ఆర్టీసీ ఇంకా కోలుకోలేదు: పువ్వాడ

ఈనాడు, హైదరాబాద్‌: రాష్ట్ర రోడ్డు రవాణా సంస్థ ఇంకా నష్టాల నుంచి పూర్తిగా కోలుకోలేదని, ఇప్పటికీ సగం ఆదాయమే వస్తోందని మంత్రి పువ్వాడ అజయ్‌ తెలిపారు. మెట్రో రైలును ఆదుకునేందుకు ప్రభుత్వం సిద్ధంగా ఉందన్నారు. ఖమ్మం జిల్లాలోని తెరాసలో ఎలాంటి విభేదాలు లేవన్నారు. గురువారం శాసనమండలి సమావేశ మందిరంలో ఆయన విలేకరులతో మాట్లాడారు. ఆర్టీసీని కాపాడుకునేందుకు అన్ని రకాల చర్యలు చేపట్టామన్నారు. మెట్రో రైలులో రోజుకు నాలుగు లక్షల మంది ప్రయాణిస్తేనే.. నష్టాలుండవని పేర్కొన్నారు. మెట్రోకు భూములు ఇచ్చినా.. పూర్తిస్థాయిలో వినియోగంలోకి తీసుకోలేదన్నారు. మెట్రో రైలు విషయంలో మంత్రివర్గ ఉపసంఘం నివేదిక ప్రకారం ప్రభుత్వం నిర్ణయం తీసుకుంటుందన్నారు.