారు.