Andhra News: వైకాపా ఎమ్మెల్యేకు అసమ్మతి సెగ.. గో బ్యాక్‌ అంటూ నినాదాలు

ఎస్.రాయవరం: వైకాపా ఎమ్మెల్యే గొల్ల బాబూరావుకు అసమ్మతి సెగ తగిలింది. పలు శంకుస్థాపన కార్యక్రమాలకు హాజరైన ఎమ్మెల్యేను అదే పార్టీకి చెందిన ఒక వర్గం అడ్డుకోవడంతో ఉద్రిక్త పరిస్థితులు నెలకొన్నాయి. అనకాపల్లి జిల్లా ఎస్‌.రాయవరం మండలం గుడివాడలో అంగన్వాడీ కేంద్రం ప్రారంభం, నాడు-నేడు పనుల శంకుస్థాపనకు ఎమ్మెల్యే గొల్ల బాబూరావు హాజరయ్యారు. ఈ క్రమంలో ప్రొటోకాల్ ఎందుకు పాటించలేదని, ప్రభుత్వ కార్యక్రమాలపై ఎందుకు సమాచారం ఇవ్వలేదని వైకాపా ఎంపీటీసీలు, సర్పంచులు ప్రశ్నించారు. ఎమ్మెల్యే కాన్వాయ్‌కి అడ్డుగా కూర్చున్నారు. ఎమ్మెల్యే గోబ్యాక్‌... ఎమ్మెల్యే డౌన్ డౌన్ అంటూ నినాదాలు చేశారు.

కాన్వాయ్‌ ముందు బైఠాయించిన గుడివాడ సర్పంచి శ్రీనుబాబు, వైస్ ఎంపీపీ చోడిపల్లి అప్పలరాజు, జడ్పీటీసీ సభ్యురాలు కాకర దేవి, ఇతర నాయకులను పోలీసులు అడ్డుకున్నారు. ఈ క్రమంలో పోలీసులు, వైకాపా నేతల మధ్య తోపులాట జరిగింది. ఘటనలో గుడివాడ సర్పంచి శ్రీనుబాబు గాయపడగా, జడ్పీటీసీ సభ్యురాలు కాకర దేవి, వైస్ ఎంపీపీ అప్పలరాజు సొమ్మసిల్లి పడిపోయారు. పోలీసులు నాయకులను చెదరగొట్టడంతో అంగన్వాడీ ప్రారంభం, నాడు- నేడు పనులకు శంకుస్థాపన చేసిన ఎమ్మెల్యే అక్కడనుంచి వెనుదిరిగారు.